ភ្នំពេញ៖ នាព្រឹកថ្ងៃព្រហស្បតិ៍ ទី១៤ ខែវិច្ឆិកា ឆ្នាំ២០១៩នេះ រដ្ឋបាលរាជធានីភ្នំពេញ បានបើកកិច្ចប្រជុំស្ដីពីការសុំច្បាប់ និងបើកការដ្ឋានសាងសង់ស្ពានអាកាសថ្មើរជើងរបស់ក្រុមហ៊ុន Space Media ដែលជាកន្លែងមានភាពមមាញឹកឆ្លងកាត់ ក្នុងរាជធានីភ្នំពេញ ក្រោមអធិបតីភាពលោក ឃួង ស្រេង អភិបាល នៃគណៈអភិបាលរាជធានីភ្នំពេញ។
ជាលទ្ធផលនៃអង្គប្រជុំបានសម្រេច ទទួលយកតាមគម្រោងគំរូប្លង់ សាងសង់របស់ក្រុមហ៊ុន Space Media ដោយតម្រូវឱ្យក្រុមហ៊ុនចុះសិក្សារួមគ្នា ជាមួយមន្ទីរសាធារណការ និងដឹកជញ្ជូនរាជធានីភ្នំពេញ និងមន្ទីររៀបចំដែនដី នគរូបនីយកម្ម សំណង់ និងសុរិយាដី ដើម្បីសាងសង់ស្ពានអាកាសថ្មើរជើងនៅចំណុចផ្លូវប្រសព្វជាបួន (ស្តុបសន្ធរម៉ុក មហាវិថីម៉ៅសេទុង កែងប្រសព្វនឹងមហាវិថីកម្ពុជាក្រោម) ដើម្បីផ្ដល់ភាពងាយស្រួល ដល់សិស្សានុសិស្សឆ្លងកាត់ ដោយថ្មើរជើងទៅមកសាលារៀន និងបញ្ចៀសគ្រោះថ្នាក់ជាយថាហេតុ។
អភិបាលរាជធានីភ្នំពេញ បានជំរុញឲ្យក្រុមហ៊ុនចុះស្ថាបនាស្ពានថ្មើរជើងនៅតំបន់ ផ្សារដើមគរ និងនៅមុខសាលាបឋមសិក្សាសន្ធរម៉ុក ចាប់ពីសប្តាហ៍នេះទៅ ដើម្បីឲ្យទាន់តាមផែនការក្នុងរយៈពេល៦ខែទៀត រួចរាល់ ដែលជួយសម្រួលដល់ការធ្វើដំណើររបស់ ប្រជាពលរដ្ឋនិងសិស្សានុសិស្ស បានឆ្លងកាត់ផ្លូវប្រកបដោយសុវត្ថិភាព ដែលមិនប្រឈម ទៅនឹងបញ្ហាគ្រោះថ្នាក់ចរាចរណ៍ណាមួយកើតឡើងជាយថាហេតុ។
ថ្លែងក្នុងកិច្ចប្រជុំរវាងអាជ្ញាធររាជធានីភ្នំពេញ និងក្រុមហ៊ុនឯកជន នៅព្រឹកថ្ងៃទី១៤ ខែវិច្ឆិកានេះ លោកឃួង ស្រេង អភិបាលរាជធានីភ្នំពេញបានថ្លែងថា ការពន្លឿនស្ថាបនាស្ពានថ្មើរជើងទំាង២កន្លែងនេះ ដោយសារតែមានការគាំទ្រ ពីប្រជាពលរដ្ឋចង់ឲ្យមានការស្ថាបនាឲ្យបានឆាប់។ លោកបានបន្តថា គម្រោងស្ថាបនាស្ពានថ្មើរជើង នៅតំបន់មុខផ្សារ ដើមគរក្រុមមន្រ្តីជំនាញ បានចាប់ផ្តើមស្ថាបនាជាបណ្តើរៗ ហើយដូចជាការកំណត់ទីតំាងការដ្ឋាន ការខួងដីយកទៅពិសោធន៍ និងការដោះស្រាយ ផលប៉ះពាល់ជាមួយប្រជាពលរដ្ឋ។ ចំណែកគម្រោងស្ថាបនាស្ពានថ្មើរជើង នៅត្រង់មុខសាលាបឋមសិក្សាសន្ធរម៉ុកវិញ អាចនឹងចុះកំណត់ទីតំាងស្ថាបនានៅសប្តាហ៍ក្រោយ ដោយសារក្រុមអ្នកជំនាញ ត្រូវការសិក្សាឲ្យបានល្អិតល្អន់បន្ថែមទៀត ព្រោះស្ពានថ្មើរជើងនេះ នៅលើចំណុចផ្លូវប្រសព្វទំាង៤ទិសតែម្តង ដើម្បីបង្កលក្ខណៈងាយស្រួលដល់សិស្សានុសិស្ស បានឆ្លងកាត់ផ្លូវនេះ ដោយសុវត្ថិភាពទោះពួកគេមកពីទិសខាងណាក៏ដោយ។
លោកអភិបាល បានបានអះអាងថា គម្រោងស្ថាបនាស្ពានថ្មើរជើងទំាង២នេះ នឹងស្ថាបនាឡើងឲ្យធានាបានគុណភាពខ្ពស់បំផុត រហូតដល់៥០ឆ្នាំឡើងទៅ ពិសេសការរចនា ជណ្តើរឡើងឲ្យមានភាពងាយស្រួលឡើងចុះ ទំាងកុមារនិងមនុស្សចាស់ ដែលអាចធ្វើដំណើរឆ្លងកាត់បាន។
លោក បានបញ្ជាក់ថា ឯកភាពសិក្សាស្ថាបនាឲ្យលឿនហើយខួងដំណើរការភ្លាម ដើម្បីយើងដោះស្រាយផលប៉ះពាល់បន្ថែម ដើម្បីឈានទៅការសាងសង់ឲ្យបានលឿន ព្រោះជាគម្រោងសាក់ល្បង មិនត្រឹមតែថ្នាក់ដឹកនាំចាំមើលនោះទេ ប្រជាពលរដ្ឋក៏ទន្ទឹងចងបានស្ពានថ្មើរជើងនេះដែរ ដើម្បីជាប្រយោជន៍សម្រាប់អ្នកថ្មើរជើងឆ្លងផ្លូវដោយសុវត្ថិភាព។
តំណាងក្រុមហ៊ុនស្ពេក មេឌៀ ដែលទទួលសិទ្ធិក្នុងស្ពានថ្មើរជើងទំាង២កន្លែង នេះបានសន្យានឹងអនុវត្តផែនការ ស្ថាបនាគ្រោងស្ពានថ្មើរជើងទំាង២កន្លែងនេះឲ្យហើយតាមផែនការកំណត់ ហើយប្រកបដោយគុណភាព និងសោភ័ណភាព ដើម្បីទាក់ទាញប្រជាពលរដ្ឋឲ្យធ្វើដំណើរឆ្លងកាត់ ស្ពានថ្មើរជើងនេះ៕ដោយ៖កូឡាប
