រដ្ឋាភិបាលអាមេរិចបានសម្រេចយល់ព្រមលក់មីស៊ីលឲ្យប្រទេសជប៉ុន ដើម្បីទុកឲ្យជប៉ុនការពារខ្លួនពីការគំរាមកំហែងកាន់តែខ្លាំងឡើងពីកម្មវិធីនុយក្លេអ៊ែរ និងមីស៊ីលរបស់កូរ៉េខាងជើង។ នេះបើតាមការបញ្ជាក់របស់មន្ត្រីក្រសួងការបរទេសអាមេរិចនៅថ្ងៃអង្ការម្សិលមិញនេះ។
ក្រសួងការបរទេសអាមេរិច បានស្នើឲ្យសភាអនុម័តការលក់មីស៊ីលចំនួន ៤ និងបច្ចេកវិទ្យាទាក់ទងផ្សេងៗ ដែលមានតម្លៃជាទឹកប្រាក់ ១៣៣លានដុល្លា។ ប្រភេទមីស៊ីលនេះអាចបាញ់ចេញពីនាវាពិឃាតបាន ឬក៍បាញ់ចេញពីដែនគោកក៏បានដែរ។
មន្ត្រីអាមេរិចបានបញ្ជាក់ថា ការលក់ប្រព័ន្ធការពារមីស៊ីលនេះគឺឆ្លើយតបទៅនឹងការប្តេជ្ញាចិត្តរបស់ប្រធានាធិបតី ដូណាល់ ត្រាំ ដែលប្តេជ្ញាផ្តល់សមត្ថភាពការពារបន្ថែមទៅដល់សម្ព័ន្ធមិត្ត។
សូមរំលឹកផងដែរថា កាលពីខែធ្នូកន្លងទៅនេះ ប្រទេសជប៉ុនបានសម្រេចជាផ្លូវការថា ខ្លួននឹងពង្រឹងប្រព័ន្ធការពារមីស៊ីលរបស់ខ្លួនជាមួយនឹងប្រព័ន្ធរ៉ាដាដែនគោកដែលផលិតនៅអាមេរិច។
ការសម្រេចលក់មីស៊ីលរបស់អាមេរិចឲ្យជប៉ុននេះ កើតឡើងខណៈដែលប្រទេសកូរ៉េខាងជើង និងកូរ៉េខាងត្បូងបានបើកកិច្ចប្រជុំកំរិតខ្ពស់របស់ពួកគេជាលើកដំបូង ក្នុងរយៈពេល ២ឆ្នាំចុងក្រោយនេះ ដោលមានគោលបំណងដោយស្រាយវិបត្តិនុយក្លេអ៊ែររបស់របបព្យុងយ៉ាង៕ សុភ័ក្ត្រ
