សៀមរាប៖ អភិបាលខេត្តសៀមរាប និងលោកប៉ូល ឌុយប្រ៊ូល បានចុះហត្ថលេខាលើកិច្ចសន្យា ស្តីពីការបន្តផ្តល់ទីតាំង និង អគារជូនដល់អង្គការបណ្តុះបណ្តាល និង វឌ្ឍនភាពកម្ពុជា ដើម្បីសាងសង់សាលាសណ្ឋាគារ និង ទេសចរណ៍ ប៉ូលឌុយប្រ៊ូល។
នៅសណ្ឋាគារសូហ្វីថែលអង្គរ ភូគ្រីត្រាខេត្ដសៀមរាប នារសៀលថ្ងៃទី ១៨ ខែ វិច្ឆិកា ឆ្នាំ២០១៩ លោក ទៀ សីហា អភិបាលនៃគណៈអភិបាលខេត្តសៀមរាប បានធ្វើការចុះអនុស្សរណៈលើកិច្ចសន្យា ជាមួយលោក ប៉ូល ឌុយប្រ៊ូល ប្រធានអង្គការបណ្តុះបណ្តាល និង វឌ្ឍនភាពកម្ពុជា និង ជាអតីតអភិបាលក្រុងហ្វុងតែនប្លូ នៃសាធារណរដ្ឋបារាំង ស្តីពីការបន្តផ្តល់ទីតាំង និង អគារ ជូនដល់អង្គការបណ្តុះបណ្តាល និង វឌ្ឍនភាពកម្ពុជា ដើម្បីសាងសង់សាលាសណ្ឋាគារ និង ទេសចរណ៍ ប៉ូលឌុយប្រ៊ូលនេះឡើង ។
លោក ទៀ សីហា ក៏បានធ្វើការសម្តែងនូវអំណរគុណ ចំពោះលោកប៉ូល ឌុយប្រ៊ូល ប្រធានអង្គការបណ្តុះបណ្តាល និងវឌ្ឍនភាពកម្ពុជា ដែលបានធ្វើការបណ្តុះបណ្តាលនូវធនធានមនុស្សក្នុងវិស័យទេចរណ៍នៅកម្ពុជា សំខាន់ បងប្អូនកូនចៅប្រជាពលរដ្ឋខេត្តសៀមរាប ទាំងចំណេះដឹង បច្ចេកទេស ជំនាញ ដល់យុវជនកម្ពុជា ក្នុងរយៈពេល១៧ឆ្នាំមកនេះ សាលាបានបណ្តុះបណ្តាលសិស្សប្រមាណជាង ៣ពាន់នាក់បានចេញទៅបម្រើការងារនៅតាម ភោជនីយដ្ឋាន សណ្ឋាគារ និង ក្រុមហ៊ុន ព្រមទាំងមួយចំនួនបានយកទៅធ្វើជាអាជីពក្នុងកិច្ចប្រកបការងារចិញ្ចឹមក្រុមគ្រួសារទៀតផង ។
លោកក៏បានគូសបញ្ជាក់ផងដែរថា សាលាសណ្ឋាគារ និងទេសចរណ៍ ប៉ូលឌុយប្រ៊ូល មិនត្រឹមតែការបង្រៀនមុខជំនាញប៉ុណ្ណោះទេ ថែមទាំងមានទឹកចិត្តមនុស្សធម៌ ចំពោះសិស្សក្រីក្រ មកពីបណ្តាខេត្តផ្សេងៗ ក៏ដូចខេត្តសៀមរាបផងដែរ ។ លោកអភិបាលខេត្តក៏បានបន្តទៀតថា ក្រោមកិច្ច សហប្រតិបត្តិការល្អនឹងគ្នា រវាងរដ្ឋបាលសាលាខេត្តសៀមរាប និង សាលាសណ្ឋាគារ និង ទេសចរណ៍ ប៉ូលឌុយប្រ៊ូល ក៏ដូចជាមួយ ក្រសួងទេសចរណ៍ ក្នុងការបណ្តុះបណ្តាលនូវធនធានមនុស្ស លើវិស័យទេសចរណ៍នៅកម្ពុជា សំខាន់នៅខេត្តសៀមរាប ។
លោក ប៉ូល ឌុយប្រ៊ូល ប្រធានអង្គការបណ្តុះបណ្តាល និងវឌ្ឍនភាពកម្ពុជា ក៏បានសម្តែងនូវក្តីរំភើព ចំពោះលទ្ធផលក្នុង រយៈពេល១៧ឆ្នាំមកនេះ បានធ្វើឲ្យសិស្សនៃសាលាសណ្ឋាគារ និង ទេសចរណ៍ ប៉ូលឌុយប្រ៊ូល ក្រោយពីបញ្ចប់ការបណ្តុះបណ្តាល ទៅ ត្រូវបានតាមបណ្តាសណ្ឋាគារ ភោជនីយដ្ឋាន និង ក្រុមហ៊ុនទទួលយកទៅបម្រើការងារ និង មួយចំនួនបានយកជំនាញទាំងនេះ ទៅប្រកបអាជីវកម្ម ដើម្បីរកចំណូលផ្គត់ផ្គង់ក្រុមគ្រួសារទៀតផង ។ លោកក៏បានថ្លែងអំណរគុណចំពោះឯកឧត្តមអភិបាលខេត្ត និង រដ្ឋបាលសាលាខេត្តសៀមរាប ដែលតែងតែធ្វើកិច្ចសហការល្អជាមួយគ្នា ក្នុងកិច្ចទំនាក់ទំនងកិច្ចការរដ្ឋបាល និ ការងារសន្តិសុខ សណ្តាប់ធ្នាប់ ដែលធ្វើឲ្យអ្នកវិនិយោគមានការជឿជាក់ លើកិច្ចដឹកនាំរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជានាយករដ្ឋមន្ត្រី បានធ្វើឲ្យប្រទេសកម្ពុជាទាំងមូល មានការអភិវឌ្ឍន៍គ្រប់វិស័យ ក្រោមដំបូលសុខសន្តិភាព ។
ក្នុងកិច្ចចុះហត្ថលេខាលើកិច្ចសន្យា រវាងរដ្ឋបាលខេត្តសៀមរាប និង សាលាសណ្ឋាគារ និង ទេសចរណ៍ ប៉ូលឌុយប្រ៊ូល ក្នុង គោលបំណង ដើម្បីគ្រប់គ្រងទ្រព្យសម្បត្តិរដ្ឋ និង ដំណើរការគ្រប់គ្រង និង ការប្រព្រឹត្តទៅរបស់សាលាឲ្យកាន់តែមានប្រសិទ្ធភាព ក្នុងគោលដៅ គ្រប់គ្រងទ្រព្យសម្បត្តិរដ្ឋឲ្យកាន់តែមានប្រសិទ្ធភាពខ្ពស់ និង បណ្តុះបណ្តាលជំនាញបដិសណ្ឋារកិច្ច និង ទេសចរណ៍ ដល់យុវជនកម្ពុជា និង ផ្តល់លទ្ធភាពជូនយុវជនខ្មែរ នូវឱកាសការងារ និង អាជីពពិតប្រាកដសម្រាប់អនាគត ព្រមទាំងរួមចំណែក អភិវឌ្ឍន៍វិស័យទេចរណ៍នៅកម្ពុជាប្រកបដោយនិរន្តរភាព ក្នុងការអនុវត្តយុទ្ធសាស្ត្រកាត់បន្ថយភាពក្រីក្រជាមួយរដ្ឋាភិបាលកម្ពុជា៕ដោយ៖បញ្ញាស័ក្តិ