ភ្នំពេញ៖ នៅថ្ងៃពុធទី៦វិច្ឆិកានេះ ប្រមុខរដ្ឋាភិបាលថៃ លោកនាយករដ្ឋមន្ត្រី ប្រាយុទ្ធ ច័ន្ទអូចា បានប្រកាសថា លោកមិនអនុញ្ញាតឲ្យ លោក សម រង្ស៊ី ឆ្លងចូលមកកម្ពុជាតាមទឹកដីថៃឡើយ។ នេះបើយោងតាមការចុះផ្សាយរបស់កាសែត Bangkok Post ។
ការអះអាងរបស់ប្រមុខរដ្ឋាភិបាលថៃដូច្នេះ ធ្វើឡើងភ្លាមៗ បន្ទាប់ពីលោក សម រង្ស៊ី បានបង្ហាញពីបំណងឆ្លងចូលទឹក
ដីកម្ពុជា តាមរយៈប្រទេសថៃ នៅថ្ងៃទី៩ខែវិច្ឆិកាខាងមុខ។ តាមរយៈស្មារតីអាស៊ាន ប្រមុខរដ្ឋាភិបាលថៃ បានគូសបញ្ជាក់ថា ថៃ
នឹងមិនជ្រៀតជ្រែកកិច្ចការផ្ទៃក្នុង របស់ប្រទេសដទៃឡើយ និងថា ប្រទេសថៃ ក៏នឹងមិនអនុញ្ញាតឲ្យជនប្រឆាំងរដ្ឋាភិបាលម្នាក់ណា យកប្រទេសថៃជាឈ្នាន់ ដើម្បីធ្វើសកម្មភាពដែរ។
បើយោងតាមសារព័ត៌មាន Reuters ចេញផ្សាយនៅថ្ងៃទី៦ ខែវិច្ឆិកា ឆ្នាំ២០១៩នេះ ថា នាយករដ្ឋមន្ដ្រីរបស់ប្រទេសថៃ លោកឧត្តមសេនីយ៍ ប្រាយុទ្ធ ច័ន្ទអូចា បានចេញមកបញ្ជាក់ពីជំហររដ្ឋាភិបាលរបស់ខ្លួន តបនឹងរាជរដ្ឋាភិបាលកម្ពុជា ដោយលោកអះអាងថា សម រង្ស៊ី នឹងមិនត្រូវអនុញ្ញាតឲ្យជាន់ទឹកដីថៃ ព្រមទាំងធ្វើសកម្មភាពប្រឆាំងរាជរដ្ឋាភិបាលកម្ពុជានោះឡើយ ក្នុងនាមជាសមាជិកអាស៊ានដូចគ្នា។
នាយករដ្ឋមន្ដ្រី លោកប្រាយុទ្ធ ក្នុងនាមជាប្រធានផ្លាស់វេន នៃកិច្ចប្រជុំកំពូលអាស៊ានលើកទី៣៥ បានបង្ហាញពីទំនាក់ទំនងយ៉ាងល្អ ជាមួយរាជរដ្ឋាភិបាលកម្ពុជា ក្នុងនាមជាសមាជិកអាស៊ានដូចគ្នា ដោយលោកសង្កត់ធ្ងន់ មិនលូកលាន់ចូលកិច្ចការផ្ទៃក្នុង របស់ប្រទេសកម្ពុជានោះឡើយ។
នៅក្នុងសន្និសីទសារព័ត៌មានមួយ នៅក្រុងបាងកក នាថ្ងៃទី៦ ខែវិច្ឆិកា ឆ្នាំ២០១៩នេះ ឧត្តមសេនីយ៍ ប្រាយុទ្ធ ច័ន្ទអូចា ត្រូវបានសារព័ត៌មានរបស់អាមេរិក Reuters ដកស្រង់សំដីថា យោងតាមកាតព្វកិច្ចរបស់យើងចំពោះអាស៊ាន យើងនឹងមិនអនុញ្ញាតឱ្យមានការលូកដៃ ចូលកិច្ចការផ្ទៃក្នុងនៃប្រទេសជាសមាជិកនោះទេ ហើយក៏នឹងមិនអនុញ្ញាតឱ្យក្រុមមនុស្សប្រឆាំង រដ្ឋាភិបាលប្រើប្រាស់ទឹកដីថៃ ក្នុងចេតនានយោបាយនោះដែរ។ ខ្ញុំបានចេញបញ្ជាពាក់ព័ន្ធនឹងបញ្ហានេះ ដូច្នេះគាត់ ប្រហែលជាមិនអាចចូលបានឡើយ។
