ភ្នំពេញ៖ គេហទំព័រផ្លូវការរបស់ក្រសួងការពារជាតិ នៅថ្ងៃទី៥ ខែវិច្ឆិកា ឆ្នាំ២០១៩នេះ បានផ្សាយព័ត៌មានថា លោកនាយឧត្តមសេនីយ៍ ឈុំ សុជាត អ្នកនាំពាក្យក្រសួងការពារជាតិ នៅថ្ងៃទី៤ ខែវិច្ឆិកា ឆ្នាំ២០១៩ បានឆ្លើយតបចំពោះការអំពាវនាវ បែបបោកបញ្ឆោតរបស់ទណ្ឌិត សម រង្ស៊ី មេក្រុមឧទ្ទាមក្រៅច្បាប់ ឱ្យកងទ័ពផ្តាច់ខ្លួននោះ គឺមិនមានតម្លៃ ឬឥទ្ធិពលមកលើកងយោធពលខេមរភូមិន្ទនោះឡើយ។
លោកបានបញ្ជាក់ថា “ការអំពាវនាវ ការបោកបញ្ឆោត ការញុះញង់របស់មេឧទ្ទាមជនក្បត់ជាតិ គ្មានតម្លៃ ឬឥទ្ធិពលអ្វីមកលើកងយោធពលខេមរភូមិន្ទនោះទេ ព្រោះកងយោពលខេមរភូមិន្ទ បានយល់ច្បាស់អំពីតួនាទី និងភារកិច្ចរបស់ខ្លួន ដែលត្រូវប្រឆាំងចំពោះជនណា ចង់មកបំផ្លិចបំផ្លាញសន្តិភាពរបស់ព្រះរាជាណាចក្រកម្ពុជា។ នាយឧត្តមសេនីយ៍ ឈុំ សុជាត បានបញ្ជាក់ថា៖ កងទ័ពមិនត្រឹមតែមិនផ្តល់តម្លៃលើការអំពាវនាវនេះឡើយ ហើយកងទ័ពកំពុងត្រៀមខ្លួន ដើម្បីកម្ចាត់ក្រុមឧទ្ទាម សម រង្ស៊ី។ កងយោធពលខេមរភូមិន្ទ ដែលស្ម័គ្រស្មោះចំពោះប្រទេសជាតិ បានត្រៀមខ្លួនរួចជាស្រេច ក្នុងការអនុវត្តបទបញ្ជា រាជរដ្ឋាភិបាលស្របច្បាប់ ដែលដឹកនាំដោយ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ក្នុងការកម្ទេចជនក្បត់ជាតិ ដោយមិនឱ្យប្រទេសកម្ពុជា មានភាពវឹកវរជាថ្មីដាច់ខាត។
លោកនាយឧត្តមសេនីយ៍ ឈុំ សុជាត អ្នកនាំពាក្យក្រសួងការពារជាតិ បានលើកឡើងដូច្នោះ បន្ទាប់ពីទណ្ឌិត សម រង្ស៊ី ដែលជាមេផែនការធ្វើរដ្ឋប្រហារផ្តួលរំលំរាជរដ្ឋាភិបាលកម្ពុជា បានប្រកាសតាមរយៈវីដេអូឃ្លីបថ្មីមួយ នៅព្រឹកថ្ងៃទី៤ ខែវិច្ឆិកា ឆ្នាំ២០១៩ ដោយអំពាវនាវដល់កងទ័ពកម្ពុជា កុំឱ្យស្ដាប់តាមបញ្ជារបស់រាជរដ្ឋាភិបាល ហើយងាកទៅចូលរួម នឹងដំណើរមាតុភូមិនិវត្តន៍របស់ខ្លួនវិញ។ ក្នុងវីដេអូថ្មីរបស់ទណ្ឌិតរូបនោះ បានសន្យាដំឡើងឋានន្តរស័ក្តិ និងប្រាក់ខែ ក៏ដូចជាផ្តល់រង្វាន់ដល់កងទ័ពណា ដែលចូលរួមជាមួយក្រុមរបស់ពួកគេ។
លោក អ្នកនាំពាក្យក្រសួងការពារជាតិ បានចំអកដល់ទណ្ឌិត សម រង្ស៊ី និងបក្ខពួក ដែលកំពុងធ្លាក់ក្នុងគ្រោះថ្នាក់ ហើយស្ថិតនៅក្នុងភាពឯកោថា៖ អ្នកនយោបាយដែលដើរហួសបន្ទាត់ក្រហម ជាប់ពាក់ព័ន្ធនឹងអំពើក្បត់ជាតិ រហូតដល់តុលាការកាត់ទោសជាច្រើនករណី ពេលនេះកំពុងអស់សង្ឃឹម អស់លទ្ធភាព សូម្បីតែសកម្មជនដែលធ្លាប់គាំទ្រ ក៏បានចាកចេញមកសារភាពជាបន្តបន្ទាប់ដែរ តើមានលទ្ធភាពឯណា ទៅឧបត្ថម្ភថវិកាដល់កងទ័ពនោះ ដូច្នេះអ្វីៗដែលពួកគេបានញុះញង់ គឺជាការបោកបញ្ឆោតសាធារណមតិជាតិ និងអន្តរជាតិតែប៉ុណ្ណោះ។
សូមបញ្ជាក់ថា កងកម្លាំងទាំង៣ប្រភេទ រួមមាន កងទ័ព កងរាជអាវុធហត្ថ និងនគរបាល នៅបណ្តាខេត្តជាប់ព្រំដែនកម្ពុជា-ថៃ កាលពីពេលថ្មីៗនេះ បានចាប់ផ្តើមបើកការហ្វឹកហាត់រួមគ្នា ដើម្បីបង្កើនការថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពនៅក្នុងខេត្តរៀងៗខ្លួន ស្របពេលដែលទណ្ឌិត សម រង្ស៊ី បានប្រកាសធ្វើសកម្មភាពសម្រុកចូលប្រទេសកម្ពុជា តាមព្រំដែនថៃ នៅថ្ងៃទី៩ ខែវិច្ឆិកា ខាងមុខនេះ ។
នៅព្រឹកថ្ងៃទី៥ខែវិច្ឆិកានេះ ទាហានឈុតខ្មៅថៃ ប្រចាំច្រកព្រំដែនអានសេះបិទរូបថតមុខសញ្ញាទណ្ឌិតទាំង៩នាក់ ខែមានមេខ្លោងទណ្ឌិត សម រង្ស៊ី នៅមាត់ច្រកចូលព្រំដែន៕ដោយ៖កូឡាប