ភ្នំពេញ៖ផ្តើមចេញពីការយល់ដឹង របស់ប្រជាពលរដ្ឋ និងមានការចូលរួមពី គ្រប់ភាគីពាក់ព័ន្ធ ធ្វើឲ្យការគ្រប់គ្រងសំរាម និងបរិស្ថាន ក្នុងឱកាសព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ឆ្នាំ២០១៩នេះ ទទួលបានលទ្ធផលល្អប្រសើរ សម្រាប់រយៈពេល៣ថ្ងៃ នៃពិធីបុណ្យនេះ។
លោកហួត ហៃ អភិបាលរងរាជធានីភ្នំពេញ ក្នុងឱកាសប្រារព្ធពិធីអបអរសាទរ ទិវាអនាម័យ និងបរិស្ថានជាតិ ២៣វិច្ឆិកា ដែលបានធ្វើឡើងនៅមុខវត្តបទុមវតី នាព្រឹកថ្ងៃទី១៣ វិច្ឆិកានេះ បានវាយតម្លៃថា បុណ្យអុំទូកឆ្នាំនេះ យើងគ្រប់គ្រងសំរាម និងសំណល់ផ្សេងៗ បានល្អដោយសារ មានការចូលរួម និងការយល់ដឹង ពីប្រជាពលរដ្ឋ ក៏ដូចជាការចូលរួមពីផ្នែកពាក់ព័ន្ធ ក្នុងនោះមានយុវជនស្ម័គ្រចិត្ត សហភាពសហព័ន្ធយុវជនកម្ពុជា, អាជ្ញាធរដែនដី និងមានការឃោសនាផ្សព្វផ្សាយជាប្រចាំ របស់រដ្ឋបាលរាជធានីភ្នំពេញ ដើម្បីបង្កើនការយល់ដឹងពីផលប៉ះពាល់បរិស្ថាន និងសោភ័ណភាពទីក្រុង ដោយសារសំរាម។ ជាមួយគ្នានេះ ដោយសារតែការខិតខំប្រឹងប្រែង របស់អាជ្ញាធររាជធានីភ្នំពេញ មានការរៀបចំផែនការច្បាស់លាស់ លើការកែលម្អសោភ័ណភាពទីក្រុង ហេដ្ឋារចនាសម្ព័ន្ធ ជាពិសេសការពង្រឹងសន្តិសុខសណ្តាប់ធ្នាប់ របៀបរៀបរយសាធារណៈបានល្អ ធ្វើឲ្យបងប្អូនប្រជាពលរដ្ឋមកចូលរួម ទស្សនាព្រះរាជពិធីបុណ្យអុំទូកដ៏ច្រើន កុះករនៅមុខព្រះបរមរាជវាំង និងដើរលេងកម្សាន្តតាមរមណីយដ្ឋាននានា បានសប្បាយរីករាយ ដោយមិនមានការព្រួយបារម្ភ និងរីករាយក្នុងសុខសន្តិភាព។
លោកហួត ហៃ បានថ្លែងថា ដើម្បីធានាបាននូវគុណភាពបរិស្ថានសោភ័ណភាពទីក្រុង និងសុខភាពសាធារណៈ យើងចាំបាច់ត្រូវយកចិត្តទុកដាក់ លើកកម្ពស់គ្រប់គ្រងសំណល់រឹងសំរាម ឲ្យបានត្រឹមត្រូវដោយត្រូវចេះវេចខ្ចប់ និងញែកសំរាម ទៅតាមប្រភេទដូចជា សំណល់អាចកែច្នៃបាន សំណល់សរីរាង្គ សំណល់ផ្ទុកសារធាតុគ្រោះថ្នាក់ និងសំណល់ផ្សេងៗ ដើម្បីប្រែក្លាយសំណល់មួយចំនួន ឲ្យមានតម្លៃសេដ្ឋកិច្ច និងកាត់បន្ថយបរិមាណកាកសំណល់ នៅតាមទីលានចាក់សំរាម។ ទិវាអនាម័យបរិស្ថានជាតិ២៣វិច្ឆិកា មានគោលបំណងចលនាឲ្យប្រជាពលរដ្ឋព្រះសង្ឃ កងកម្លាំងប្រដាប់អាវុធ មន្ត្រីរាជការគ្រប់លំដាប់ថ្នាក់ សិស្សនិសិ្សតគ្រប់ភូមិសិក្សា ឲ្យចូលរួមធ្វើអនាម័យ កែលម្អសោភ័ណភាពទីក្រុងទីប្រជុំជនជនបទ ភូមិដ្ឋានវត្តអារាម សាលារៀន មន្ទីរពេទ្យ រោងចក្រ សហគ្រាស ទីផ្សារ សំដៅរួមចំណែកកសាងសង្គមកម្ពុជា ឲ្យមានបរិស្ថានល្អស្អាត និងមានភាពស្រស់បំព្រង។ ការធ្វើអនាម័យនេះ ត្រូវបានបែងចែកជា៩គោលដៅ ដើររើសសំរាមតាមដងផ្លូវ តាមសួនច្បារទីសាធារណៈ ដើម្បីបំផុសស្មារតីប្រជាពលរដ្ឋឲ្យ ចូលរួមលើកកម្ពស់សោភ័ណភាពអនាម័យបរិស្ថាន ទីក្រុង ឲ្យកាន់តែប្រសើរឡើង៕ដោយ៖កូឡាប