ប្រធានាធិបតីចិន ស៊ី ជីនពីងបានប្រាប់មេដឹកនាំហុងកុង អ្នកស្រី Carrie Lam ថា រដ្ឋាភិបាលមជ្ឈិមមានទំនុកចិត្តយ៉ាងខ្លាំងទៅលើអ្នកស្រី។ នេះបើតាមប្រព័ន្ធផ្សព្វផ្សាយរបស់ចិន។
ការប្រកាសពីការមានជំនឿចិត្តរបស់ប្រធានាធិបតីចិន ទៅលើមេដឹកនាំហុងកុង ដែលកំពុងរងសម្ពាធយ៉ាងខ្លាំង ពីការតវ៉ារបស់ប្រជាជនហុងកុង កើតឡើងក្រោយពេលមានសេចក្តីរាយការណ៍ថា ទីក្រុងប៉េកាំង មានគម្រោងដាក់អ្នកថ្មីជំនួសអ្នកស្រី Carrie Lam។
ប៉ុន្តែនៅក្នុងកិច្ចប្រជុំមួយនៅទីក្រុងសៀងហៃ លោក ស៊ី ជីនពីងបានសម្តែងការគាំទ្រយ៉ាងពេញលេញ ចំពោះអ្នកស្រី Carrie Lam។
សូមបញ្ជាក់ថា ទីក្រុងហុងកុងដែលជាទឹកដីអាណានិគមន៍របស់អង់គ្លេស ត្រូវបានញាំញីដោយការផ្ទុះបាតុកម្មអស់រយៈពេល ៥ខែមកហើយ ដែរការបាតុកម្មនោះពេលខ្លះ បានផ្ទុះជាហឹង្សា។
ការផ្ទុះការតវ៉ាដ៏ធំដែលមិនធ្លាប់មាន កើតឡើងដោយសារតែច្បាប់ធ្វើបត្យាប័ន ដែលជ្រោមជ្រែងដោយអ្នកស្រី Carrie Lam ដែលច្បាប់នេះ អនុញ្ញាតិឲ្យមានការបញ្ជូនជនសង្ស័យពីហុងកុង ទៅធ្វើការកាត់ទោសនៅចិនបាន។
ហុងកុង ត្រូវបានអង់គ្លេសប្រគល់ឲ្យចិនកានកាប់វិញក្នុងឆ្នាំ ១៩៩៧ ក្រោមកិច្ចព្រមព្រៀង ប្រទេសមួយ ប្រព័ន្ធដឹកនាំពីរ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC