ភ្លាមៗបន្ទាប់ពីត្រូវបានក្រុមហ៊ុន Thai Airways បដិសេធមិនឲ្យឡើងយន្តហោះធ្វើដំណើរពីទីក្រុងប៉ារីសមកកាន់ទីក្រុងបាងកក ប្រទេសថៃ នៅថ្ងៃទី៧វិច្ឆិកា ទណ្ឌិត សម រង្ស៊ី បានធ្វើសេចក្ដីថ្លែងការណ៍ផ្ទាល់តាមទំព័រហ្វេសប៊ុករបស់ខ្លួនថា ការប្ដេជ្ញាចិត្តរបស់លោកចំពោះដំណើរមាតុភូមិនិវត្តន៍មិនមានការប្រែប្រួលទេ ប៉ុន្តែត្រូវពន្យារពេលបន្តិច។
បើទោះបើទោះបីជាយ៉ាងដូច្នេះក៏ដោយ ទណ្ឌិតរូបនេះ បានប្រាប់កុំឲ្យអ្នកគាំទ្ររបស់ខ្លួនតក់ស្លុត ដោយបញ្ជាក់បន្ថែមថា ក្រុមមន្ដ្រីនៃអតីតគណបក្សសង្គ្រោះជាតិ កំពុងរៀបចំទិញសំបុត្រយន្តថ្មី តាមរយៈក្រុមហ៊ុនអាកាសចរណ៍ផ្សេង ដើម្បីធ្វើដំណើរឆ្ពោះ ទៅកាន់ប្រទេសក្បែរខាងកម្ពុជា មួយផ្សេងទៀត មុននឹងចូលមកកាន់ប្រទេសកម្ពុជា នាពេលដ៏ខ្លីខាងមុខ។
បើយោងតាមទណ្ឌិត សម រង្ស៉ី ប្រកាសតាមវីដេអូផ្សាយផ្ទាល់លើ Facebook របស់ខ្លួននៅយប់ថ្ងៃទី០៧ ខែវិច្ឆិកា ឆ្នាំ២០១៩ បានថ្លែងថា «គម្រោងមាតុភូមិនិវត្តន៍របស់ថ្នាក់ដឹកនាំ គណបក្សសង្គ្រោះជាតិ ប្រហែលត្រូវពន្យារពេលបន្តិច…. ពីព្រោះក្រុមហ៊ុនអាកាសចរណ៍របស់ថៃ មិនឱ្យខ្ញុំឡើងលើយន្តហោះ ដែលត្រូវហោះមកប្រទេសថៃ ដើម្បីខ្ញុំបន្តដំណើរទៅប្រទេសកម្ពុជា»។
មន្ត្រីជាន់ខ្ពស់អាកាសចរណ៍ស៊ីវិល បានថ្លែងនៅថ្ងៃទី៧ ខែវិច្ឆិកា ឆ្នាំ២០១៩ឲ្យដឹងថា «សម រង្ស៉ី មិនមានឈ្មោះក្នុងជើងហោះហើរពីប៉ារីស ទៅកាន់ទីក្រុងបាងកក នៅថ្ងៃទី០៧ វិច្ឆិកានេះទេ»។
គម្រោងរបស់ សម រង្ស៉ី ហោះហើរចាកចេញពីទីក្រុងប៉ារីស ទៅកាន់ទីក្រុងបាងកក ត្រូវបានបរាជ័យ ដោយសារមិនមានឈ្មោះនៅក្នុងបញ្ជី ហោះហើរនៅថ្ងៃនេះទេ ព្រោះសម្រាប់ថ្ងៃទី៧ វិច្ឆិកានេះ សម រង្ស៉ី បានពន្យាពេលជើងហោះហើរអស់ហើយ នេះបើយោងតាមមន្ត្រីជាន់ខ្ពស់នៃក្រុមហ៊ុនអាកាសចរណ៍ Thai Airways ថ្លែងប្រាប់មន្ត្រីអាកាសយានដ្ឋានអន្តរជាតិភ្នំពេញ នៅល្ងាចថ្ងៃទី៧ ខែវិច្ឆិកា ឆ្នាំ២០១៩។
ប្រជាពលរដ្ឋខ្មែរមួយរូបស្ថិតនៅព្រលានយន្តហោះទីក្រុងប៉ារីស បានឃើញថា គាត់បានឃើញប៉ូលិសបារាំងបានបណ្តេញ សម រង្ស៉ី និងអ្នកហែហមចេញពី ព្រលានយន្តហោះ Charles De Gaulle។ ដូចនេះការទៅព្រលាននេះ គ្រាន់តែជាឆាកល្ខោន ដែល សម រង្ស៉ី សម្តែងឲ្យអ្នកគាំទ្រមើលថា បានទៅព្រលានមែន តែក្រុមហ៊ុនយន្តហោះថៃមិនឲ្យឡើង ដើម្បីប្រើជាលេសពន្យារពេលថ្ងៃទី ០៩/១១ ដែលតាមការពិតសំបុត្រយន្តហោះជើងហោះហើរថ្ងៃនេះ សម រង្ស៉ី បានពន្យារពេលរួចបាត់ទៅហើយ៕ ដោយ៖កូឡាប