ខេត្តស្វាយរៀង៖ លោកនាយឧត្តមសេនីយ៍ជៀង អំ រដ្ឋលេខាធិការក្រសួងការពារជាតិ និងជាអនុប្រធានក្រុមការងារ គណបក្សប្រជាជនកម្ពុជា ចុះជួយខេត្តស្វាយរៀង នៅព្រឹកថ្ងៃទី៣ខែវិច្ឆិកាឆ្នាំ២០១៩ បានថ្លែងទៅកាន់ពុទ្ធបរិស័ទនៅវត្តទួលតាកែវ ឃុំពងទឹក ស្រុករំដួល ខេត្តស្វាយរៀង បានលើកឡើងថា ការធ្វើអង្គកឋិនទាននេះឡើង ដើម្បីប្រមូលបច្ច័យកសាងវត្តអារាម ឲ្យកាន់តែរីកចម្រើន និងក៏ដើម្បីទ្រទ្រង់វិស័យព្រះពុទ្ធសាសនា ឲ្យរឹងមាំដោយវិស័យពុទ្ធចក្រ និងអាណាចក្រ ត្រូវដើរទន្ទឹមគ្នា មិនអាចខ្វះវិស័យមួយណាបានឡើយ ព្រោះប្រទេសយើងយកសាសនាព្រះពុទ្ធ ជាសាសនារបស់រដ្ឋ។
ការថ្លែងលើកឡើងបែបនេះ ខណៈដែលលោកនាយឧត្តមសេនីយ៍ជៀង អំ និងលោកស្រី ព្រមទាំងលោកស្រីឈន សារ៉ាណេ និងក្រុមការងារ បានដង្ហែរអង្គកឋិនទានទៅកាន់វត្តទួលតាកែវ ដែលប្រមូលបច្ច័យបានជាង៣ម៉ឺនដុល្លារអាមេរិកផងដែរ។
លោក ជៀង អំ បានថ្លែងបញ្ជាក់ថា អង្គកឋិនទានដែលបានធ្វើឡើងនាពេលនេះ ក្នុងគោលបំណងនាំយកនូវបច្ច័យ ស្បង់ចីវរ វេរប្រគេនព្រះសង្ឃ ដែលគង់ចាំព្រះវស្សាអស់កាលត្រីមាស ដើមី្បប្រមូលបច្ច័យកសាងសមិទ្ធផលនានា ក្នុងវត្តទួលតាកែវ និងសូមឲ្យកុសល្យផលបុណ្យបានធ្វើនាពេលនេះបានដល់ម្ចាស់ទាន នៃអង្គកឋិននិងប្រជាពុទ្ធបរិស័ទគ្រប់ៗគ្នា ជាពិសេសយើងទាំងអស់គ្នា បានមកជួបជុំធ្វើបុណ្យធ្វើទាន នាពេលនេះ ដោយសារប្រទេសជាតិ យើងមានសុខសន្តិភាពក្រោមការដឹកនាំ ដ៏ត្រឹមត្រូវរបស់សម្តេចតេជោហ៊ុន សែន ជានាយករដ្ឋមន្ត្រីនៃកម្ពុជា បាននាំមកនូវការអភិវឌ្ឍន៍រីកចម្រើនលើគ្រប់វិស័យ។
សូមបញ្ជាក់ថា កឋិនទាន គឺជាពិធីបុណ្យប្រពៃណីព្រះពុទ្ធសាសនា ដែលប្រជាជនខ្មែរចាប់ផ្ដើមធ្វើឡើង បន្ទាប់ពីចេញវស្សា។ បុណ្យកឋិនទាន តែងត្រូវបានដង្ហែចូលគ្រប់ទីអារាមទាំងអស់ ចាប់ពីថ្ងៃ ១រោច ខែអស្សុជ ដល់ថ្ងៃទី១៥កើត ខែកត្តិក គឺពុំមានវត្ដណាមួយត្រូវបានខកខានឡើយ។ ហើយបើទីអារាមណា មិនមានអង្គកឋិនហែរចូលទេ ទីអារាមនោះ ក៏ត្រូវតែរៀបចំជាកឋិនជើងវត្តដែរ។ ចំណែកអ្នកផ្ដើមបុណ្យ ត្រូវរៀបចំបរិក្ខារកឋិនមានត្រៃចីវរ សង្ឃាដិ ស្បង់ និងទេយ្យទានផ្សេងៗទៀតដូចជា បាត ចានស្រាក់ កាំបិត ចេស ម្ជុល ថង់យាម និងឆ័ត្រ ដើម្បីហែរទៅទីអារាមដែលបានកំណត់៕ ដោយ៖ វ៉ៃកូ
