ភ្នំពេញ៖ អតីតមន្រ្តីម្នាក់ នៃអតីតគណបក្សសង្រ្គោះជាតិ ដែលស្និទ្ធនឹងលោកកឹម សុខា បានសារព្រមានធ្ងន់ ចំពោះលោកស្រី មូរ សុខហួរ ថា ធ្វើជាអ្នកដឹកនាំនយោបាយឲ្យថ្លៃថ្នូរ បើដឹងថាខ្លួនអស់តម្លៃហើយឈប់ទៅ កុំឥតអៀនខ្មាស ចរិតថោក យកឈ្មោះគេ រូបគេទៅប្រើដើម្បីតែមហិច្ឆតាហិង្សារបស់ខ្លួន និងបង្ហោះរូបចាប់ដៃរវាងលោក កឹម សុខា និង សម រង្ស៊ី ដោយភ្ជាប់ជាមួយផែនការមាតុភូមិនិវត្ត ៩ វិច្ឆិកា។
លោកម៊ុត ចន្ថា អតីតមន្រ្តីគណបក្សសង្រ្គោះជាតិ នៅថ្ងៃទី២វិច្ឆិកានេះ បានសរសេរសារ នៅលើផេកហ្វេសប៊ុកផ្លូវការបស់លោក (Chantha Muth) ថា ហេតុអីលោកស្រី មូរ សុខហួរ បង្ហោះរូបចាប់ដៃរវាងលោក កឹម សុខា និង សម រង្ស៊ី ដោយភ្ជាប់ជាមួយផែនការមាតុភូមិនិវត្ត ៩ វិច្ឆិកា?
លោក បានបញ្ជាក់ថា “នេះជាទង្វើបង្កើតឡើងនូវអំពើអយុត្តិធម៌ដល់ ឯកឧត្តម កឹម សុខា ដែលកំពុងជាប់ឃុំនិងជាប់បម្រាមតុលាការ ពុំមានសិទ្ធិនយោបាយ និងសេរីភាព។ ដោយសារហេតុនេះ ឯកឧត្តម កឹម សុខា ពុំបានដឹងឮ ឬបង្ហាញការគាំទ្រ ចំពោះសកម្មភាពរបស់ អ្នកនយោបាយនិរទេសឡើយ”។
លោកបានថ្លែងថា យើងមិនចង់បង្ខំអ្នកមិនឲ្យនិយាយអ្វី ដែលអ្នកចង់និយាយនោះទេ តែបើអ្នកជាអ្នកនយោបាយ ឬតាំងខ្លួនជាអ្នកដឹកនាំនោះ អ្នកមិនគួរនិយាយអ្វីភ្ជាប់ជាមួយអ្នកដទៃ ដែលគេមិនគាំទ្រជំហរខ្លួននោះទេ។
សូមធ្វើជាអ្នកដឹកនាំនយោបាយឲ្យថ្លៃថ្នូរផង។ បើដឹងថាខ្លួនអស់តម្លៃហើយឈប់ទៅ កុំឥតអៀនខ្មាស ចរិតថោក យកឈ្មោះគេ រូបគេទៅប្រើដើម្បីតែមហិច្ឆតាហិង្សារបស់ខ្លួន៕ដោយ៖បញ្ញាស័ក្តិ