រូងភ្នំ Tham Luang ដ៏ល្បី បានបើកដំណើរការឲ្យ អ្នកទេសចរនៅក្នុងប្រទេសថៃ ចូលលេងជាធម្មតាជាលើកដំបូង ចាប់តាំងពីមានការសង្រ្គោះកុមារថៃចំនួន ១២នាក់ និងគ្រូបាល់ទាត់ពួកគេម្នាក់ ក្រោយពេលពួកគេបាត់ខ្លួន នៅក្នុងល្អាងអស់រយៈពេល ១៧ថ្ងៃ កាលពីជាងមួយឆ្នាំមុន។
អ្នកទេសចរប្រមាណ ២.០០០នាក់បានសម្រុកទៅកាន់រូងភ្នំនោះនៅថ្ងៃសុក្រ ដោយសង្ឃឹមថា ពួកគេនឹងក្លាយជាមនុស្សដំបូង ដែលបានចូលក្នុងរូង។ នេះបើតាមការចុះផ្សាយរបស់កាសែតថៃ Bangkok Post។
ក្រុមបាល់ទាត់យុវជនថៃឈ្មោះ ជ្រូកព្រៃ (Wild Boars) បានធ្វើឲ្យពិភពលោកចាប់អារម្មណ៍លើរឿងរបស់ពួកគេយ៉ាងខ្លាំង ក្រោយពេលពួកគេបានជាប់នៅក្នុងរូងភ្នំដោយសារទឹកជំនន់អស់រយៈពេលជិត ២០ថ្ងៃ។
ពួកគេចុងបញ្ចប់ត្រូវបានជួយសង្រ្គោះឲ្យចេញពីល្អាងវិញ ដោយរូបរាងស្គមស្គាំង បន្ទាប់ពីមានការចូលរួមសង្រ្គោះពីក្រុមប្រទេសជាច្រើន រួមមានអ្នកជំនាញមុជទឹកជាង ៩០នាក់។
ល្អាងភ្នំស្ថិតនៅភាគខាងជើងខេត្តឈៀងរៃ (Chiang Rai) ត្រូវបានបើកឲ្យចូលទស្សនាជាផ្លូវការវិញនៅថ្ងៃសុក្រ។
សូមបញ្ជាក់ថា ក្រុមបាត់ទាល់យុវជនថៃ មានអាយុពី ១១ ទៅ ១៦ឆ្នាំ និងគ្រូបង្ហាត់ពួកគេម្នាក់អាយុ ២៥ឆ្នាំ បានជាប់នៅក្នុងល្អាងកាលពីថ្ងៃទី ២៣ ខែមិថុនា ឆ្នាំ ២០១៨ នៅពេលពួកគេព្យាយាមចូលលេងក្នុងល្អាង ខណៈមានទឹកជំនន់ខ្លាំង ហើយក៏បានធ្វើឲ្យបិទច្រកចេញមកវិញ។
ក្នុងប្រតិបត្តិការស្វែងរកក្រុមជ្រូកព្រៃនោះ ក៏មានអ្នកមុជទឹកថៃម្នាក់បានស្លាប់ផងដែរ ដោយសារតែអស់អ៊ុកស៊ីសែន៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC