លោកយឹម សុវណ្ណ អតីតតំណាងរាស្ត្រនៃអតីតគណបក្សសង្គ្រោះជាតិ បានថ្លែងថា ក្រុមធ្វើបក្សប្រហារ បាននិងកំពុងតែអនុវត្ត គឺជាយុទ្ធសាស្ត្រធ្វើអត្តឃាតនយោបាយ និងជាការធ្វើនយោបាយបែបសាច់កម្ម ធ្វើអាជីវកម្មនយោបាយលើខ្នងរាស្ត្រ យកប្រជាពលរដ្ឋស្លូតត្រង់មកធ្វើជាឈ្នាន់ ដើម្បីសងសឹកនយោបាយ។ ក្រុមបក្សប្រហារ ដឹកនាំដោយលោក សម រង្ស៊ី នៅពេលនេះ មិនមែនជាដំណោះស្រាយឡើយ ប៉ុន្តែបានធ្វើឱ្យសកម្មជនរបស់ខ្លួនរងទុក្ខវេទនា ប្រឈមមុខនឹងវិធានការច្បាប់។
តាមរយៈផេកហ្វេសប៊ុកផ្លូវការលោក យឹម សុវណ្ណ កាលពីថ្ងៃទី៥ខែវិច្ឆិកានេះថា “គណគណបក្សសង្គ្រោះជាតិ យល់ឃើញថា ផែនការដែលក្រុមធ្វើបក្សប្រហារបាននិងកំពុងតែអនុវត្តគឺជាយុទ្ធសាស្ត្រធ្វើអត្តឃាតនយោបាយ និងជាការធ្វើនយោបាយបែបសាច់កម្ម ធ្វើអាជីវកម្មនយោបាយលើខ្នងរាស្ត្រ យកប្រជាពលរដ្ឋស្លូតត្រង់មកធ្វើជាឈ្នាន់ ដើម្បីសងសឹកនយោបាយ”។
លោកបានលើកឡើងទៀតថា “គណបក្សសង្គ្រោះជាតិ នៅតែយល់ឃើញថា ការញុះញង់ បង្កចលាចលបដិវត្តន៍ហិង្សាប្រឆាំងនឹងរដ្ឋាភិបាលកម្ពុជា ប្រឆាំងនឹងគណបក្សប្រជាជនកម្ពុជា រៀបចំឡើងដោយក្រុមបក្សប្រហារដឹកនាំដោយលោក សម រង្ស៊ី នៅពេលនេះមិនមែនជាដំណោះស្រាយឡើយ ប៉ុន្តែបានធ្វើឱ្យសកម្មជនរបស់ខ្លួនរងទុក្ខវេទនា ប្រឈមមុខនឹងវិធានការច្បាប់ហើយ ក៏មិនមែនជាការជួយលោកប្រធាន កឹម សុខា ទេ ប៉ុន្តែជាយុទ្ធសាស្ត្រនយោបាយធ្វើឱ្យលោក ប្រធាន កឹម សុខា នៅជាប់ក្នុងឃុំកាន់តែយូរដើម្បីបម្រើផលប្រយោជន៍ខ្លួននិងបក្ខពួក”៕ ដោយ ៖ កូឡាប
