សាកសពមនុស្សចំនួន ៣៩នាក់ដែលត្រូវគេរកឃើញនៅក្នុងទូកុងតឺណឺនៅអង់គ្លេស កាលពីខែមុន ត្រូវបានអាជ្ញាធរអង់គ្លេសបញ្ជាក់អត្តសញ្ញាណជាផ្លូវការថា ពួកគេជាជនជាតិវៀតណាមទាំងអស់។
ប៉ូលីសក្នុងតំបន់ Essex ដែលជាកន្លែងកើតហេតុ បានធ្វើកិច្ចការជាមួយនឹងមន្រ្តីវៀតណាម ដើម្បីកំណត់អត្តសញ្ញាសាកសពបុរស ៣១នាក់ និងស្រ្តី ៨នាក់។ សាកសពពួកគេត្រូវបានអាជ្ញាធរអង់គ្លេស រកឃើញកាលពីថ្ងៃទី ២៣ ខែតុលាកន្លងទៅនេះ។
អាជ្ញាធរអង់គ្លេសបញ្ជាក់ថា ពួកគេចង់ផ្តល់ពេលវេលាឲ្យគ្រួសារជនរងគ្រោះទាំងអស់ទទួលយកព័ត៌មាន មុនពេលពួកគេបង្ហាញឈ្មោះនៃជនរងគ្រោះទាំងអស់ជាសាធារណៈ។
ជនរងគ្រោះគឺមកពីខេត្ត Haiphong, Hai Duong, Nghe An, Ha Tinh, Quang Binh and Hue នៃប្រទេសវៀតណាម។ នេះបើតាមការបញ្ជាក់របស់ប៉ូលីស។
សូមបញ្ជាក់ថា ក្រោយពេលប្រទះឃើញសាកសពមនុស្សជាច្រើន ប៉ូលីសអង់គ្លេសបានចាប់ខ្លួនអ្នកបើកកុងតឺណឺ និងមនុស្សពាក់ព័ន្ធផ្សេងទៀតពីបទឧក្រិដ្ឋកម្ម។
ចំណែកនៅវៀតណាមវិញ អាជ្ញាធរបានចាប់មនុស្សជាង ១០នាក់ដែលមានការពាក់ព័ន្ធទៅនឹងការជួញដូរមនុស្ស។
ប៉ូលីសកំពុងតែតាមប្រម៉ាញ់បងប្អូនបង្កើត ២នាក់ទៀត មកពីប្រទេសអៀរឡង់ខាងជើង ដែលពាក់ព័ន្ធនឹងបទឃាតកម្ម និងជួញដូរមនុស្ស៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC