ភ្នំពេញ៖ បើតាមផេកហ្វេសប៊ុករបស់សម្តេចនាយករដ្ឋមន្ត្រី បានផ្សាយថា ថ្ងៃនេះជាថ្ងៃដំបូង នៃព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ឆ្នាំ២០១៩។ ទិដ្ឋភាពនៅមាត់ទន្លេមុខព្រះបរមរាជវាំង នៅទីតាំងចំណុះទូកជ្រោយចង្វារត្រើយខាងកើត ពេលនេះ គឺមានវត្តមានបងប្អូនប្រជាពលរដ្ឋជាច្រើនកុះករមកពីគ្រប់ទិសទីមកកម្សាន្តប្រកបដោយស្នាមញញឹមរីករាយ បងប្អូនកងកម្លាំងសមត្ថកិច្ច គឺកំពុងតែឈរជើងការពារ សុខសុវត្ថិភាព សណ្ដាប់ធ្នាប់ យ៉ាងយកចិត្តទុកដាក់នៅក្នុងព្រះរាជពិធីបុណ្យ រួមទាំងកីឡាករប្រណាំងទូកផងដែរ។ ក្រៅពីការទស្សនាការប្រណាំងទូកងនៅមាត់ទន្លេ បងប្អូនប្រជាពលរដ្ឋក៏អាចទស្សនា និងទិញទំនិញតាមស្តង់តាំងពិពរណ័ទំនិញជាច្រើននៅតាមទីតាំងនីមួយៗផងដែរ។
ប្រទេសជាតិយើងមានសុខសន្តិភាពពេញលេញ ទើបយើងអាចប្រារព្ធពិធីបុណ្យជាតិធំៗប្រចាំឆ្នាំបែបនេះបាន។ សូមអាជ្ញាធរ និងសមត្ថកិច្ចគ្រប់ជាន់ថ្នាក់យកចិត្តទុកដាក់ខ្ពស់ ក្នុងការថែរក្សាសន្តិសុខសណ្តាប់ធ្នាប់ឱ្យបានល្អ ដើម្បីអោយប្រជាពលរដ្ឋ និងទេសចរបរទេសមានឱកាសបានសប្បាយរីករាយនៅក្នុងពិធីបុណ្យអុំទូក ទាំងនៅក្នុងរាជធានីភ្នំពេញ និងតាមបណ្តាខេត្តនានា។
កាលពីម្សិលថ្ងៃទី ៩ វិច្ឆិកា កម្ពុជាអបអរសាទរទិវាបុណ្យឯករាជ្យជាតិ លើកទី ៦៦ និងទទួលទានអំបុកខ្មែរ “ថែជាតិ សាសនា និងព្រះមហាក្សត្រ “ នៅទូទាំងប្រទេសប្រកបដោយបរិយាកាសសប្បាយរីករាយក្រៃលែង។
នៅថ្ងៃនេះ គឺចាប់ពីថ្ងៃទី ១០ ដល់ ១២ វិច្ឆិកា គឺយើងបន្តសប្បាយរីករាយជាមួយ “បុណ្យអុំទូក លយប្រទីប អកអំបុក និងសំពះព្រះខែ”។ សូមអញ្ជើញបងប្អូនប្រពលរដ្ឋរួមទាំងទេចរជាតិ និងអន្តរជាតិចូលរួមកម្សាន្តសប្បាយនៅក្នុងពិធីបុណ្យអុំទូកទាំងនៅក្នុងរាជធានីភ្នំពេញ និងនៅតាមបណ្តាខេត្តនានា។
សូមអាជ្ញាធរមានសមត្ថកិច្ច និងស្ថាប័នពាក់ព័ន្ឋទាំងអស់យកចិត្តទុកដាក់ការពារថែរក្សាសុវត្ថិភាព និងសណ្តាប់ធ្នាប់សាធារណៈជូនបងប្អូនអោយបានល្អនៅក្នុងឱកាសបុណ្យអុំទូកដែលមានរយៈពេល៣ថ្ងៃនេះ។
សូមជូនពរបងប្អូនជនរួមជាតិ និងកូនក្មួយទាំងអស់បានសប្បាយរីករាយ និងជួបតែសំណាងល្អគ្រប់ៗគ្នាកុំបីខាន៕ដោយ៖កូឡាប
