ភ្នំពេញ៖ កិច្ចព្រមព្រៀងគម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ ភាគខាងត្បូង (ព្រែកក្តាម-ធ្លាម្អម) ដែលជាគម្រោងឥណទានសម្បទានពីរដ្ឋាភិបាលជប៉ុនតាមរយៈ ទីភ្នាក់ងារសហប្រតិបត្តិការអន្តរជាតិ ជប៉ុន ប្រចាំនៅកម្ពុជា (JICA) ត្រូវបានធ្វើឡើងនៅព្រឹកថ្ងៃពុធ ទី១០ ខែមករា ឆ្នាំ២០១៨ នៅក្រសួងសាធារណការ និងដឹកជញ្ជូន ដែលលោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រី ក្រសួងសាធារណការនិងដឹកជញ្ជូនបានអញ្ជើញ ជាអធិបតី។
គម្រោងសាងសង់នេះ គឺក្រុមហ៊ុនសាងសង់ចំនួន២ ត្រូវបានជ្រើសរើស ក្នុងនោះមាន៖ កញ្ចប់ការងារទី១និងទី២ (CP-1&2): បានទៅសម្ព័ន្ធក្រុមហ៊ុន Sumitomo Mitsui Construction Co., ltd and World Kaihatsu Kogyo Co., ltd Joint Venture- កញ្ចប់ការងារទី៣ (CP-3): បានទៅក្រុមហ៊ុន Hanshin Engineering and Construction Co., ltd ។
លោកទេសរដ្ឋមន្ត្រី បានបញ្ជាក់ថា ការសាងសង់ដោយក្រុមហ៊ុនម៉ៅការសាងសង់ នឹងត្រូវអនុវត្តស្របតាមបទដ្ឋានបច្ចេកទេសសាងសង់ត្រឹមត្រូវដើម្បីធានាគុណភាពរឹងមាំ និងការប្រើប្រាស់បានជាប់បានយូរ។
គួរបញ្ជាក់ផងដែរថា គម្រោងធ្វើឲ្យប្រសើរឡើងវិញកំណាត់ផ្លូវជាតិលេខ៥ ពីព្រែក្តាម រហូតដល់ប៉ោយប៉ែតក្រោមឥណទានសម្បទានពីរដ្ឋាភិបាលជប៉ុនតាមរយៈទីភ្នាក់ងារសហប្រតិបត្តិការអន្តរជាតិជប៉ុន ត្រូវបានបែងចែកជាបីកំណាត់រួមមាន៖ ១) កំណាត់ផ្លូវជាតិលេខ៥ ភាគខាងជើង (បាត់ដំបង សិរីសោភ័ណ) មានប្រវែង៨៤,៧៤គីឡូម៉ែត្រ ដែលបាននិងកំពុងអនុវត្តក្រោមកញ្ចប់សាងសង់ចំនួនពីរ ហើយនឹងចំណាយទឹកប្រាក់សាងសង់ប្រមាណ ១៤៣,០៤លានដុល្លារអាមេរិក ដោយប្រើរយៈពេលសាងសង់៣ឆ្នាំ។ បច្ចុប្បន្នគម្រោងនេះបាននិងកំពុងដំណើរការសាងសង់ ហើយសម្រេចបាន ៨,៤៦ភាគរយ នៃផែនការ គិតត្រឹមថ្ងៃទី៥ខែមករាឆ្នាំ២០១៨។ ២) កំណាត់ផ្លូវជាតិលេខ៥ ភាគខាងត្បូង (ព្រែកក្តាម ឆ្លាម្អម) មានប្រវែង ១៣៥,២៥ គីឡូម៉ែត្រ នឹងត្រូវអនុវត្តក្រោមកញ្ចប់សាងសង់ចំនួន៣ និងចំណាយទឹកប្រាក់សាងសង់ប្រមាណ ២៤៦,៣៥លានដុល្លារអាមេរិក និងត្រូវការរយៈពេល៤ឆ្នាំ សម្រាប់ដំណើរការសាងសង់។ ៣)កំណាត់ផ្លូវជាតិលេខ៥ ភាគកណ្តាល និងបញ្ចប់ (ឆ្លាម្អម បាត់ដំបង់ និងសិរីសោភ័ណ ប៉ោយប៉ែត) មានប្រវែងសរុប ១៤៦,០៤គីឡូម៉ែត្រ ដែលបានបញ្ចប់ការសិក្សាលម្អិតរួចរាល់ហើយ នឹងត្រៀមដាក់ឲ្យដេញថ្លៃសាងសង់ក្នុងពេលឆាប់ៗខាងមុខនេះផងដែរ។
បើតាមលោករដ្ឋមន្ត្រី ស៊ុន ចាន់ថុល វិសាលភាពនៃគម្រោងធ្វើឲ្យប្រសើរឡើងវិញកំណាត់ផ្លូវជាតិលេខ៥ ពីព្រែកក្តាម រហូតដល់ប៉ោយប៉ែត រួមមាន ៖ ការពង្រីកកំណាត់ផ្លូវជាតិដែលមានស្រាប់ពី ២គន្លងទៅ៤គន្លង មានទទឹងសរុប២៣ម៉ែត្រ មានប្រវែងសរុប៣០៤គីឡូម៉ែត្រ ដោយក្រាលជំនួសដោយកៅស៊ូ AC (Asphalt Concrete) និងមានសួនច្បារកណ្តាល។ ការសាងសង់ផ្លូវវាងក្រុងសរុបចំនួន៥ខ្សែ មានប្រវែងសរុប៦២គីឡូម៉ែត្រ មាន៤គន្លង មានទទឹង២៣ម៉ែត្រនិងមានសួនកណ្តាល។ ការសាងសង់ឡើងវិញ ការពង្រីកស្ពានចាស់ និងការសាងសង់ស្ពានថ្មីដែលស្ថិតក្នុងកំណាត់ផ្លូវជាតិលេខ៥មានចំនួនសរុប៨០កន្លែង។
ក្នុងឱកាសនោះដែរ លោទេសរដ្ឋមន្ត្រី បានបញ្ជាក់ថា ផ្លូវជាតិលេខ៥នេះ មានសារសំខាន់ណាស់សម្រាប់ ការដឹកជញ្ជូននៅក្នុងស្រុកក៏ដូចជា ការតភ្ជាប់វិស័យដឹកជញ្ជូនក្នុងបណ្តាប្រទេសជាសមាជិកអាស៊ាននិងមហាអនុតំបន់មេគង្គ និងត្រូវបានចាត់ទុកថាជាផ្នែកមួយនៃផ្លូវអាស៊ានហាយវេលេខ១ ប្រចាំតំបន់អាស៊ី។ ការធ្វើឲ្យប្រសើរឡើងវិញផ្លូវជាតិលេខ៥ ត្រូវបានរំពឹងថា នឹងជួយបង្កើនសមត្ថភាពដឹកជញ្ជូនទាំងនៅក្នុងស្រុក និងនៅក្នុងបណ្តាប្រទេសជាសមាជិកអាស៊ាន ឲ្យកាន់តែប្រសិទ្ធភាព ដោយនឹងរួមចំណែកក្នុងការអភិវឌ្ឍសេដ្ឋកិច្ចរបស់កម្ពុជាយើងផងដែរ៕ ដោយ៖កូឡាប
