ភ្នំពេញ៖ រដ្ឋាភិបាលអូស្ត្រាលី នឹងបន្តប្តេជ្ញាជួយដល់កម្ពុជាបោសសម្អាតមីនមនុស្សធម៌ និងការអភិវឌ្ឍនៅកម្ពុជា។ ខណៈការងារបោសសម្អាតមីនមនុស្សធម៌នៅកម្ពុជា អាចដំណើរការពេញលេញ បន្ទាប់ពីកម្ពុជា បានបញ្ចប់នូវសង្គ្រាមដែលអូសបន្លាយរាប់ទសវត្សរ៍ និងទទួលបាននូវសុខសន្តិភាព។
នៅ ថ្ងៃទី១៥ ខែវិច្ឆិកា ឆ្នាំ២០១៩ លោកទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានអញ្ជើញជាអធិបតី ក្នុងពិធីចុះហត្ថលេខាលើសេចក្តីថ្លែងការណ៍ត្រីភាគី នៃការប្តេជ្ញាចិត្តរួមគ្នាឆ្ពោះទៅរកប្រទេសកម្ពុជាដែលគ្មានមីន រវាងអាជ្ញាធរមីន អង្គការ UNDP និងប្រទេសអូស្ត្រាលី សម្រាប់គម្រោងបោសសម្អាតមីនដើម្បីលទ្ធផលដំណាក់កាលទី៤ ២០២០-២០២៥ (Clearing For Results, Phase IV)។
លោកទេសរដ្ឋមន្ត្រី បានបញ្ជាក់ថា ក្រោមការដឹកនាំរបស់អាជ្ញាធរមីន ដោយមានការគាំទ្រផ្នែកបច្ចេកទេសពីអង្គការ UNDP រដ្ឋាភិបាលអូស្ត្រាលី គឺជាដៃគូដ៏យូរអង្វែង និងមានសារៈសំខាន់មួយក្នុងការងារមនុស្សធម៌ និងការងារអភិវឌ្ឍន៍ ដែលបានចូលរួមក្នុងគម្រោងបោសសម្អាតមីនដើម្បីលទ្ធផល របស់រាជរដ្ឋាភិបាលកម្ពុជា។
ឆ្លៀតក្នុងឱកាសនោះ លោកស្រី Angela Corcoran ឯកអគ្គរដ្ឋទូតអូស្ត្រាលីប្រចាំនៅព្រះរាជាណាចក្រកម្ពុជា បានបញ្ជាក់ថា ការងារសកម្មភាពមីន គឺជាការងារអាទិភាពមួយរបស់រដ្ឋាភិបាលអូស្ត្រាលី ដែលអូស្ត្រាលីបានចូលរួមការងារបោសសម្អាតមីនមនុស្សធម៌នៅកម្ពុជាចាប់តាំងពីឆ្នាំ២០០៦ មកម្លេះ។ លោកស្រី Angela Corcoran បានអះអាងថា រដ្ឋាភិបាលអូស្ត្រាលី នឹងបន្តប្តេជ្ញាជួយដល់កម្ពុជាបោសសម្អាតមីនមនុស្សធម៌ និងការអភិវឌ្ឍនៅកម្ពុជា។ ជាមួយគ្នា លោកជំទាវ Angela Corcoran បានបញ្ជាក់បន្ថែមថា រដ្ឋាភិបាលអូស្ត្រាលី នឹងបន្តកិច្ចសហប្រតិបត្តិការជាមួយរាជរដ្ឋាភិបាលកម្ពុជា ក្នុងការផ្តល់សច្ចាប័នទៅលើអនុសញ្ញាស្តីទីការហាម ការប្រើប្រាស់ ការរក្សាទុក ការផលិត និងការផ្ទេរគ្រាប់មីនប្រឆាំងមនុស្ស និងការបំផ្លាញគ្រាប់មីន។
ក្នុងនាម សម្តេចតេជោ នាយករដ្ឋមន្ត្រី និងជាប្រធានអាជ្ញាធរមីន លោកទេសរដ្ឋមន្ត្រី បានថ្លែងអំណរគុណប្រកបដោយការកោតសសើរ និងវាយតម្លៃខ្ពស់ ចំពោះការប្រទេសអូស្ត្រាលី និងអង្គការ UNDP ក៏ដូចជាប្រទេសម្ចាស់ជំនួយដទៃទៀត ដែលបានចូលរួមជាមួយរាជរដ្ឋាភិបាលកម្ពុជា ក្នុងការកាត់បន្ថយភាពក្រីក្រ ការជួយសង្គ្រោះជនរងគ្រោះ និងលើកកម្ពស់ជីវភាពរស់នៅរបស់ប្រជាពលរដ្ឋនៅតាមជនបទ តាមរយៈការងារបោសសម្អាតមនុស្សធម៌នៅកម្ពុជា។ ទន្ទឹមនឹងនោះ លោក ទេសរដ្ឋមន្ត្រី បានបញ្ជាក់បន្ថែមថា ដោយមានការយកចិត្តទុកដាក់ជាខ្លាំងពីរាជរដ្ឋាភិបាលកម្ពុជា វិស័យសកម្មភាពមីន ត្រូវបានគាំទ្រយ៉ាងខ្លាំងក្លា និងដាក់បញ្ចូលក្នុង ផែនការយុទ្ធសាស្ត្រអភិវឌ្ឍន៍ជាតិ ២០១៩ ២០២៣ ផងដែរ។
លោក ទេសរដ្ឋមន្ត្រី លី ធុជ បានជម្រាបជូនដល់់ដៃគូអភិវឌ្ឍន៍ និងប្រទេសម្ចាស់ជំនួយថា ការងារបោសសម្អាតមីនមនុស្សធម៌នៅកម្ពុជា អាចដំណើរការពេញលេញ បន្ទាប់ពីកម្ពុជា បានបញ្ចប់នូវសង្គ្រាមដែលអូសបន្លាយរាប់ទសវត្សរ៍ និងទទួលបាននូវសុខសន្តិភាព ក្រោមការដឹកនាំដ៏ខ្ពង់ខ្ពស់របស់ សម្តេចតេជោនាយករដ្ឋមន្ត្រី ហើយសុខសន្តិភាពនេះ ពិតជាមានតម្លៃខ្លាំងណាស់សម្រាប់ប្រជាជនកម្ពុជា ក៏ដូចជាសម្រាប់ការអភិវឌ្ឍ និងការស្តារឡើងវិញរបស់ប្រទេសជាតិ ផងដែរ។ ការងារបោសសម្អាតមីន ត្រូវបានចូលរួមចំណែកយ៉ាងសំខាន់ក្នុងកិច្ចគាំពារដល់សន្តិភាព និងការអភិវឌ្ឍ។
ចាប់ពីឆ្នាំ ២០០៦-២០១៩ តាមរយៈ គម្រោងបោសសម្អាតមីនដើម្បីលទ្ធផលបីដំណាក់កាលដំបូង ការបោសសម្អាតមីន បានរំដោះផ្ទៃដីទំហំប្រមាណ ២៣៩ គីឡូម៉ែត្រក្រឡា និងចំណាយថវិកាប្រមាណ ៦៤ លានដុល្លារអាមេរិក៕ដោយ៖កូឡាប