អ្នកនេសាទកូរ៉េខាងជើង ២នាក់ដែលគេសង្ស័យថា បានសម្លាប់អ្នកនេសាទចំនួន ១៦នាក់ទៀត នៅលើទូកតែមួយ មុនពេលពួកគេបានរត់គេចខ្លួន ចូលកូរ៉េខាងត្បូង ត្រូវបានអាជ្ញាធរកូរ៉េខាងត្បូង បញ្ជូនត្រឡប់ទៅកាន់ប្រទេសកូរ៉េខាងជើងវិញ។
ជនសង្ស័យទាំង ២នាក់នោះបានឆ្លងចូលកូរ៉េខាងត្បូងតាមព្រំដែនទឹក កាលពីថ្ងៃសៅរិ៍សប្តាហ៍មុន ហើយត្រូវបានអាជ្ញាធរឃុំខ្លួននៅកូរ៉េខាងត្បូង។
ជាធម្មតា កូរ៉េខាងត្បូងតែងតែផ្តល់កន្លែង ជ្រកកោណដល់ជនផ្តាច់ខ្លួនពីកូរ៉េខាងជើង ប៉ុន្តែក្នុងករណីនេះ អាជ្ញាធរកូរ៉េខាងត្បូងនិយាយថា បុរស ២នាក់នោះធ្វើឲ្យមានការគំរាមកំហែងដល់សន្តិសុខ។
ពួកគេទាំងពីរនាក់ត្រូវបានចាត់ទុកថា ជាឧក្រិដ្ឋជន ហើយក៏ត្រូវបានបញ្ជូនត្រឡប់ទៅកូរ៉េខាងជើងវិញ។
ក្រោយពេលឆ្លងព្រំដែនចូលកូរ៉េខាងត្បូង តាមរយៈទូកនេសាទមឹករបស់ពួកគេ អាជ្ញាធរកូរ៉េខាងត្បូងបានចំណាយពេល ២ថ្ងៃដើម្បីចាប់ពួកគេ។
បើតាមការចុះផ្សាយរបស់សារព័ត៌មាន Yonhap ដោយដកស្រង់ប្រភពពីមន្រ្តីកូរ៉េខាងត្បូង បានឲ្យដឹងថា ជនសង្ស័យ ២នាក់ និងអ្នកផ្សេងទៀតនៅលើទូក បានសម្លាប់ប្រធានពួកគេកាលពីចុងខែ តុលាដោយសារតែអំពើឃោរឃៅរបស់គាត់។
ក្រោយមកទៀត ពួកគេក៏បានសម្លាប់សមាជិកផ្សេងៗទៀតម្តងមួយៗ ដោយសារតែការតវ៉ា។ សាកសពរបស់ពួកគេត្រូវបានបោះទម្លាក់ចេញពីទូក។
មានជនសង្ស័យចំនួន ៣នាក់បានធ្វើដំណើរត្រឡប់ទៅកូរ៉េខាងជើងវិញ ប៉ុន្តែនៅពេលឃើញសមាជិកម្នាក់ ត្រូវប៉ូលីសចាប់នៅកំពង់ផែ ជនសង្ស័យ ២នាក់ទៀត បានសម្រេចចិត្តរត់គេចខ្លួនតាមទូកពួកគេ មកកូរ៉េខាងត្បូង។
ជនសង្ស័យ ២នាក់នោះត្រូវបានប្រគល់ត្រឡប់ឲ្យកូរ៉េខាងជើងវិញ នៅតំបន់ព្រំដែន ស្ថិតក្នុងភូមិ Panmunjom។
សូមបញ្ជាក់ថា នេះគឺជាលើកដំបូងហើយ ដែលកូរ៉េខាងត្បូងបានធ្វើការបញ្ជូនជនជាតិកូរ៉េខាងជើង ត្រឡប់ទៅប្រទេសវិញ តាមច្រកព្រំដែន Panmunjom។ មិនមានកិច្ចព្រមព្រៀងធ្វើបត្យាប័នណាមួយឡើយ រវាងកូរ៉េខាងជើង និងកូរ៉េខាងត្បូង៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC