ទឹកទន្លេមួយស្ថិតនៅក្បែរព្រំដែនកូរ៉េខាងត្បូង និងខាងជើងបានប្រែពណ៌ទៅជាឈាម ដោយសារតែការសម្លាប់ជ្រូករាប់រាប់ម៉ឺនក្បាល។
អាជ្ញាធរកូរ៉េខាងត្បូងបានសម្លាប់ជ្រូកចំនួន ៤៧.០០០ក្បាលក្នុងគោលបំណងការពារកុំឲ្យមានការរីករាលដាល នៃជំងឺគ្រុនផ្តាសាយជ្រូក (ASF)។
ដោយសារតែមានភ្លៀងធ្លាក់ខ្លាំង ទើបធ្វើឲ្យឈាមជ្រូកបានហូរចេញពីតំបន់ ដែលគេកប់ជ្រូកនៅក្បែរព្រំដែន ចូលទៅក្នុងដៃទន្លេ Imjin។
អាជ្ញាធរនៅក្នុងតំបន់បានធ្វើការច្រានចោលការព្រួយបារម្ភថា ឈាមជ្រូកដែលហូរចូលទន្លេទាំងនោះ អាចបង្កឲ្យមានការរាតត្បាត នៃជំងឺគ្រុនផ្តាសាយជ្រូក ទៅកាន់សត្វដទៃទៀត ដោយអាជ្ញាធរនិយាយថា ជ្រូកទាំងនោះត្រូវបានគេរម្ងាប់មេរោគរួចទៅហើយ មុនពេលត្រូវគេសម្លាប់។
គ្រុនផ្តាសាយជ្រូកគឺជាជំងឺដែលឆ្លងខ្លាំង និងមិនអាចព្យាបាលបានឡើយ ហើយជ្រូកដែលមានជំងឺនេះ មិនមានអត្រារស់នោះទេ ប៉ុន្តែវាមិនបង្កគ្រោះថ្នាក់ទៅដល់មនុស្សឡើយ។ ការសម្លាប់ជ្រូករាប់ម៉ឺនក្បាលនេះ កើតឡើងកាលពីចុងសប្តាហ៍។
សូមបញ្ជាក់ថា គ្រុនផ្តាសាយជ្រូកត្រូវបានគេរកឃើញដំបូងនៅកូរ៉េខាងត្បូង កាលពីថ្មីៗនេះ ដោយមានការព្យាករណ៍ថា វាមកដល់តាមរយៈសត្វជ្រូក ដែលបានឆ្លងចូលមកពីតំបន់គ្មានកងទ័ព ដែលមានការយាមកាមយ៉ាងតឹង ដែលតំបន់នោះខណ្ឌចែកកូរ៉េខាងទាំងពីរ។
ករណីគ្រុនផ្តាសាយជ្រូកដំបូងកើតឡើង នៅកូរ៉េខាងជើងកាលពីខែឧសភា ហើយអាជ្ញាធរកូរ៉េខាងត្បូងខិតខំយ៉ាងខ្លាំង ដើម្បីការពារជំងឺនោះ រាតត្បាតចូលកូរ៉េខាងត្បូង តាមរយៈរបងព្រំដែន៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC