ខេត្តស្វាយរៀងៈ លោក រស់ ផារិទ្ធ អភិបាលរង ខេត្តស្វាយរៀង និងលោក សោម ចំណាន អនុរដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី៥ ខែ វិច្ឆិកា ឆ្នាំ២០១៩ នេះបានអញ្ជើញជាអធិបតី នៅក្នុងវគ្គបណ្ដុះបណ្ដាលកសាងសមត្ថភាព ដល់សមាជិកគណៈកម្មការខេត្តស្វាយរៀង សម្រាប់អនុវត្តគោលនយោបាយជាតិ ស្ដីពីមុខរបរ និងការងារ ដែលបានរៀបចំឡើងនៅសាលប្រជុំនាគព័ន្ធ អគារ ឆ សាលាខេត្ត។
នៅក្នុងវគ្គបណ្ដុះបណ្ដាលនេះក៏មានការអញ្ជើញចូលរួមពីលោក លោកស្រី ជាក្រុមការងារលេខាធិការដ្ឋាន សម្រាប់អនុវត្តគោលនយោបាយជាតិ ស្ដីពីមុខរបរ និងការងារ និងលោក លោកស្រីតំណាងមន្ទីរ-អង្គភាពនានាក្នុងខេត្ត ដែលជាសមាជិក សមាជិកាគណៈកម្មការខេត្តមួយចំនួន ។
វគ្គបណ្ដុះបណ្ដាលនេះ រៀបចំឡើងក្នុងគោលបំណងកសាងសមត្ថភាព ដល់គណៈកម្មការខេត្ត និងលេខាធិការដ្ឋាន ក្នុងការអនុវត្តគោលនយោបាយជាតិ ស្ដីពីមុខរបរ និងការងារ ឆ្នាំ២០១៥-២០២៥ ឲ្យកាន់តែមានប្រសិទ្ធភាព សំដៅពង្រឹងសុខដុមរមនាសង្គម ដោយផ្តល់ជូនប្រជាពលរដ្ឋនូវឱកាសការងារសមរម្យ និងប្រកបដោយផលិតភាពការងារខ្ពស់ ព្រមទាំងដើម្បីរួមចំណែក ក្នុងដំណើរការធ្វើការផ្លាស់ប្តូរ និងលើកស្ទួយរចនាសម្ព័ន្ធឧស្សាហកម្មពីឧស្សាហកម្មអតិពលកម្ម ទៅជាឧស្សាហកម្មពលកម្មផ្អែកលើជំនាញ នៅឆ្នាំ២០២៥ ក៏ដូចជាការលើកកម្ពស់ការប្រកួតប្រជែង និងផលិតភាព សំដៅប្រែក្លាយពីឧស្សាហកម្មមានតម្លៃបន្ថែមទាប ទៅជាឧស្សាហកម្មដែលមានតម្លៃបន្ថែមខ្ពស់ និងចូលរួមក្នុងការអភិវឌ្ឍសេដ្ឋកិច្ចជាតិឲ្យមានកំណើនខ្ពស់ ប្រកបដោយចីរភាព និងបរិយាប័ន្ន ៕ ដោយ៖វ៉ៃកូ
