ភ្នំពេញ៖ លោកអភិបាលរាជធានីភ្នំពេញ បានអះអាងថា បងប្អូនត្រូវរក្សាសុខភាព ការហូបចុក ការសម្រាកយកកម្លាំងឲ្យបានគ្រប់គ្រាន់ ដើម្បីត្រៀមចូលរួមប្រកួតឲ្យអស់សមត្ថភាព។ ចិត្តជាកីឡា ទោះចាញ់ឬឈ្នះជារឿងធម្មតា យើងប្រកួតដើម្បីចូលរួមថែរក្សាប្រពៃណីវប្បធម៌ ទំនៀមទម្លាប់ជាតិ នឹងដើម្បីសុខភាព។
អភិបាលនៃគណៈអភិបាលរាជធានីភ្នំពេញ លោកឃួង ស្រេង និងលោកស្រី និងលោកប៉ា សុជាតិវង្ស ប្រធានក្រុមប្រឹក្សារាជធានីភ្នំពេញ នៅព្រឹកថ្ងៃទី៨វិច្ឆិកានេះ បានជួបសំណេះសំណាលជាមួយកីឡាករ កីឡាការិនីចំណុះទូកថ្នាក់រាជធានីភ្នំពេញ នៅបរិវេណរមណីយដ្ឋានវត្តភ្នំ ដែលបងប្អូននឹងត្រូវត្រៀមខ្លួន ចូលរួមប្រកួតថ្នាក់ជាតិ ក្នុងព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក រយៈពេល៣ថ្ងៃ គឺថ្ងៃទី១០.១១.១២វិច្ឆិកា ឆ្នាំ២០១៩នេះ នៅមុខព្រះបរមរាជវាំង។
លោកហែម ស៊ីណារ៉េត ប្រធានមន្ទីរអប់រំយុវជននិងកីឡារាជធានីភ្នំពេញ បានបញ្ជាក់ថា ក្នុងព្រះរាជពិធីបុណ្យអុំទូកឆ្នាំនេះ រាជធានីភ្នំពេញមានទូកចូលរួមប្រណាំង ចំនួន៥៥ទូក មានចំណុះទូកចំនួន៣៧១៦នាក់ និងមានកីឡាបម្រុងចំនួន៦១០នាក់។
លោកឃួង ស្រេង បានថ្លែង លើកទឹកចិត្តដល់បងប្អូនកីឡាករ កីឡាការិនីដែលជាចំណុះទូកអុំ ទូកចែវទាំងអស់ឲ្យខិតខំប្រឹងប្រែង បញ្ចេញអស់កម្លាំងកាយចិត្តរួមសាមគ្គីគ្នា ដើម្បីដណ្តើម យកជ័យជំនេះនិងនាំកិត្តិយសជូនវត្ត ជូនសង្កាត់ ខណ្ឌនិងជូនរាជធានីភ្នំពេញ។ ជាមួយគ្នានេះបងប្អូនត្រូវរក្សាសុខភាព ការហូបចុក ការសម្រាកយកកម្លាំងឲ្យបានគ្រប់គ្រាន់ ដើម្បីត្រៀមចូលរួមប្រកួតឲ្យអស់សមត្ថភាព។
លោកអភិបាលបន្តថា ចិត្តជាកីឡាទោះចាញ់ឬឈ្នះជារឿងធម្មតា យើងប្រកួតដើម្បីចូលរួមថែរក្សាប្រពៃណីវប្បធម៌ ទំនៀមទម្លាប់ជាតិ នឹងដើម្បីសុខភាព។ក្នុងនាមជាម្ចាស់ផ្ទះនៃការរៀបចំពិធីបុណ្យឯករាជ្យជាតិ៩វិច្ឆិកា ,ពិធីអកអំបុកសាមគ្គី ដើម្បីការពារជាតិ សាសនា ព្រះមហាក្សត្រ និងព្រះរាជពិធីបុណ្យអុំទូកឆ្នាំនេះ រដ្ឋបាលរាជធានីភ្នំពេញ បានយកចិត្តទុកដាក់ជាចម្បងលើការពង្រឹងសន្តិសុខ សណ្តាប់ធ្នាប់សាធារណៈ ក្នុងកម្រិតខ្ពស់បំផុត ជាពិសេសប្រឆាំងដាច់ខាតរាល់ការប៉ុនប៉ងធ្វើរដ្ឋប្រ
