ភ្នំពេញ៖ លោកស្រីមូរ សុខហួរ បាននិយាយថា សភាពការណ៍បច្ចុប្បន្ននេះ មានការប្រែប្រួល និងពោរពេញទៅដោយគ្រោះថ្នាក់ ជាពិសេសដោយកាលៈទេសៈ មិនទាន់មានភាពអនុគ្រោះពីសំណាក់ប្រទេសនានា ដែលនៅជិតខាងប្រទេសកម្ពុជាផងនោះ ពេលនេះគណៈកម្មការរៀបចំដំណើនិវត្តន៍របស់លោក សម រង្ស៊ី បាន
សម្រេចធ្វើការពន្យារពេលធ្វើមាតុភូមិនិវត្តន៍ ដែលកន្លងមកគ្រោងនឹងវិលទៅប្រទេសកម្ពុជាវិញ នៅថ្ងៃទី៩ ខែវិច្ឆិកា ឆ្នាំ២០១៩ ខាងមុខនេះ។
តាមរយៈផេកហ្វេសប៊ុកផ្លូវការនៅថ្ងៃទី២ខែវិច្ឆិកានេះ លោកខៀវ កាញារីទ្ធ រដ្ឋមន្រ្តីក្រសួងព័ត៌មានបានសរសេរបង្ហោះសារចំអកឡកឡាយ ទៅលោកស្រីមូរ សុខហួរ អនុប្រធានគណបក្សសង្គ្រោះជាតិ និងជាប្រធានគណៈកម្មការរៀបចំដំណើរនិវត្តន៍របស់លោកសម រង្ស៊ី ថា ចេកៗមែន ហើយចេកមិនល្អទៀត។
លោករដ្ឋមន្រ្តី បានបង្ហោះសារនេះ អមជាមួយនឹងលិខិតមួយរបស់អតីតគណបក្សសង្រ្គោះជាតិ ដែលលោករដ្ឋមន្រ្តី បានសរសេរថា ” ថាចេកៗមែន ហើយចេកអត់ល្អទៅទៀត”។
បើតាមសេចក្តីថ្លែងការណ៍របស់អតីតគណបក្សសង្រ្គោះជាតិនោះ លោកស្រីមូរ សុខហួរ អនុប្រធានគណបក្សសង្គ្រោះជាតិ និងជាប្រធានគណៈកម្មការរៀបចំដំណើរនិវត្តន៍របស់លោកសម រង្ស៊ី ប្រធានស្តីទីគណបក្សសង្គ្រោះជាតិ សូមជំរាបជូនសកម្មជននិង
អ្នកគាំទ្រគណបក្សសង្គ្រោះជាតិ និងជាពិសេសពលករដែលកំពុងតែបម្រើការនៅតាមប្រទេសនានាឱ្យបានជ្រាបថា ដោយសារសភាពការណ៍បច្ចុប្បន្ននេះ មានការប្រែប្រួល និងពោរពេញទៅដោយគ្រោះថ្នាក់ ជាពិសេសដោយកាលៈទេសៈ មិនទាន់មានភាពអនុគ្រោះពីសំណាក់ប្រទេសនានា ដែលនៅជិតខាងប្រទេសកម្ពុជាផងនោះ ពេលនេះគណៈកម្មការរៀបចំដំណើនិវត្តន៍របស់លោក សម រង្ស៊ី បានសម្រេចធ្វើការពន្យារពេលធ្វើមាតុភូមិនិវត្តន៍ ដែលកន្លងមកគ្រោងនឹងវិលទៅប្រទេសកម្ពុជាវិញ នៅថ្ងៃទី៩ ខែវិច្ឆិកា ឆ្នាំ២០១៩ ខាងមុខនេះ។
ក្នុងឱកាសនេះផងដែរ លោកស្រី ក្នុងនាមគណៈកម្មការរៀបចំដំណើរនិវត្តន៍របស់លោកសម រង្ស៊ី ប្រធានស្តីទីគណបក្សសង្គ្រោះជាតិ សូមធ្វើការថ្លែងអំណរគុណយ៉ាងជ្រាលជ្រៅ និងសូមលើកទឹកចិត្តឱ្យបងប្អូនសកម្មជន អ្នកគាំទ្រគណបក្សសង្គ្រោះជាតិ និងជាពិសេសពលករដែលកំពុងតែបម្រើការនៅតាមប្រទេសនានា បន្តនូវការគាំទ្រ និងការជឿជាក់លើលោក សម រង្ស៊ី ប្រធានស្តីទី
គណបក្សសង្គ្រោះជាតិ ដោយលោកពិតជានឹងវិលត្រឡប់ទៅប្រទេសកម្ពុជាវិញជាក់ជាមិនខាន ដើម្បីស្តាលទ្ធិប្រជាធិបតេយ្យ និងសិទ្ធិមនុស្សនៅក្នុងពេលវេលាសមរម្យណាមួយ។
គណៈកម្មការរៀបចំដំណើរនិវត្តន៍របស់លោក សម រង្ស៊ី ប្រធានស្តីទីគណបក្សសង្គ្រោះជាតិកំពុងរៀបចំយុត្តិសាស្ត្រថ្មី ដោយធ្វើការចរចាសម្របសម្រួលជាមួយបណ្តាកម្លាំងប្រជាធិបតេយ្យនៅក្នុងប្រទេសអាស៊ានមួយចំនួន ដើម្បីសុំការគាំទ្របើកច្រកចូលប្រទេសកម្ពុជា ក៏ដូចជាកំណត់នូវពេលវេលាថ្មីមួយទៀត ដើម្បីឱ្យឲ្យ លោកសម រង្ស៊ី និងថ្នាក់ដឹកនាំគណបក្សសង្គ្រោះជាតិដទៃទៀតបានវិលត្រឡប់មកកាន់ប្រទេសកម្ពុជាយើងវិញ៕ដោយ៖កូឡាប