ខេត្តស្វាយរៀងៈ លោក រស់ ផារិទ្ធ អភិបាលរងខេត្តស្វាយរៀង នៅថ្ងៃទី១៨ ខែវិច្ឆិកា ឆ្នាំ ២០១៩នេះបានអញ្ជើញជាអធិបតី នៅក្នុងសិក្ខាសាលាសមាហរណកម្ម កម្មវិធីវិនិយោគបីឆ្នាំរំកិល២០២០ -២០២២របស់ រដ្ឋបាលស្រុកចន្ទ្រា។
ពិធីនេះក៏មានការអញ្ជើញចូលរួមពី លោក លោកស្រី ប្រធាន អនុប្រធានមន្ទីរ-អង្គភាពនានាក្នុងខេត្ត លោកនាយករងទីចាត់ការផែនការវិនិយោគខេត្ត លោក គង់ វស្សា ប្រធានប្រឹក្សាស្រុក លោក ថន ថាវុទ្ទា អភិបាលស្រុក លោក លោកស្រី អភិបាលរងស្រុក លោកនាយករងរដ្ឋបាលសាលាស្រុក លោកលោកស្រីប្រធាន អនុប្រធានការិយាល័យទាំង៣ និងអង្គភាពលទ្ធកម្មចំណុះសាលាស្រុកលោក លោកស្រីប្រធានការិយាល័យនានាជុំវិញស្រុក លោក លោកស្រី ក្រុមប្រឹក្សាឃុំ ស្មៀនឃុំទាំង៦ និងមន្ត្រីពាក់ព័ន្ធ សរុបចំនួន៦១នាក់ ។
លោក អភិបាលរងខេត្ត បានមានប្រសាសន៍ថ្លែងនូវការកោតសរសើរ ចំពោះអាជ្ញាធរពាក់ព័ន្ធ ដែលកន្លងមកបានខិតខំអនុវត្តការងារអភិវឌ្ឍន៍មូលដ្ឋាន និងផ្ដល់សេវាសាធារណៈជូនប្រជាពលរដ្ឋបានល្អប្រសើរ ស្របតាមផែនការអភិវឌ្ឍន៍ និងកម្មវិធីវិនិយោគ របស់ខ្លួនទៅតាមតួនាទីភារកិច្ច និងអរគុណចំពោះមន្ទីរ-អង្គភាពពាក់ព័ន្ធ អង្គការជាតិ -អន្តរជាតិ និងសប្បុរសជនទាំងអស់ ដែលតែងសហការគាំទ្រដល់ដំណើរការអភិវឌ្ឍន៍ និងការកសាងផែនការអភិវឌ្ឍន៍ កម្មវិធីវិនិយោគរបស់ឃុំ តាំងពីដំណាក់កាលដំបូងរហូតដល់ដំណាក់កាលនេះ គឺក្នុងគោលបំណងក្នុងការស្វែងរកការគាំទ្រសកម្មភាពអភិវឌ្ឍ ជាអាទិភាពនានារបស់ខ្លួន សម្រាប់ឆ្នាំខាងមុខ ដើម្បីកិច្ចអភិវឌ្ឍមូលដ្ឋាន ក្នុងបរិបថវិមជ្ឈការ និងវិសហមជ្ឈការ។
លោកអភិបាលរងខេត្តបានបន្តថា សិក្ខាសាលាសមាហរណកម្ម កម្មវិធីវិនិយោគបីឆ្នាំរំកិលនៅថ្នាក់ ក្រុង ស្រុក និងឃុំ សង្កាត់ គឺជាការរៀបចំឡើងដើម្បីឱ្យគម្រោងមានភាពស៊ីសង្វាក់ប្រទាក់ក្រឡាគ្នា ស្របទៅតាមគោលនយោបាយយុទ្ធសាស្ត្រ និងសមកម្មភាពនានារបស់បណ្តាមន្ទីរ អង្គភាពជំនាញ និងអង្គការមិនមែនរដ្ឋាភិបាល តាមរយៈការវិភាគ និងចរចា ដើម្បីប្រមូលផ្តុំធនធានសម្រាប់កិច្ចគាំទ្រកិច្ច អភិវឌ្ឍមូលដ្ឋាន ដើម្បីសម្រេចទិសដៅរួមប្រកបដោយប្រសិទ្ធភាព និងសេចក្តីត្រូវការចាំបាច់របស់ប្រជាពលរដ្ឋ៕ដោយ៖ វ៉ៃកូ