ហាររាជរដ្ឋាភិបាលស្របច្បាប់ ដែលកើតចេញពីការបោះឆ្នោត ក៏ដូចជា មានបំណងបំផ្លាញសន្តិភាព និងក្តីសុខសាន្តរបស់ប្រជាពលរដ្ឋ របស់ពួកឧទ្ទាមក្រៅច្បាប់ ដែលដឹកនាំដោយជនក្បត់ជាតិសម រង្ស៊ី ។ ដូច្នេះទេសូមបងប្អូនដើរឲ្យឆ្ងាយ កុំទៅចូលរួមទទួលសជនក្បត់ជាតិសម រង្ស៊ី បើចូលរួមបងប្អូនមានទោស។ ជាងនេះទៅទៀត សូមបងប្អូនការពារខ្លួនឲ្យបានល្អ ពិសេសការឆ្លងរីករាលដាលនៃជំងឺអេដស៍ ស្របពេលនអត្រានៃជំងឺអេដស៍ ហាក់មានការកើនឡើងបន្តិចនៅឆ្នាំនេះ។
ជាមួយគ្នានេះ រដ្ឋបាលរាជធានីភ្នំពេញ ក៏បានខិតខំប្រឹងប្រែងកែលម្អសោភ័ណភាពរាជធានីភ្នំពេញ ឲ្យសក្តិសមទៅនឹងមជ្ឈមណ្ឌលនយោបាយ វប្បធម៌ និងសេដ្ឋកិច្ចជាបេះដូង នៃព្រះរាជាណាចក្រកម្ពុជា និងទាក់ទាញភ្ញៀវទេសចរ ឲ្យចូលមកកម្សាន្តនៅរាជធានីភ្នំពេញកាន់តែច្រើនឡើង។
ជាមួយគ្នានេះដែរ លោកអភិបាលរាជធានីភ្នំពេញ ក៏បានចែកមួក និងអាវយឺតដល់ចំណុះទូករាជធានីភ្នំពេញ ទាំងជាង៣០០០នាក់ រួមនឹងថវិកាមួយចំនួនជាការលើកទឹកចិត្ត ដល់បងប្អូនសម្រាប់ការត្រៀមប្រកួត នាពេលខាងមុខនេះដែរ។
ដោយឡែកនៅរសៀលថ្ងៃទី៨វិច្ឆិកាដដែលនេះដែរ រដ្ឋបាលរាជធានីភ្នំពេញ ក៏បានរៀបចំការប្រណាំងទូកសាកល្បង សមកម្លាំងនៅតាមដងទន្លេសាប ចំណុចមុខវត្តឧណ្ណាឡោម។ ទិដ្ឋភាពនៃការប្រារព្ធបុណ្យឯករាជ្យជាតិ៩វិច្ឆិកា និងព្រះរាជពិធី បុណ្យអុំទូក បណ្តែតប្រទីប អកអំបុកនិងសំពះព្រះខែ ប្រព្រឹត្តទៅក្នុងបរិយាកាសសប្បាយរីករាយ ប្រកបដោយមោទនភាពជាតិក្តីសប្បាយរីករាយរបស់ប្រជាពលរដ្ឋបានបង្ហាញឲ្យឃើញ ពីការរស់នៅក្នុងសុខសន្តិភាព និងការអភិវឌ្ឍន៍ក្រោមការដឹកនាំ របស់រាជរដ្ឋាភិបាល ដែលមានសម្តេចអគ្គមហាសេនាបតីតេជោហ៊ុន សែន ជាប្រមុខ។ ក្នុងដំណាក់កាលនេះដែរ អាជ្ញាធររាជធានីភ្នំពេញ បានចេញសេចក្តីជូនដំណឹង និងសេចក្តីអំពាវនាវជាបន្ត បន្ទាប់សំដៅពង្រឹងសន្តិសុខ សណ្តាប់ធ្នាប់ ក្នុងឱកាសបុណ្យ និងបានអំពាវនាវឲ្យមានការចូលរួម ពីប្រជាពលរដ្ឋក្នុងលើកកម្ពស់សោភ័ណភាព និងបរិស្ថានទីក្រុង ប្រកបដោយស្មារតីទទួលខុសត្រូវ និងជូនដំណឹងពីការបញ្ជៀសចរាចរណ៍ តាមតម្រាយផ្លូវមួយចំនួនតាមច្រកចេញចូលរាជធានីភ្នំពេញ ក៏ដូចជាការអំពាវនាវ
សុំឲ្យមានការចូលរួមបរិច្ចាគធនធានជាថវិកា ឬសម្ភារផ្សេងៗ ជួយដល់កីឡាករកីឡាការិនី ចំណុះទូករាជធានីភ្នំពេញ ដើម្បីជាការលើកទឹកចិត្តដល់បងប្អូនផងដែរ៕ដោយ៖កូឡាប