តាកែវ៖ ថ្លែងក្នុងអង្គសិក្ខាសាលាស្តីពីការអភិវឌ្ឍឧបករណ៍ពិនិត្យតាមដាន និងវាយតម្លៃផែនការយុវជនសកម្មភាពជាតិ ស្តីពីការអភិវឌ្ឍយុវជន នៅសាលប្រជុំសាលាគរុកោសល្យខេត្តតាកែវ នាព្រឹកថ្ងៃទី ៤ ខែវិច្ឆិកា ឆ្នាំ២០១៩ នេះ លោក ចឹក លីម អគ្គលេខាធិការរង នៃអគ្គលេខាធិការដ្ឋានក្រុមប្រឹក្សាជាតិកម្ពុជា ដើម្បីអភិវឌ្ឍយុវជន បានជំរុញឲ្យបណ្តាអង្គការដៃគូរ បណ្តាស្ថាប័នទាំងអស់ ដែលស្ថិតនៅក្រោមការគ្រប់គ្រងរបស់ក្រសួងអប់រំយុវជននិងកីឡានៅទូទាំង ២៥រាជធានីខេត្ត ត្រូវតែចូលរួមពិនិត្យតាមដាន វាយតម្លៃ និងប្រមូលធាតុផ្សំបញ្ចូលគ្នាបន្ថែមទៀត ដើម្បីធ្វើយ៉ាងណា ឲ្យការអភិវឌ្ឍយុវជនកម្ពុជាយើង ពោរពេញទៅដោយយុវជនវ័យក្មេងដែលមានសមត្ថភាព ចំណេះដឹង និងបង្កើតឱកាសការងារឲ្យពួកគេ ចូលរួមប្រកួតប្រជែងលើទីផ្សារការងារ ឆ្ពោះទៅសម្រេចបាននៅចក្ខុវិស័យ ដែលជាគោលនយោបាយជាតិ ក្នុងឆ្នាំ២០៥០ នាពេលខាងមុខ ។
លោក ចឹក លីម បានមានប្រសាសន៍បន្តថា ក្នុងរយៈពេលជាង ៣០ឆ្នាំកន្លងមក កម្ពុជាបានធ្វើឲ្យមានការប្រែប្រួល និងអភិវឌ្ឍគួរឲ្យកត់សម្គាល់លើគ្រប់វិស័យ ជាពិសេសការអភិវឌ្ឍសង្គម និងសេដ្ឋកិច្ច ។ ហើយដើម្បីសម្រេចចក្ខុវិស័យឆ្ពោះទៅរកការអភិវឌ្ឍប្រទេសក្នុងឆ្នាំ២០៥០ នាពេលខាងមុខ កម្ពុជាបានពឹងផ្អែកលើភាគលាភដែលខ្លួនមាន ជាពិសេស ការទាញយកសក្តានុពលនៃប្រជាសាស្ត្រវ័យក្មេង ដែលស្ថិតក្នុងប្រភេទប្រជាជនសកម្មប្រមាណ ៣០ភាគរយ នៃប្រជាជនសរុប ដើម្បីធានាឲ្យបាននូវការផលិតធនធានមនុស្សដែលមានគុណភាព និងមានសមត្ថភាពអាចឈានចូលទៅក្នុងទីផ្សារការងារ និងប្រកបដោយភាពប្រកួតប្រជែង ។ ការអនុវត្តគោលនយោបាយជាតិ និងផែនការសកម្មភាពជាតិ ស្តីពីការអភិវឌ្ឍយុវជនកម្ពុជានិងសម្រេចទៅបាន គឺអាស្រ័យលើការបន្តសមិទ្ធិកម្មដែលមានកន្លងមក ការបង្កើនប្រសិទ្ធភាព និងប្រសិទ្ធផលនៃការអនុវត្តន៍កម្មវិធីអភិវឌ្ឍយុវជន ការបង្កើតឱកាសឲ្យយុវជន និងការអន្តរាគមន៍ថ្មីៗ សម្រាប់អភិវឌ្ឍយុវជន ៕ដោយ៖ តាកែវ