តាកែវ៖ លោក កង អាណាន់ អភិបាល នៃគណៈអភិ បាលក្រុងដូនកែវ ខេត្តតាកែវ ព្រឹកថ្ងៃ ព្រហស្បត្តិ៍ ១១ កើត ខែ កត្ដិក ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី៧ ខែវិច្ឆិកា ឆ្នាំ២០១៩នេះ អញ្ជើញជួបសំណេះ សំណាល សាកសួរសុខទុក្ខ កងកម្លាំងចម្រុះ របស់រដ្ឋបាលក្រុងដូនកែវ ដែលពិធីនេះក៏មានការអញ្ជើញចូលរួមពី លោកអភិបាលរងក្រុងដូកែវ និងមន្រ្តីសាលា ក្រុងជាច្រើនរូប ក្នុងបរិវេណសាលាក្រុងដូនកែវ។
ឆ្លៀតក្នុងឱកាសជួបសំណេះសំណាលជាមួយកម្លាំងចម្រុះសាលាក្រុង លោក កង អាណាន់អភិបាលក្រុងដូនកែវ ក៏បានប្រសាសន៍អំពាវនាវឲ្យកងកម្លាំងប្រដាប់អាវុធទាំងអស់ ត្រូវរួមគ្នាប្តេជ្ញាថែរក្សាសន្តិភាពដែលកំពុងតែមានដូចសព្វថ្ងៃនេះ ឲ្យបានជាដាច់ខាត ហើយការពាររាជរដ្ឋាភិបាលដែលកើត ចេញពីការបោះឆ្នោតស្របច្បាប់ និងប្រឆាំងរាល់ការប៉ុនប៉ងផ្តួលរំលំ ឬធ្វើរដ្ឋប្រហាររាជរដ្ឋាភិបាល ឬក្រុមដែលចង់បង្កអស្ថេរភាពសង្គម ដោយមិនឲ្យក្រុមនេះធ្វើអ្វីបានជាដាច់ខាត ដើម្បីការពារ ជាតិ សាសនា ព្រះមហាក្សត្រ និងរក្សានូវសុខសុវត្ថិភាព ជូនបងប្អូនប្រជាពលរដ្ឋក្នុងខេត្ត។
ពិសេសនោះសូមឲ្យបងៗដែលជាកម្លាំងប្រដាប់អាវុធរបស់យើង ត្រូវត្រៀមកម្លាំងសម្រាប់ការពារសុខសន្តិភាពជូនបងប្អូនប្រជាពលរដ្ឋ នៅខេត្តតាកែវ នាឱកាសរៀបចំពិធីបុណ្យឯករាជ្យជាតិ នៅទីតាំងវិមានឯករាជ្យខេត្ត តាកែវយើង និងពិធីហូបអំបុកខ្មែរ ថែជាតិ សាសនា ព្រះមហាក្សត្រ នៅគ្រប់មូលដ្ឋានភូមិ ក្នុងសង្កាត់ទាំង៣ នៃក្រុងដូនកែវ ខេត្តតាកែវ ។
ឱកាសជួបសំណេះសំណាលជាមួយកងកម្លាំងចម្រុះរបស់រដ្ឋបាលក្រុងដូនកែវនេះផងដែរ លោក កង អាណាន់ អភិបាល នៃគណៈអភិបាលក្រុងដូនកែវ ខេត្ត តាកែវ ក៏បាននាំយកមកនូវសម្ភារៈដូចជា ទឹកក្រូច ៤០ កេះ ទឹកបរិសុទ្ធ ៤០កេះ ទឹកត្រី ១០ យួរ ទឹកស៊ីអីវ ១១យួរ អង្ករ ២០០គីទ្បូក្រាម និងថវិកា ៨០ម៉ឺនរៀលជូនដល់កម្លាំងចម្រុះសាលាក្រុងផងដែរ ៕ដោយ៖ តាកែវ
