សហរដ្ឋអាមេរិចបានធ្វើការថ្កោលទោសការប្រើប្រាស់កងកម្លាំងមិនត្រឹមត្រូវ នៅក្នុងទីក្រុងហុងកុង និងបានធ្វើការស្នើឲ្យទីក្រុងប៉េកាំង ឲ្យការពារសេរីភាពរបស់ហុងកុង។ នេះបើតាមការបញ្ជាក់របស់មន្រ្តីជាន់ខ្ពស់ របស់រដ្ឋបាលរបស់លោកប្រធានាធិបតីដូណាល់ ត្រាំ នៅថ្ងៃអាទិត្យម្សិលមិញនេះ។
“ពួកយើងថ្កោលទោសចំពោះការប្រើប្រាស់កងកម្លាំងដែលមិនត្រូវ និងជំរុញឲ្យភាគីទាំងអស់អត់ធ្មត់ និងទប់ទល់កុំឲ្យមានអំពើហឹង្សា និងចូលរួមក្នុងការចរចា”។ នេះជាការបញ្ជាក់របស់មន្រ្តីអាមេរិច។
“ដូចដែលលោកប្រធានាធិបតីដូណាល់ ត្រាំបានលើកឡើងថា អាមេរិចរំពឹងថាទីក្រុងប៉េកាំង នឹងផ្តល់តម្លៃចំពោះការប្តេជ្ញាចិត្តរបស់ខ្លួន ចំពោះសេចក្តីប្រកាសស៊ីណូអង់គ្លេស (Sino-British Declaration) និងការពារសេរីភាព ប្រព័ន្ធច្បាប់ និងជីវិតរស់នៅបែបប្រជាធិបតេយ្យរបស់ហុងកុង”។
សូមបញ្ជាក់ថា នៅថ្ងៃច័ន្ទនេះ ប៉ូលីសហុងកុងបានធ្វើការរារាំង និងខ្ទប់អ្នកតវ៉ារាប់រយនាក់នៅសកលវិទ្យាល័យមួយ បន្ទាប់ពីមានការប្រឈមមុខដាក់គ្នាអស់រយៈពេល ដែលបង្កឲ្យមានការព្រួយបារម្ភថា នឹងមានការបង្ហូរឈាមដាក់គ្នា៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia