កំពង់ឆ្នាំង ៖ ក្មេងស្រីអាយុ៥ឆ្នាំម្នាក់ ត្រូវជនមិនស្គាល់មុខ ចាប់យកទៅរំលោភ រួចសម្លាប់បោះចូល ទៅក្នុងទឹកស្រះ ក្នុងបរិវេណវត្តកងមាស កាលពីវេលាម៉ោងជាង១១យប់ថ្ងៃទី១១ ខែវិច្ឆិកាឆ្នាំ ២០១៩ នៅចំណុចស្រះទឹកមួយកន្លែងស្ថិតក្នុងបរិវេណវត្តកងមាស ក្នុងភូមិកងមាស ឃុំគោកបន្ទាយ ស្រុករលាប្អៀរ ខេត្តកំពង់ឆ្នាំង។
បើតាមក្រុមគ្រួសារកុមារីរងគ្រោះ ដែលបានប្រាប់សមត្ថកិច្ចថា កុមារីរងគ្រោះគឺជាកូនទី៤ នៅមុនពេលកើតហេតុ គឺយប់ថ្ងៃទី ១១ ខែវិច្ឆិកា ឆ្នាំ ២០១៩ដែលជាថ្ងៃពិធីបុណ្យអុំទូក នៅក្នុងវត្តកងមាស បានរៀបចំពិធីបុណ្យអកអំ បុកសំពះព្រះខែ។ ហើយក្នុងវេលាយប់នោះ ឪពុក ម្ដាយ រួមទាំងកូនបីនាក់ទៀត ក៏បានទៅចូលរួមក្នុងពិធីបុណ្យនៅឯវត្ត ដោយទុកឲ្យកូន២នាក់បងប្អូន ជាមួយនិងកុមារីរងគ្រោះ ដេកនៅលើគ្រែក្រោមផ្ទះ។ បន្ទាប់ពីឪពុកម្ដាយត្រឡប់មកពីវត្តវិញ នៅវេលាម៉ោងប្រមាណជាង១១យប់ មិនឃើញកូនស្រីច្បង (កុមារីរងគ្រោះ) ដេកនៅលើគ្រែជាមួយប្អូននោះទេ ក៏មានការភ្ញាក់ផ្អើល និងបាននាំគ្នាដើររកទាំងយប់ នៅគ្រប់ទីកន្លែងតែរកមិនឃើញ ។
ក្រុមគ្រួសារកុមារីរងគ្រោះ បានបន្តថា រហូតដល់ព្រឹកថ្ងៃទី១២ ខែវិច្ឆិកាឆ្នាំ ២០១៩ នេះ ក្រុមគ្រួសារបានរាយការណ៍ ជូនសមត្ថកិច្ចមូលដ្ឋាន ដើម្បីឱ្យជួយស្រាវជ្រាវរក ហើយក្រុមគ្រួសារ និងប្រជាពលរដ្ឋក្នុងភូមិជាច្រើននាក់ ក៏បាននាំគ្នាបន្តដើររក នៅគ្រប់ទីកន្លែងជុំវិញភូមិ និងក្នុងវត្តរហូតដល់ម៉ោង៣រសៀល តែរកពុំឃើញ ។ អ្នកភូមិក៏បាននាំគ្នាចុះក្នុងស្រះមួយកន្លែងស្ថិតក្នុងបរិវេណវត្ត ទើបបានប្រទះឃើញសពកុមារីរងគ្រោះ នៅក្នុងទឹកស្រះនោះ។
សពកុមារីរងគ្រោះត្រូវបានសមត្ថកិច្ចពិនិត្យឃើញ មានស្នាកស្នាមដាច់រហែកប្រដាប់ភេទ និងមានស្នាមជាច្រើនកន្លែង ដែលសមត្ថកិច្ចធ្វើការសន្និដ្ឋានថា ការស្លាប់របស់កុមារីរងគ្រោះ គឺជាករណីចាប់រំលោភសម្លាប់ ហើយដើម្បីបំបិតភស្តុតាង ជនល្មើសបានយកក្មេងស្រីរងគ្រោះទម្លាក់ចូលទៅក្នុងទឹកស្រះ។
សមត្ថកិច្ចកំពុងតែធ្វើការស្រាវជ្រាវ វែកមុខរកជនល្មើស ដើម្បីយកមកផ្ដន្ទាទោសទៅតាមផ្លូវច្បាប់៕ដោយ៖បញ្ញាស័ក្តិ
