ទាហ៊ានចំនួន ៤នាក់ និងកម្មករ ២នាក់បានស្លាប់ ក្រោយពេលមានការរអិលផ្ទាំងទឹកកក នៅតំបន់ទឹកកក Siachen ស្ថិតនៅតំបន់កាស្មៀរ (Kashmir) ដែលគ្រប់គ្រងដោយឥណ្ទា។ នេះបើតាមការបញ្ជាក់របស់មន្រ្តីយោធាឥណ្ឌា។
មុនពេលផ្ទាំងទឹកកករអិលចុះមក មានមនុស្សចំនួន ៨នាក់បានដើរល្បាតនៅក្បែរតំបន់ភ្នំទឹកកកកម្ពស់ ៥.៨០០ម៉ែត្រ នៃភ្នំហិមាល័យ។
បន្ទាប់ពីកើតហេតុ ក្រុមជួយសង្រ្គោះបានទាញយកចេញជនរងគ្រោះចេញ និងបានប្រើប្រាស់យន្តហោះដើម្បីជម្លៀសជនរងគ្រោះដែលរងរបួសខ្លាំង ទៅកាន់មន្ទីរពេទ្យយោធាក្បែរកន្លែងកើតហេតុ។
ប៉ុន្តែមនុស្ស ៦នាក់ក្នុងចំណោម ៧នាក់បានស្លាប់ដោយសារតែការខ្វះកម្តៅក្នុងខ្លួន។
សូមបញ្ជាក់ថា កាលពីខែកុម្ភៈ ឆ្នាំ ២០១៦ ទាហ៊ានឥណ្ឌាចំនួន ១០នាក់ផងដែរ បានស្លាប់ ក្រោយពេលផ្ទាំងទឹកកករអិលបុកនឹងមូលដ្ឋានទ័ពរបស់ពួកគេក្នុងតំបន់៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC