សៀមរាប៖ លោកវរសេនីយ៍ឯក ហង្ស សូផាតភីរម្យ នាយការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋានខេត្តសៀមរាប បានឲ្យដឹងនៅរសៀលថ្ងៃទី១១នេះថា ស្ត្រីម្នាក់ជិះឡានក្រុងពីភ្នំពេញដើម្បីលូកហោប៉ៅភ្ញៀវទេសចរណ៍ជាតិនិងអន្តរជាតិនៅកន្លែងអុំទូក មាត់ស្ទឹងសៀមរាប ត្រូវនគរបាលឃាត់ខ្លួនបាន ខណៈកំពុងធ្វើសកម្មភាព។
លោកនាយការិយាល័យបន្តថា ជនសង្ស័យម្នាក់ឈ្មោះគង់ ស្រីយ៉ា ភេទស្រី អាយុ៣០ឆ្នាំ ទីលំនៅភូមិបឹងកក់ សង្កាត់ស្រះចក ខណ្ឌដូនពេញ ក្រុងភ្នំពេញ។ នៅវេលាម៉ោង៤និង២០នាទីទៀបភ្លឺថ្ងៃទី១០ ខែវិច្ឆិកា ឆ្នាំ២០១៩ ឈ្មោះគង់ ស្រីយ៉ា ភេទស្រី បានជិះរថយន្ដក្រុងពីក្រុងភ្នំពេញ មកកាន់ខេត្តសៀមរាប ក្នុងគោលបំណងមកលេងបុណ្យអុំទូកនឹងធ្វើសកម្មភាពលូកហោប៉ៅនៅកន្លែងអុំទូកតាមដងស្ទឹងសៀមរាប លុះដល់វេលាម៉ោង១៧និង១០នាទីថ្ងៃខែឆ្នាំដដែល ឈ្មោះគង់ ស្រីយ៉ា បានមកដល់ខេត្តសៀមរាប ហើយដើរចូលទៅក្នុងកន្លែងតាំងពិព័រណ៍នៅសួនព្រះអង្គចេកព្រះអង្គចម លុះដល់វេលាម៉ោង១៩និង៤០នាទី ឈ្មោះគង់ ស្រីយ៉ា បានធ្វើសកម្មភាពរ៉ួតកាបូប ស្ពាយរបស់ស្ដ្រីម្នាក់តែមិនបានសម្រេច ត្រូវកម្លាំងនគរបាលជំនាញឃើញទាន់ឃាត់ខ្លួនឈ្មោះគង់ ស្រីយ៉ា យកមកសាកសួរ។
ក្រោយពីសាកសួរឈ្មោះគង់ ស្រីយ៉ា បានឆ្លើយសារភាពថា ខ្លួនពិតជាធ្វើសកម្មភាពដូចដែលបានរៀបរាប់ខាងលើពិតប្រាកដមែន។
បច្ចុប្បន្នកម្លាំងនគរបាលព្រហ្មទណ្ឌកម្រិតស្រាល នៃស្នងការដ្ឋានខេត្តសៀមរាប កំពុងរៀបចំសំណុំរឿង បញ្ជូនខ្លួនជនសង្ស័យខាងលើទៅតុលាការ ដើម្បីចាត់ការបន្តតាមផ្លូវច្បាប់ ៕ ដោយ៖កូឡាប