តាកែវ៖ មន្រ្តីជំនាញកាំកុងត្រូលខេត្តតាកែវ បានធ្វើការអះអាងថា ក្រុមអាជីវករភាគច្រើន គឺពួកគាត់បានយល់ដឹងកាន់តែច្រើន អំពីសុវត្ថិភាពចំណីអាហារ ដោយដាក់លក់ទំនិញ និងចំណីអាហារដែលមានអនាម័យត្រឹមត្រូវ និងរកពុំឃើញសារធាតុគីមី នៅលើចំណីអាហារដូចមុននោះទេ ។
ថ្លែងប្រាប់អ្នកសារព័ត៌មាន បន្ទាប់ពីបានបញ្ចប់ការត្រួតពិនិត្យទំនិញ និងចំណី អាហារ ជាច្រើនមុខ នៅក្នុងផ្សារតាកែវ ដែលស្ថិតនៅទីរួមខេត្តតាកែវ នាព្រឹកថ្ងៃចន្ទ ទី១៨ ខែវិច្ឆិកា ឆ្នាំ២០១៩នេះ លោក ប៉ោ លាងគង់ ប្រធានសាខាកាំកុងត្រូលខេត្ត បានមានប្រសាសន៍ថា នៅក្នុងការចុះត្រួតពិនិត្យទំនិញនេះ មន្រ្តីជំនាញរបស់យើងបានធ្វើតេស្តបឋមទៅលើចំណីអាហារមួយចំនួនធំ ធ្វើតេស្តរកជាតិអ៊ីយ៉ូតលើអំបិល និងពិនិត្យទៅលើគ្រឿងកំប៉ុងឃើញថា មានភាពត្រឹមត្រូវច្រើន ពោលគឺរកពុំមានសារធាតុគីមី និងទំនិញហួសកាលបរិច្ឆេទអ្វីឡើយ ព្រោះតែពេលនេះពួកគាត់មានការយល់ដឹងច្រើនអំពីសុវត្ថិភាព និងគិតគូរអំពីសុខភាពរបស់អ្នកទិញ ពិសេសតាមរយៈការចុះមកត្រួតពិនិត្យជាប់ជាប្រចាំ ក៏ដូចជាការអប់រំណែនាំបន្ថែមពីមន្រ្តីជំនាញកាំកុងត្រូល ។
លោក ប៉ោ លាងគង់ បន្ថែមទៀតថា សុវត្ថិភាពចំណីអាហារនេះ វាពិតជាសំខាន់ខ្លាំងណាស់ សម្រាប់មនុស្សទូទៅ ព្រោះបើកាលណាក្រុមអាជីវករ ពួកគាត់បានដាក់លក់ទំនិញ និងចំណីអាហារដែលមានអនាម័យល្អត្រឹមត្រូវ និងគ្មានសារធាតុគីមី វានឹងឲ្យអ្នកបរិភោគ មានសុខភាពល្អរឹងមាំ ជៀសផុតពីជំងឺផ្សេងៗ ដូច្នោះបញ្ហាសុវត្ថិភាពចំណីអាហារនេះ ក្នុងនាមយើងជាមន្រ្តីជំនាញកាំកុងត្រូល គឺនៅតែចុះត្រួតពិនិត្យទំនិញនៅលើទីផ្សារជាប់ជាប្រចាំ ពោលគឺមិនឲ្យទីផ្សាររបស់យើងពោរពេញទៅដោយអាហារគីមី និងទំនិញមិនស្អាតល្អនោះទេ ។
បើតាម លោក ប៉ោ លាងគង់ តួយ៉ាងការធ្វើតេស្តទៅលើអំបិលដើម្បីរកសារធាតុអ៊ីយ៉ូត ក៏ក្រុមហ៊ុនបានភ្ញាក់រលឹក ហើយដាក់សារធាតុអ៊ីយ៉ូតនេះ នៅក្នុងអំបិលរបស់ខ្លួនផងដែរ ខុសពីលើកមុន ដែលមន្រ្តីជំនាញយើងបានធ្វើតេស្តរកជាតិអ៊ីយ៉ូតនៅក្នុងអំបិល ប៉ុន្តែរកពុំឃើញមានជាតិអ៊ីយ៉ូតនៅក្នុងអំបិល ដែលនេះបង្ហាញឲ្យឃើញថា ទាំងម្ចាស់ក្រុមហ៊ុនធំៗ និងក្រុមអាជីវករ បានចូលរួមសហការនឹងមន្រ្តីជំនាញកាំកុងត្រូល ក្នុងការលក់ទំនិញ ឬចំណីអាហារ ដែលមានសុវត្ថិភាព ល្អត្រឹមត្រូវ នៅលើទីផ្សារ៕ ដោយ៖តាកែវ
