ប៉ូលីសបង់ក្លាដេសបានធ្វើការចោទប្រកាន់មនុស្សចំនួន ២៥នាក់ ពាក់ព័ន្ធទៅនឹងការស្លាប់របស់និស្សិតម្នាក់ កាលពីខែតុលាកន្លងទៅ។
និស្សិតប្រុសឈ្មោះ Abrar Fahad ត្រូវបានវាយរហូតដល់ស្លាប់ ដោយនិស្សិតដទៃទៀតជាច្រើននាក់ នៅសកលវិទ្យាល័យ ដ៏ល្បីមួយក្នុងប្រទេសបង់ក្លាដេស ដោយសារតែគាត់បានបង្ហោះសាររិះគន់រដ្ឋាភិបាល នៅលើបណ្តាញទំនាក់ទំនងសង្គម។
ការស្លាប់របស់គាត់បណ្តាលឲ្យមានផ្ទុះការតវ៉ា នៅតាមសកលវិទ្យាល័យទូទាំងប្រទេស។
ប៉ូលីសបញ្ជាក់ថា មនុស្សចំនួន ១១នាក់ដែលរកការចោទប្រកាន់ បានពាក់ព័ន្ធដោយផ្ទាល់ទៅនឹងការសម្លាប់នោះ ខណៈអ្នកផ្សេងទៀតបានរៀបចំផែនការវាយប្រហារ។
និស្សិតជាច្រើនដែលរងការចោទប្រកាន់ គឺជាសមាជិកនៃបណ្តាញយុវជនរបស់សម្ព័ន្ធ Awami ដែលជាគណបក្សកំពុងដឹកនាំរដ្ឋាភិបាលក្នុងប្រទេសបង់ក្លាដេស។
តើមានអ្វីកើតឡើងចំពោះនិស្សិតរងគ្រោះ?
Abrar Fahad គឺជានិស្សិតកំពុងបន្តការសិក្សានៅសកលវិទ្យាល័យ Bangladesh University of Engineering ដែលជាសកលវិទ្យាល័យដ៏ល្បីឈ្មោះមួយនៅក្នុងរដ្ឋធានី Dhaka ប្រទេសបង់ក្លាដេស។
លោកបានធ្វើការរិះគន់លើរដ្ឋាភិបាល ជុំវិញកិច្ចព្រមព្រៀងចែករំលែកទឹក ជាមួយនឹងប្រទេសឥណ្ឌា ដែលការរិះគន់នោះបានបង្ហោះនៅលើបណ្តាញទំនាក់ទំនងសង្គមរបស់លោក។
ប៉ុន្មានថ្ងៃក្រោយពេលបង្ហោះសាររិះគន់រដ្ឋាភិបាល សាកសពរបស់គាត់ត្រូវបានគេប្រទះឃើញ នៅក្នុងអគារស្នាក់នៅសម្រាប់និស្សិត។
សាក្សីបានថ្លែងប្រាប់ BBC ដូច្នេះថា និស្សិតរងគ្រោះត្រូវបានគេទាញគាត់ចេញពីបន្ទប់នៅម៉ោង ៨យប់ និងបានធ្វើការវាយគាត់អស់រយៈពេល ៤ម៉ោងមុនពេលគាត់ស្លាប់។
បើតាមវេជ្ជបណ្ឌិតដែលបានធ្វើកោសល្យវិច័យទៅលើសាកសព បានឲ្យដឹងថា សាកសពជនរងគ្រោះមានស្នាមជាំយ៉ាងខ្លាំង ហើយគាត់គិតថា និស្សិតនោះត្រូវបានគេវាយប្រហារដោយរបស់រឹង។
ការស្លាប់របស់និស្សិតខាងលើ បានធ្វើឲ្យមានការផ្ទុះការតវ៉ាយ៉ាងខ្លាំង នៅក្នុងរដ្ឋធានី ពីសំណាក់និស្សិតសកលវិទ្យាល័យខាងលើ ហើយបន្ទាប់មកបានរាលដាលទៅដល់ទីក្រុងផ្សេងៗទៀត។
ក្រុមអ្នកតវ៉ាបានធ្វើការស្រែកតវ៉ា និងបានបិទផ្លូវ ខណៈអ្នកខ្លះបានទាមទារឲ្យមានការដាក់ទោសប្រហារជីវិតទៅលើជនដៃដល់៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC