តំណាងរាស្រ្តម្នាក់នៅហុងកុង ដែលមាននិន្នាការគាំទ្រក្រុងប៉េកាំង ត្រូវបានបុរសម្នាក់ដែលក្លែងខ្លួន ជាអ្នកគាំទ្រចាក់ដោយកាំបិតនៅលើដងផ្លូវ។
បើតាមវីដេអូដែលគេបង្ហោះតាមអនឡាញ បានឲ្យឃើញថា មានបុរសម្នាក់បានដើរសំដៅទៅកាន់លោក Junius Ho និងបានហុចបាច់ផ្កាឲ្យគាត់ មុនពេលគាត់បានលូកដៃចូលក្នុងកាបូបស្ពាយរបស់គាត់ ដោយគាត់បាននិយាយថា គាត់ចង់ថតរូបជាមួយនឹងតំណាងរាស្រ្តនោះ ប៉ុន្តែបែរជាលូកយកកាំបិទមកចាក់លើអ្នកតំណាងរាស្រ្តនោះទៅវិញ។
លោក Junius Ho ដែលពេលនោះបានរងរបួស និងមនុស្សផ្សេងទៀត បានចាប់បោកផ្តួលជនសង្ស័យទៅនឹងលើដី។
ការវាយប្រហារដោយកូនកាំបិតបានកើតឡើង ក្រោយពេលមានការវាយប្រហារជាច្រើនលើកច្រើនសារ លើអ្នកតវ៉ាហុងកុង។
កាលពីខែកក្កដា បាតុករគាំទ្រលទ្ធិប្រជាធិបតេយ្យ បានធ្វើការចោទប្រកាន់អ្នកតំណាងរាស្រ្តខាងលើថា បានជួយរៀបចំឲ្យមានការវាយប្រហារ ទៅលើជនស៊ីវិល នៅស្ថាននីយ៍រថភ្លើង Yuen Long។
ជនពាក់ម៉ាសមុខជាច្រើន ដែលស្លៀកសម្លៀកបំពាក់ពណ៌ស ដែលគេសង្ស័យថាជាក្រុមជើងកាង បានធ្វើការវាយប្រហារទៅលើអ្នកតវ៉ា និងអ្នកដំណើរ។
នៅលើកចុងក្រោយ លោក Junius Ho បាននិយាយថា អ្នកវាយប្រហារទាំងនោះគឺកំពុងបានការពារផ្ទះ និងប្រជាជនរបស់ពួកគេ ប៉ុន្តែលោកបានបដិសេធថា បានជាប់ពាក់ព័ន្ធនឹងការវាយប្រហារនោះ។
លោកត្រូវបានគេមើលឃើញថា បានចាប់ដៃជាមួយនឹងក្រុមដែលវាយប្រហារទៅលើបាតុករ និងអ្នកដំណើរ ហើយលោកបានលើកមេដៃសរសើរពួកគេថែមទៀត។
អ្នកតំណាងរាស្រ្តខាងលើត្រូវបានវាយប្រហារ ខណៈពេលដែលលោកកំពុងធ្វើយុទ្ធនាការបោះឆ្នោតនៅហុងកុង ដែលនឹងត្រូវធ្វើឡើងនៅចុងខែនេះ។
ក្នុងការវាយប្រហារនោះ ក៏មានមនុស្ស ២នាក់ផ្សេងទៀតរងរបួសផងដែរ។
សូមបញ្ជាក់ថា ទីក្រុងហុងកុងដែលជាទឹកដីអាណានិគមន៍របស់អង់គ្លេស ត្រូវបានញាំញីដោយការផ្ទុះបាតុកម្មអស់រយៈពេល ៥ខែមកហើយ ដែរការបាតុកម្មនោះពេលខ្លះ បានផ្ទុះជាហឹង្សា។
ការផ្ទុះការតវ៉ាដ៏ធំដែលមិនធ្លាប់មាន កើតឡើងដោយសារតែច្បាប់ធ្វើបត្យាប័ន ដែលជ្រោមជ្រែងដោយអ្នកស្រី Carrie Lam ដែលច្បាប់នេះ អនុញ្ញាតឲ្យមានការបញ្ជូនជនសង្ស័យពីហុងកុង ទៅធ្វើការកាត់ទោសនៅចិនបាន។
ហុងកុង ត្រូវបានអង់គ្លេសប្រគល់ឲ្យចិនកាន់កាប់វិញក្នុងឆ្នាំ ១៩៩៧ ក្រោមកិច្ចព្រមព្រៀង ប្រទេសមួយ ប្រព័ន្ធដឹកនាំពីរ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC