ភ្នំពេញ៖ ប្រធានអង្គការសហប្រជាជាតិ ប្រចាំនៅព្រះរាជាណាចក្រកម្ពុជា លោកស្រី ជូលីន ថាម៉េស៊ីស បានមានប្រសាសន៍ថា លោកស្រីមានគោលបំណងចង់ស្វែងយល់ អំពីទស្សនៈវែងឆ្ងាយរបស់រាជធានីភ្នំពេញ ពាក់ព័ន្ធនឹងការរក្សាកំណើន និងការអភិវឌ្ឍរបស់រាជធានីភ្នំពេញ ស្របពេលដែលរាជធានីភ្នំពេញ កំពុងមានការរីកចម្រើនយ៉ាងខ្លាំង នារយៈពេលប៉ុន្មានឆ្នាំចុងក្រោយនេះ។
ការលើកឡើងរបស់លោកស្រី ជូលីន ថាម៉េស៊ីស បានធ្វើឡើងកាលពីព្រឹកថ្ងៃទី១៤ វិច្ឆិកា ក្នុងជំនួបសម្តែងការគួរសម និងពិភាក្សាការងារស្តីពីកិច្ចការ នគរូបនីយកម្ម និងកាលានុវត្តភាព ក្នុងការពង្រឹងកិច្ចសហប្រតិបត្តិការ រវាងរដ្ឋបាលរាជធានីភ្នំពេញ និងអង្គការសហប្រជាជាតិប្រចាំនៅព្រះរាជាណាចក្រ។
លោកស្រី ជូលីន ថាម៉េស៊ីស បានមានប្រសាសន៍ថា ការជួបពិភាក្សានេះ គឺមានគោលបំណងចង់ស្វែងយល់ អំពីទស្សនៈវែងឆ្ងាយ របស់រាជធានីភ្នំពេញ ក្នុងការរក្សាកំណើនអភិវឌ្ឍន៍របស់រាជធានីភ្នំពេញ នៅក្នុងពេលអនាគត។ គោលបំណងទី ២ គឺមានគោលបំណងចង់ជម្រាបដល់លោកអភិបាល នៃគណៈអភិបាលរាជធានីភ្នំពេញ ឲ្យបានដឹងជុំវិញព្រឹត្តិការណ៍ថ្នាក់ជាតិ ដែលគ្រោងប្រារព្ធធ្វើឡើងនៅសណ្ឋាគារសូហ្វីតែល នៅថ្ងៃទី២៧វិច្ឆិកា ខាងមុខនេះ ពាក់ព័ន្ធនឹងនគរូបនីយកម្ម ដែលរៀបចំដោយក្រសួងរៀបចំដែនដី នគរូបនីយកម្ម និងសំណង់ ជាមួយអង្គការសហប្រជាជាតិ។ ដូច្នេះលោកស្រីចង់អញ្ជើញលោកអភិបាលរាជធានីភ្នំពេញ ចូលរួមនៅក្នុងពិធីនេះ ដើម្បីធ្វើបទ អន្តរាគមន៍ពាក់ព័ន្ធនឹងវិស័យនគរូបនីយកម្មនៅក្នុងរាជធានីភ្នំពេញ។
ក្រៅពីការ លើកឡើងខាងលើ លោកស្រីក៏បានលើកឡើង ពីការរីកចម្រើនរបស់រាជធានីភ្នំពេញ ពិសេសលើការទុកដាក់សំរាម ឃើញថាមានលក្ខណៈល្អប្រសើរ ដោយសារតែលោកស្រី បានដើរហាត់ប្រាណនៅលើសួនច្បារ គឺមិនមានសំរាមទេ ។ លោកស្រីក៏បានបង្ហាញពីចំណាប់អារម្មណ៍ មួយចំនួនជុំវិញបញ្ហាសន្តិសុខ ដោយលោកស្រីអាចដើរ ទៅកន្លែងផ្សេងៗ ដោយមិនមានការព្រួយបារម្ភអ្វីឡើយ។
លោកឃួង ស្រេង អភិបាល នៃគណៈអភិបាលរាជធានីភ្នំពេញ នៅក្នុងជំនួបនោះ បានលើកឡើងពីការអភិវឌ្ឍន៍រីកចម្រើន របស់រាជធានីភ្នំពេញ ដោយលោកបញ្ជាក់ថា បច្ចុប្បន្ននេះយើងមានអគារខ្ពស់ៗច្រើន ក្នុងនោះរួមមាន អគារដែលមានកម្ពស់ ៥ ជាន់ទៅ៩ជាន់មានចំនួន៧១៦ អគារ កម្ពស់ ១០ ជាន់ទៅ ១៩ ជាន់មានចំនួន៣៥០ អគារ កម្ពស់២០ទៅ ២៩ជាន់ មានចំនួន ៨២ អគារ កម្ពស់ពី ៣០ជាន់ទៅ ៣៩ ជាន់មានចំនួន ៤០ អគារ អគារដែលមានកម្ពស់ពី ៤០ជាន់ឡើងទៅមានចំនួន២៦ អគារនិងមានបុរីចំនួន២១៨បុរី ។ នេះជាការរីកចម្រើន លើវិស័យនគរូបនីយកម្ម ។ ទន្ទឹមនឹងការឱ្យរីកចម្រើនលើវិស័យ តែរាជធានីភ្នំពេញ ក៏មានបញ្ហាប្រឈមមួយចំនួនផងដែរ ដូចជា បញ្ហាប្រឈមទៅលើបញ្ហាបរិស្ថាន ការកកស្ទះចរាចរ និងកាកសំណល់។ ប៉ុន្តែទោះបីជាយ៉ាងណាក្តីបញ្ហាប្រឈមទាំងនេះ រដ្ឋបាលរាជធានីភ្នំពេញ បាននិងកំពុងធ្វើការដោះស្រាយផងដែរ។
លោកឃួង ស្រេង បានបញ្ជាក់ផងដែរថា ពាក់ព័ន្ធនឹងនគរូបនីយកម្មនេះ រដ្ឋបាលរាជធានីភ្នំពេញ ក្រោមការដឹកនាំរបស់រាជរដ្ឋាភិបាល ដែលមានសម្តេចតេជោហ៊ុន សែនជាប្រមុខ បានធ្វើការប្រទានកម្មដីជូនប្រជាពលរដ្ឋយ៉ាងច្រើន ដូចជាប្រជាពលរដ្ឋរស់នៅលើ ដីសាធារណៈរបស់រដ្ឋ យើងបានប្រទានកម្មជូនពួកគាត់បានជាង៣០០សហគមន៍ និងយើងបានប្រទានកម្មដីឯកជនរបស់រដ្ឋ ជូនពួកគាត់បានចំនួន ១១៦១៤ក្បាលដីនៅរាជធានីភ្នំពេញ ដើម្បីឲ្យមានសិទ្ធិរស់នៅស្របច្បាប់ ហើយការងារនេះ រាជរដ្ឋាភិបាលនឹងប្រទានកម្មដីធ្លី ជូនប្រជាពលរដ្ឋ ឲ្យបានចប់សព្វគ្រប់នៅក្នុងឆ្នាំ២០២១ ដែលនេះបង្ហាញពីការយកចិត្តទុកដាក់ របស់រាជរដ្ឋាភិបាល ចំពោះប្រជាពលរដ្ឋដែលមិនមានផ្ទះសម្បែងស្នាក់នៅ៕ដោយ៖កូឡាប