ភ្នំពេញ៖ តុលាការកំពូលបានបើកសវនាការជំនុំជម្រះបណ្ដឹងជំទាស់របស់លោក គឹម សុខ ក្នុងសំណុំរឿងចោទគណបក្សប្រជាជនថា ពាក់ព័ន្ធការសម្លាប់បណ្ឌិត កែម ឡី នៅថ្ងៃទី១០ ខែមករា នេះ។ បន្ទាប់បញ្ចប់សវនាការ នៅព្រឹកនេះ លោកស្រី គិម សត្ថាវី ប្រធានក្រុមប្រឹក្សាជំនុំជម្រះតុលាការកំពូល សម្រេចបន្តឃុំខ្លួនជនជាប់ចោទ គឹម សុខ ក្នុងពន្ធនាគារដដែល ។
តុលាការកំពូលសម្រេចតម្កល់សាលដីការ នៃសំណុំរឿងសុំនៅក្រៅឃុំជាលើទី២របស់ លោក គឹម សុខ នៅសាលាឧទ្ធរណ៍។
កាលពីថ្ងៃទី១០ ខែសីហា ឆ្នាំ២០១៧ ចៅក្រមតុលាការក្រុងភ្នំពេញ លោក គី ឫទ្ធី បានកាត់ទោស លោក គឹម សុខ ដាក់គុក ១៨ខែ ពិន័យជាប្រាក់ ៨លានរៀល បង់ចូលរដ្ឋពីបទញុះញង់ឲ្យមានបទឧក្រិដ្ឋជាអាទិ៍នៃក្រមព្រហ្មទណ្ឌ និង ៨០០លានរៀលសងជំងឺចិត្តសម្តេចតេជោហ៊ុន សែន ពីបទបរិហារកេរ្តិ៍ជាសាធារណៈតាមមាត្រា៤៩៤ មាត្រា៤៩៥ និង មាត្រា៣០៥ នៃក្រមព្រហ្មទណ្ឌ។
បច្ចុប្បន្នលោក គឹម សុខ នៅជាប់បណ្តឹងមួយទៀត ដែលប្តឹងដោយសម្តេចតេជោដូចគ្នា គឺពាក់ព័ន្ធការដែលលោក គឹម សុខ បានចោទប្រកាន់ថា រាជរដ្ឋាភិបាលកម្ពុជាបានបង្កើតប្រព័ន្ធសម្លាប់មនុស្ស រួចរកឃាតកមិនដែលឃើញ៕ ដោយ៖បញ្ញាស័ក្តិ