កាលពីថ្ងៃទី៥ ខែវិច្ឆិកា មេទ័ពកំពូលរបស់ប្រទេសថៃ ដែលឈរជើង និងគ្រប់គ្រងកម្លាំងទាំងអស់តាមខ្សែបន្ទាត់ព្រំដែនកម្ពុជា-ថៃ ក៏បានបញ្ជាក់យ៉ាងច្បាស់ថា កងកម្លាំងរបស់ថៃ ក្រោមការបញ្ជារបស់រាជរដ្ឋាភិបាល នឹងធ្វើការទប់ស្កាត់រាល់ដំណើររបស់ទណ្ឌិត សម រង្ស៊ី ព្រមទាំងអតីតថ្នាក់ដឹកនាំ នៃអតីតគណបក្សសង្គ្រោះជាតិ និងបក្ខពួក ហើយជាពិសេសនោះ កងកម្លាំងរបស់ថៃ បានចេញបទបញ្ជារួចហើយ មិនអនុញ្ញាតឲ្យមានការប្រមូលផ្ដុំខុសច្បាប់ណាមួយទាក់ទិនទៅនឹងបញ្ហានេះនៅក្នុងប្រទេស ឬនៅតាមតំបន់ព្រំដែននោះទេ។
មេយោធាថៃ បានធ្វើឡើងនៅរសៀលថ្ងៃទី៥ ខែវិច្ឆិកា ឆ្នាំ២០១៩នេះ ក្នុងជំនួបពិភាក្សាជាមួយមេទ័ពកំពូលរបស់កម្ពុជា ដែលគ្រប់គ្រងកម្លាំងនៅតាមព្រំដែន។
ភាគីទាំងពីរ ដែលកម្ពុជាដឹកនាំដោយលោកឧត្តមសេនីយ៍ផ្កាយ៣ ឯក សំអូន មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី៥ អមដោយឧត្តមសេនីយ៍ផ្កាយ២ សេង ធារិន មេបញ្ជាការរងភូមិភាគទី៥ ទទួលសេនាធិការ ព្រមទាំងថ្នាក់ដឹកនាំមួយចំនួន។ រីឯភាគីថៃ ដឹកនាំដោយមេបញ្ជាការភូមិភាគ១ លោកឧត្តមសេនីយ៍ទោ ថាំម៉ាក់នូន វិធី (LtGen.Thammanoon) ព្រមទាំងថ្នាក់ដឹកនាំមួយចំនួន។
មន្ដ្រីយោធាជាន់ខ្ពស់កម្ពុជា ដែលបានចូលរួមក្នុងកិច្ចពិភាក្សានេះ បានថ្លែងប្រាប់ឲ្យដឹងថា ជាការឆ្លើយតបមេបញ្ជាការភូមិភាគទី១ របស់ថៃ ដែលជាភូមិភាគដ៏សំខាន់ ខ្លាំងជាងគេ និងអំណាចជាងគេក្នុងចំណោមប៉ុន្មានភូមិភាគរបស់ថៃផ្សេងទៀតនោះ បានបញ្ជាក់ជំហររបស់ខ្លួនមកយើងថា គ្មានការអនុញ្ញាតឲ្យកម្មករ ឬពលករខ្មែរ ធ្វើការប្រមូលផ្ដុំចាំទទួល សម រង្សី នោះឡើយ ហើយបើមានត្រូវតែចាត់វិធានការតាមច្បាប់ភ្លាមៗតែម្ដង។ មន្ដ្រីយោធាជាន់ខ្ពស់កម្ពុជា ក៏បានបញ្ជាក់ពីការប្រកាស របស់មេភូមិភាគទី១ថៃថា រដ្ឋាភិបាលរបស់ខ្លួនក៏បានជូនដំណឹង ទៅកាន់ស្ថានទូតបារាំង ប្រចាំក្រុងបាងកក ពាក់ព័ន្ធទៅនឹងបញ្ហារបស់ សម រង្ស៊ី នេះផងដែរ ដែលមានសញ្ជាតិបារាំង ដើម្បីចូលរួមសហការឲ្យមានប្រសិទ្ធភាព៕ដោយ៖កូឡាប
