បុរសវ័យ ៧០ឆ្នាំម្នាក់បានស្លាប់បាត់បង់ជីវិត នៅក្នុងទីក្រុងហុងកុង ក្រោយពេលរងការវាយប្រហារលើក្បាលដោយវត្ថុរឹង ក្នុងអំឡុងការប៉ះទង្គិចគ្នារវាងអ្នកគាំទ្ររដ្ឋាភិបាល និងក្រុមអ្នកតវ៉ា។
មន្រ្តីហុងកុងនិយាយថា បុរសរងគ្រោះកំពុងតែសម្រាករកអាហារពេលថ្ងៃត្រង់ហូប ហើយគាត់ធ្វើការងារជាអ្នកសម្អាត។ គាត់ត្រូវរងការវាយទៅលើក្បាល ដោយវត្ថុរឹងដែលគប់ដោយកុប្បករពាក់ម៉ាស់។
ការប៉ះទង្គិចគ្នាដែលបណ្តាលឲ្យមានអ្នកស្លាប់នេះ កើតឡើងខណៈពេលដែលប្រធានាធិបតីចិន ស៊ី ជីនពីង បាននិយាយថា “ប្រព័ន្ធប្រទេសមួយ ប្រព័ន្ធដឹកនាំពីរកំពុងតែប្រឈមបញ្ហា”។
កាលពីជិតមួយសប្តាហ៍កន្លងទៅដែរ និស្សិតហុងកុងម្នាក់ឈ្មោះ Alex Chow វ័យ ២២ឆ្នាំ បានស្លាប់ ក្រោយពេលធ្លាក់ពីលើអគារ កំពុងមានប្រតិបត្តិការបង្រ្កាបរបស់ប៉ូលីសហុងកុង។
សូមបញ្ជាក់ថា ទីក្រុងហុងកុងបានត្រូវញាំញីដោយបាតុកម្មអស់រយៈពេលជាង ៥ខែមកហើយ ដែលការផ្ទុះបាតុកម្មដំបូងកើតឡើងដោយសារតែ ច្បាប់ធ្វើបត្យាប័នដែលមានការអនុញ្ញាត ឲ្យមានការបញ្ជូលជនសង្ស័យទៅធ្វើការកាត់ទោសនៅចិនបាន។
ទោះបីច្បាប់នេះ ត្រូវបានមេដឹកនាំហុងកុង គឺអ្នកស្រី Carrie Lam ប្រកាសបោះបង់ចោលក្តី ក៏ក្រុមបាតុករនៅមិនទាន់សុខចិត្ត ព្រោះពួកគេនៅទាមទារឲ្យរដ្ឋាភិបាល អនុវត្តចំណុចមួយចំនួនទៀត។
ហុងកុង ត្រូវបានអង់គ្លេសប្រគល់ឲ្យចិនកានកាប់វិញក្នុងឆ្នាំ ១៩៩៧ ក្រោមកិច្ចព្រមព្រៀង ប្រទេសមួយ ប្រព័ន្ធដឹកនាំពីរ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC