ខេត្តស្វាយរៀង ៖ អភិបាលក្រុងបាវិត លោកលឹម សៀងហេង បានអញ្ជើញចុះពិនិត្យដល់កន្លែងកើតហេតុ ហើយបានប្រាប់ប្រជាពលរដ្ឋ គណៈកម្មការអាចារ្យវត្តតាពៅ រួមទាំងព្រះសង្ឃឲ្យដាក់បារាស់មួយរយៈដើម្បីបិទផ្លូវមិនឲ្យរថយន្តដឹកដី ធ្វើចរាចរណ៍បំផ្លាញផ្លូវថ្នល់ និងដើម្បីឲ្យអាជ្ញាធរដោះស្រាយរឿងក្រុមហ៊ុនដឹកដី បំផ្លាញផ្លូវសាធារណជាង៦គីឡូម៉ែត្រ នៅក្នុងភូមិចំនួន៤ គឺភូមិប្រសប់ល័ក្ខ ភូមិប្រាសាទ សង្កាត់បាទី និងភូមិច្រកលាវ ភូមិតាពៅ សង្កាត់បាវិត ក្រុងបាវិត។
លោកបានបន្តថា លុះត្រាណាខាងក្រុមអ្នករកស៊ីដឹកដីធ្វើកិច្ចសន្យាថា នឹងធ្វើផ្លូវឲ្យបានស្អាតឡើងវិញ ហើយនិងថែទាំរហូត ទើបអនុញ្ញាតឲ្យធ្វើអាជីវកម្មឡើងវិញ។ ករណីបិទផ្លូវតវ៉ានេះ បានកើតឡើងកាលពីវេលាម៉ោង៧និង៣០នាទីព្រឹកថ្ងៃទី១៣ ខែវិច្ឆិកា ឆ្នាំ២០១៩ នៅត្រង់ចំណុចខាងមុខខ្លោងទ្វារវត្តតាពៅ ភូមិតាពៅ សង្កាត់បាវិត ក្រុងបាវិត។
បើតាមលោកអ៊ឹង អ៊ីម អាយុ៥៧ឆ្នាំ ជាគណៈកម្មការអាចារ្យវត្តតាពៅ ដែលមានទីលំនៅភូមិច្រលាវសង្កាត់បាវិត ក្រុងបាវិត បានឲ្យដឹងថា ប្រជាពលរដ្ឋគណៈកម្មការអាចារ្យវត្ត និងព្រះសង្ឃ បាននាំគ្នាបិទផ្លូវនេះ ដោយមានរថយន្តដឹកដីរាប់សិបគ្រឿង បានដឹកដីធ្វើចរាចរណ៍បណ្ដាលឲ្យខូចផ្លូវប្រវែង៦គីឡូម៉ែត្រក្លាយជារណ្ដៅ និងល្បាប់រអិលខ្លាំងមិនអាចធ្វើដំណើរ បានធ្វើឲ្យប៉ះពាល់ដល់ប្រជាពលរដ្ឋក្នុងការធ្វើដំណើរ ជាពិសេសសិស្សានុសិស្សពិបាកធ្វើដំណើរទៅសាលារៀន និងពេលមានក្រុមគ្រួសារមានជំងឺ ឬស្ត្រីឆ្លងទន្លេនៅពេលយប់ ដើម្បីសង្គ្រោះបន្ទាន់។
កន្លងមកប្រជាពលរដ្ឋ បានដាក់ពាក្យបណ្តឹងទៅលោកចៅសង្កាត់ និងលោកអភិបាលក្រុងបាវិតឲ្យដោះស្រាយ តែពុំឃើញមានអាជ្ញាធរណាអើពើឡើយ ពួកគាត់គ្មានជម្រើស ទើបនាំគ្នាមកដាក់បារាស់បិទផ្លូវមិនឲ្យរថយន្តដឹកដីបើកលើផ្លូវនេះតទៅទៀត និងតវ៉ាដើម្បីឲ្យអាជ្ញាធរចេញមកដោះស្រាយ។
