ភ្នំពេញ ៖ សម្ដេចតេជោ ហ៊ុន សែន ថ្លែងប្រាប់ កីឡាករ-កីឡាការិនីទាំងអស់ ចេញទៅប្រកួតកីឡា SEA Gamesគឺត្រូវតែជៀសវាងការប្រើប្រាស់សារធាតុលើកកម្លាំង ឬសារធាតុញៀនជាដើម ដែលធ្វើឲ្យប៉ះពាល់ដល់សុខភាព និងប៉ះពាល់ដល់កិត្តិយសជាតិ។
នៅរសៀលថ្ងៃចន្ទ ទី ១៨ ខែវិច្ឆិកា ឆ្នាំ២០១៩នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឲ្យប្រតិភូ គ្រូបង្វឹក និងកីឡាករ កីឡាការរិនីប្រមាណ ៤០០នាក់ ចូលជួបសម្ដែងការគួរសម និងទទួលអនុសាសន៍ណែនាំមួយចំនួនពីសម្ដេចតេជោ នៅវិមានសន្ដិភាព មុនអត្តពលិកកម្ពុជា ចេញទៅប្រកួតកីឡាស៊ីហ្គេម(SEA Games) លើកទី៣០ នៅប្រទេសហ្វីលីពីន ចាប់ពីថ្ងៃទី៣០ ខែវិច្ឆិកា ដល់ថ្ងៃទី១១ ខែធ្នូ ឆ្នាំ២០១៩ ខាងមុខ ។
ក្នុងជំនួបរវាងសម្តេចតេជោនាយករដ្ឋមន្ត្រី និងក្រុមប្រតិភូកីឡាករ កីឡាករិនីនាពេលនេះ មិនត្រឹមតែបង្កើនភាពស្និទ្ធស្នាល និងបង្ហាញពីការយកចិត្តទុក្ខដាក់ខ្ពស់ ចំពោះសុខទុក្ខរបស់កីឡាករ កីឡាការិនីគ្រប់រូបប៉ុណ្ណោះនោះទេ គឺថែមទាំងផ្ដល់នូវភាពកក់ក្ដៅ និងកម្លាំងចិត្តមួយដ៏ពិសេស សម្រាប់អត្តពលិកគ្រប់ប្រភេទកីឡា ក្នុងការពង្រឹងស្មារតី និងឆន្ទៈប្រកួតប្រជែងកាន់តែមោះមុតថែមទៀតផង ។
សម្តេចតេជោនាយករដ្ឋមន្ត្រី ពិតជាមានមោទនភាពចំពោះការរីកចម្រើន នៃវិស័យកីឡារបស់ប្រទេសកម្ពុជាយើង ដែលកំពុងមានការរីកលូតលាស់យ៉ាងខ្លាំងក្នុងរយៈពេលប៉ុន្មានឆ្នាំចុងក្រោយនេះ។
នៅក្នុងពិធីសំណេះសំណាលនេះផងដែរ សម្តេចតេជោ ហ៊ុន សែន ក៏បានផ្តល់អនុសាសន៍សំខាន់ៗចំនួន២ចំណុច ដល់កីឡាករ កីឡាការិនីទាំងអស់មុននឹងចេញទៅប្រកួត៖
ចំណុចទី១) សម្តេចតេជោនាយករដ្ឋមន្ត្រីសូមឲ្យកីឡាករ កីឡាការិនីទាំងអស់ត្រូវគិតថាការប្រកួតចាញ់-ឈ្នះគឺជារឿងធម្មតារបស់កីឡា ប៉ុន្តែសំខាន់បំផុតនោះ គឺត្រូវគោរពតាមច្បាប់នៃការប្រកួត របស់គណៈកម្មការកីឡានោះ មិនត្រូវបំពានគេឡើយ។
ចំណុចទី២) កីឡាករ-កីឡាការិនីទាំងអស់ គឺត្រូវតែជៀសវាងការប្រើប្រាស់សារធាតុលើកកម្លាំង ឬសារធាតុញៀនជាដើម ដែលធ្វើឲ្យប៉ះពាល់ដល់សុខភាព និងប៉ះពាល់ដល់កិត្តិយសជាតិ។
សម្តេចតេជោ ហ៊ុន សែន បានថ្លែងអំណរគុណដល់គ្រូបង្វឹក នៅតាមបណ្តាប្រទេសផ្សេងៗ ដែលបានជួយ បណ្តុះបណ្តាល បង្វឹកដល់កីឡាករ កីឡាការិនីយើង និងបានអរគុណដល់សហព័ន្ធកីឡា គណៈកម្មការ កីឡាជាតិអូឡាំងពិកកម្ពុជា និងផ្នែកពាក់ព័ន្ធទាំងអស់ ដែលបានចូលរួមចំណែកក្នុងការជំរុញវិស័យកីឡានេះ ឲ្យមានការីកចម្រើន។
នៅក្នុងឱកាសនេះផងដែរ សម្តេចតេជោ ហ៊ុន សែន នាយករដ្ឋមន្ត្រី បានផ្តល់ថវិកាលើកទឹកចិត្តដល់កីឡាករ កីឡាការិនី និងគ្រូបង្វឹក ក្នុងម្នាក់ៗទទួលបានថវិកាធ្វើដំណើរចំនួន ៥០០ដុល្លារ មុនចេញដំណើរទៅប្រកួត SEA Games លើកទី៣០នៅប្រទេសហ្វីលីពីន និងបានជូនពរដល់កីឡាករ កីឡាការិនីទាំងអស់ទទួលបាននូវភាពជោគនៃការប្រកួតនោះផងដែរ៕ ដោយ ៖ កូឡាប
