ព្រះសីហនុ៖ មន្ត្រីនាំពាក្យសាលាខេត្តព្រះសីហនុ លោក ឃាង ភារម្យ មានប្រសាសន៍ឲ្យ ដឹងថា នៅមុននេះបន្តិច ទំព័រ Facebook Page ផ្លូវការ របស់រដ្ឋបាលខេត្តព្រះសីហនុ ត្រូវជនអនាមិកលួចយកទៅគ្រប់គ្រងអស់រយៈពេលជាង២០នាទី ថ្ងៃទី៩ ខែវិច្ឆិកា ឆ្នាំ២០១៩នេះ។
ផ្តើមពីបញ្ហានេះ លោក ឃាង ភារម្យ ប្រកាសជាសាធារណៈថា រាល់បញ្ហាមិនប្រក្រតីផ្សេងៗ រដ្ឋបាលខេត្តព្រះសីហនុ សូមបដិសេធ មិនទទួលខុសត្រូវនោះឡើយ ចំពោះការបង្ហោះខ្លឹមសារណា ដែលប៉ះពាល់ដល់សង្គម ឬបញ្ហានយោបាយផ្សេងៗ ដោយការបង្ហោះ របស់ជនអនាមិក។
លោក ឃាង ភារម្យ បន្តថា ពេលនេះ ក្រុមការងារបច្ចេកទេស រដ្ឋបាលខេត្តព្រះសីហនុ កំពុងធ្វើការស្រាវជ្រាវ ដើម្បីទាញយកទំព័រ Facebook Page របស់រដ្ឋបាលខេត្តព្រះសីហនុ ដែលគ្រប់គ្រងវិញ និងស្វែងរកអ្នកដែលលួចនោះ មកចាត់វិធានការតាមផ្លូវច្បាប់៕ដោយ៖ ដែនសីមា