ទាក់ទិនករណីបិទផ្លូវនេះដែរ លោកសាញ់សាខុន ចៅសង្កាត់បាវិតបានឲ្យដឹងថា ពិតជាមានពាក្យបណ្ដឹងរបស់ប្រជាពលរដ្ឋមែន ក៏ប៉ុន្តែសង្កាត់គ្មានលទ្ធភាពដោះស្រាយ ក៏បញ្ជូនទៅឲ្យលោកសេងសិលា អតីតអភិបាលក្រុងបាវិតដោះស្រាយ ក៏ប៉ុន្តែពុំទាន់ទទួលលទ្ធផលធ្វើឲ្យប៉ះពាល់ ការធ្វើដំណើររបស់ប្រជាពលរដ្ឋពិតប្រាកដមែន។
ចំណែកលោកលឹម សៀងហេង អភិបាលក្រុងបាវិត បានមានប្រសាសន៍តាមទូរស័ព្ទថា លោកមិនបានដឹងទេ លោកទើបតែឡើងកាន់តំណែងថ្មី ដូច្នេះចាំលោកចុះទៅពិនិត្យមើល និងដោះស្រាយ។
ទាក់ទិនករណីនេះដែរ លោកប៉ុកតក ប្រធានមន្ទីររ៉ែ និងឋាមពលខេត្តស្វាយរៀង បានប្រាប់អ្នកសារព័ត៌មានតាមទូរស័ព្ទថាៈសព្វថ្ងៃ មាន០៣ក្រុមហ៊ុន ដែលដឹកដីធ្វើចរាចរណ៍ឲ្យខូចផ្លូវ៦គីឡូម៉ែត្រនេះ ក៏ប៉ុន្តែលោកមិនបានចាំថាក្រុមហ៊ុនអ្វីខ្លះទេ ដោយលោកនៅតាមផ្លូវចាំលោកទៅបើកបញ្ជីមើលសិន។ ក្នុងនោះមានក្រុមហ៊ុនសេកពីរកំពុងធ្វើសកម្មភាពជីកស្រះ យកអាចម៌ដីដឹកចេញទៅចាក់លើកជាដីលំនៅឋាន ឬដីសាងសង់នៅក្រុងបាវិត។
ទាក់ទិនករណីនេះដែរ លោកឡុង ញឿន មេការក្រុមហ៊ុនសេកពីរ បានឆ្លើយតាមទូរស័ព្ទថា ក្រុមហ៊ុនសេកពីរ បានទិញដីទំហំ១ហិកតា គឺមានអាជ្ញាប័ណ្ណថ្នាក់ខេត្ត ហើយការជីកដីតាមកំណត់នៃច្បាប់របស់ក្រសួងរ៉ែ និងឋាមពល គឺទុកចំណីស្រះជុំវិញ៥ម៉ែត្រ ជម្រៅលោកមិនបានដឹងទេ ចាំសួរទៅថៅកែ។ ចំណែកប្រជាពលរដ្ឋម្ចាស់ដីស្រែជាប់រណ្ដៅដីក្រុមហ៊ុនសេកពី បានបង្ហាញការព្រួយបារម្ភថា ក្រុមហ៊ុនជីករណ្ដៅដី គឺទុកចំណីច្រាំងរណ្ដៅដី តែ២ទៅ៣ម៉ែត្រប៉ុណ្ណោះ ហើយជីកជ្រៅដល់ក្បាលប្រេតឯណោះ។ នៅរដូវវស្សានេះ មានភ្លៀងធ្លាក់ បានបាក់ច្រាំងរណ្ដៅអស់១ម៉ែត្រទៅហើយយ៉ាងយូរ២ឆ្នាំក្រោយ អាចបាក់ដល់ដីស្រែរបស់គាត់មិនខាន, សូមអាជ្ញាធរ និងមន្ត្រីមន្ទីរពាក់ព័ន្ធចុះទៅពិនិត្យផងទាន។ រហូតដល់ម៉ោង១១និង៣០នាទី លោកលឹមសៀងហេង អភិបាលក្រុងបាវិត បានទៅដល់កន្លែងកើតហេតុ ហើយគាំទ្រឲ្យប្រជាពលរដ្ឋ និងគណៈកម្មការអាចារ្យវត្តរួមទាំងព្រះសង្ឃដាក់បារាស់បិទផ្លូវ ដើម្បីឲ្យក្រុមហ៊ុនដឹកដីចូលខ្លួនដោះស្រាយនៅសាលាក្រុងបាវិត៕ដោយ៖វ៉ៃកូ
