ភ្នំពេញ៖ នៅប្រទេសវៀតណាម នៅក្រុងហាណូយ មានវិធានការបញ្ចប់អាជីវកម្មសាច់សុនខ ត្រឹមឆ្នាំ២០២១ ដោយសារតែប៉ះពាល់ខ្លាំង ដល់វិស័យទេសចរ។ នេះបើតាមការថ្លែងសាររបស់លោកហេង រតនា អគ្គនាយកស៊ីម៉ាក់ នៅថ្ងៃទី១៤ខែវិច្ឆិកា។
លោកហេង រតនា បានថ្លែងថា តាមរបាយការណ៍របស់អង្គការ Animal Rescue Cambodia និងអង្គការFOUR PAWS បានឱ្យដឹងថា អាជីវកម្មសាច់សុនខនៅកម្ពុជា មានរូបភាពលួចលាក់តែមានលក្ខណៈធំទូលាយ និងមានបណ្តាញពាណិជ្ជកម្មជាខែ្សចង្វាក់ ខុសពីកន្លែងសត្តឃាតដទៃទៀត កន្លែងសុនខឃាត គ្មានការត្រួតពិនិត្យខាងអនាម័យ សុខភាពអ្វីនោះទេ ហើយអ្នកបរិភោគសាច់សុនខភាគច្រើនមានអាយុពី១៨-២៩ឆ្នាំ។ តាមរបាយការណ៍នេះ ក៏បង្ហាញឱ្យដឹងថា មានសត្វសុនខមិនតិចជាង២០០.០០០ក្បាលទេ ក្នុងមួយឆ្នាំ សម្រាប់តែតម្រូវការភោជនីយដ្ឋានលក់សាច់សុនខ ជាង១១០ភោជនីយដ្ឋាននៅភ្នំពេញ ហើយក្នុងក្របខ័ណ្ឌទូទាំងប្រទេសអាចតម្រូវការរាប់លានក្បាល។
លោកអគ្គនាយក បានលើកឡើងថា ការព្រួយបារម្ភនៃការរាលដាលកាន់តែធំឡើងៗនៃអាជីវកម្មសាច់សុនខនេះ ដែលអាចមានផលប៉ះពាល់យ៉ាងខ្លាំងដល់ ១- វប្បធម៌ប្រពៃណីខែ្មរដែលស្រឡាញ់សត្វសុនខ និងមានបម្រាមធ្ងន់ធ្ងរខាងទំលៀមទម្លាប់ ចំពោះអ្នកបរិភោគសាច់សុនខ ២- អាចប៉ះពាល់សុខភាពសាធារណ: ដោយសារកង្វះការគ្រប់គ្រងត្រួតពិនិត្យអនាម័យ និងរាតត្បាតជំងឺ ដូចជាជំងឺឆ្កែឆ្កួតជាដើម ៣-ប៉ះពាល់ដល់ទេសចរបរទេសមួយចំនួន។
រាជរដ្ឋាភិបាលតាមរយៈក្រសួងសុខាភិបាល មានផែនការបំបាត់ជំងឺឆ្កែឆ្កួតត្រឹមឆ្នាំ២០៣០ ដូចនេះដើម្បីលើកកម្ពស់ប្រពៃណីទំលៀមទម្លាប់ វប្បធម៌ សីលធម៌សង្គមផង និងដើម្បីសម្រេចបានគោលដៅរបស់រាជរដ្ឋាភិបាលផង យើងគួរត្រូវរួមគ្នាពង្រឹងការផ្សព្វផ្សាយដល់ អ្នកហូបសាច់សុនខត្រូវចៀសវាងហូប អ្នកលក់ដូរអាជីវកម្មសាច់សុនខ ត្រូវគិតគូរមុខរបរផ្សេង អ្នកអនុវត្តច្បាប់ត្រូវរៀបចំច្បាប់ ដើម្បីគ្រប់គ្រងនិងចាត់វិធានការជាដើម។ ល។
សូមជួយគ្នាដើម្បីស្តារនិងពង្រឹង ប្រពៃណី ទំលៀមទម្លាប់ វប្បធម៌យើង! វប្បធម៌ថើ្កនថ្កាន ជាតិរុងរឿង៕ដោយ៖កូឡាប
