ភ្នំពេញ៖ រោងចក្រកាត់ដេររបស់ថៅកែជនជាតិចិន ស្ថិតនៅក្នុងខណ្ឌដង្កោ ត្រូវបានអគ្គីភ័យលេបត្របាក់អស់ទាំងស្រុង នៅរសៀលថ្ងៃទី១១ខែវិច្ឆិកានេះ។
អធិការរងនគរបាលខណ្ឌដង្កោ លោក សូរ វិសាល បានឱ្យដឹងថា រោងចក្រកាត់ដេរ អេហ្វឃ្វេ ភើហ្វមមេនស៍ (ខេមបូឌា) បានត្រូវភ្លើងឆាបឆេះនៅវេលាម៉ោង ១រសៀលថ្ងៃទី១១ ខែវិច្ឆិកា ហើយលោកថា អគ្គិភ័យនេះកើតចេញពីការផ្ទុះធុងហ្គាស។ ឧប្បត្តិវហេតុនេះ មិនបានបង្កឱ្យបាត់បង់អាយុជីវិតមនុស្សអ្វីទេ ប៉ុន្តែ មានតែជនជាតិចិនម្នាក់រងរបួសដៃបន្តិចដោយសារផ្ទុះហ្គាស។
លោកនុត ពុធដារ៉ា អភិបាលខណ្ឌដង្កោ បានសរសេរសារលើហ្វេសប៊ុកថា នៅថ្ងៃចន្ទ ទី១១ ខែវិច្ឆិកា ឆ្នាំ២០១៩មាន អគ្គីភ័យឆាបឆេះរោងចក្រ អេហ្វឃ្វេ ផលិតអាវពោងហែលទឹក នៅសង្កាត់ព្រៃស ខណ្ឌដង្កោ ចាប់ពីម៉ោង១៣និង១០នាទី រហូតមកដល់យប់ម៉ោង២០និង២០នាទី បានរលត់ស្ទើរទាំងស្រុង ហើយនៅសល់ប្រហែល៥%ទៀតប៉ុណ្ណោះ។
លោកបានថ្លែងថា យើងខ្ញុំសូមគោរពថ្លែងអំណរគុណ យ៉ាងជ្រាលជ្រៅបំផុត ជូនដល់កងកម្លាំងគ្រប់អង្គភាពទាំងអស់ ដែលបានជួយជ្រោមជ្រែង សហការគ្នាយ៉ាងល្អ ជួយពន្លត់ភ្លើងបានទាន់ពេលវេលា ដោយមិនធ្វើឲ្យភ្លើងរាលដាលដល់រោងចក្រផ្សេងៗ នៅជាប់គ្នាតទៅទៀតបានឡើយ។
រោងចក្រខាងលើនេះ មានថៅកែជាជនជាតិចិន ឈ្មោះ Zhou Jianjun ។ រោងចក្រដែលមានទំហំជាង ៧៣០០ម៉ែត្រការ៉េនេះមានកម្មករសរុបជិត ៦០០នាក់៕ដោយ៖កូឡាប