ភ្នំពេញ៖ ស្ថានទូតអាមេរិកប្រចាំកម្ពុជា បានអះអាងថា ការចាប់ខ្លួនអ្នកយកព័ត៌មានរបស់វិទ្យុអាស៊ីសេរីចំនួន ២ រូប គឺលោក អួន ឈិន និងលោក យាង សុធារិន នៅកម្ពុជា។ ការចាប់ខ្លួន ការឃុំខ្លួនដ៏យូរ និងដំណើរការកាត់ក្តីដែលអូសបន្លាយវែង នៃអ្នកសារព័ត៌ទាំងពីររូបនេះ ដែលកំពុងបំពេញការងាររបស់គេ បំផ្លាញសេរីភាពសារព័ត៌មាន ។
លោក គឹម សន្តិភាព រដ្ឋលេខាធិការ និងជាអ្នកនាំពាក្យក្រសួងយុត្តិធម៌ នៅថ្ងៃទី១៤ ខែវិច្ឆិកា ឆ្នាំ២០១៩នេះ បានថ្លែងថា ការទម្លាក់ ឬមិនទម្លាក់ចោលការចោទប្រកាន់របស់តុលាការគឺអាស្រ័យលើលទ្ធផលនៃការស៊ើបសួរ ទៅលើអង្គហេតុ និងភស្តុងតាង។
បន្ទាប់ពីស្ថានទូតអាមេរិកប្រចាំកម្ពុជា បានបង្ហោះសារលើ Facebook ដោយទាមទារឲ្យទម្លាក់ការចោទប្រកាន់ ទៅលើអតីតអ្នកយកព័ត៌មានរបស់វិទ្យុអាស៉ីសេរី ចំនួន២រូប នោះ លោក គឹម សន្តិភាព អ្នកនាំពាក្យ និងជារដ្ឋលេខាធិការក្រសួងយុត្តិធម៌ បានបញ្ជាក់ថា៖ ការទម្លាក់ ឬមិនទម្លាក់ចោលការចោទប្រកាន់ជាឆន្ទានុសិទ្ឌិរបស់តុលាការ ដោយផ្អែកតាមលទ្ធផលនៃការស៊ើបសួរ លើអង្គហេតុ និងភស្តុតាងស្របតាមស្មារតីនៃច្បាប់កម្ពុជា ហេតុនេះសូមភាគីពាក់ព័ន្ធនៃសំណុំរឿងប្រើប្រាស់សិទ្ធិការពារខ្លួន ដែលមានចែងក្នុងច្បាប់ ដើម្បីជាប្រយោជន៍របស់ខ្លួន ដោយបង្ហាញភាពស្អាតស្អំរបស់ខ្លួននៅចំពោះមុខតុលាការ។
ស្ថានទូតអាមេរិកប្រចាំកម្ពុជា នៅព្រឹកថ្ងៃទី១៤ ខែវិច្ឆិកា ឆ្នាំ២០១៩នេះ បានថ្លែងសារថា ថ្ងៃនេះគឺជាថ្ងៃខួបលើកទី២ នៃការចាប់ខ្លួនអ្នកយកព័ត៌មានរបស់វិទ្យុអាស៉ីសេរីចំនួន ២រូប គឺលោក អួន ឈិន និងលោក យាង សុធារិន នៅកម្ពុជា។ ការចាប់ខ្លួន ការឃុំខ្លួនដ៏យូរ និងដំណើរការកាត់ក្តីដែលអូសបន្លាយវែង នៃអ្នកសារព័ត៌ទាំងពីររូបនេះ ដែលកំពុងបំពេញការងាររបស់គេ បំផ្លាញសេរីភាពសារព័ត៌មាន ហើយធ្វើមិនឲ្យអ្នកដទៃទៀតចង់ធ្វើការងារដ៏សំខាន់ផ្នែកសារព័ត៌មាន។ការទម្លាក់ចោលការចោទប្រកាន់ទៅលើអ្នកសារព័ត៌មានទាំង ២ រូបនេះ ហើយផ្តល់ឲ្យពួកគេវិញនូវសិទ្ធិនិងសេរីភាពពេញលេញរបស់គេនឹងកែតម្រូវឡើងវិញនូវអំពើអយុត្តិធម៌ គោរពតាមរដ្ឋធម្មនុញ្ញនៃប្រទេសកម្ពុជា ហើយជាសញ្ញានៃការប្តេជ្ញាចិត្តចាំបាច់ចំពោះតួនាទីដ៏មានសារៈសំខាន់នៃប្រព័ន្ធផ្សព្វផ្សាយឯករាជ្យ នៅក្នុងប្រទេសប្រជាធិបតេយ្យ។
លោក អ៊ួន ឈិន និង លោក យាង សុជាមេត្តា ត្រូវបានសមត្ថកិច្ចចាប់ខ្លួន កាលពីថ្ងៃទី១៤ ខែវិច្ឆិកា ឆ្នាំ២០១៧ ដោយចោទប្រកាន់ពីបទ ប្រគល់ឲ្យរដ្ឋបរទេសនូវព័ត៌មានជាអាទិ៍។ អ្នកទាំងពីរត្រូវបានតុលាការឃុំខ្លួនក្នុងពន្ធនាគារនៅក្នុងពន្ធនាគារជិត១ឆ្នាំ បន្ទាប់មកត្រូវបានតុលាការដោះលែងឱ្យនៅក្រៅឃុំ នៅថ្ងៃទី២១ ខែសីហា ឆ្នាំ២០១៨៕ ដោយ៖កូឡាប