តាកែវ ៖ ប្រភពពីប្រជាពលរដ្ឋដែលសូមមិនបញ្ចេញឈ្មោះ បានឲ្យដឹងថា ការធ្វើអាជីវកម្មលើសត្វជ្រូក មានការលំបាកខ្លាំងមិនសូវចំណេញនោះទេ ខាតកម្លាំងច្រើនក្រោយមានថ្នាក់លើមួយចំនួន រាប់ក្បាលជ្រូកយកលុយតែម្តង មិនខ្វល់ពីជ្រូកចរាចរណ៍ក្នុងស្រុក ឬនាំចូលនោះទេ ។ ថ្មីៗនេះប្រជាពលរដ្ឋរស់នៅភូមិកំពង់អំពិល បានលួចផ្តិតរូបភាពអំពីសកម្មភាពនាំជ្រូកវៀតណាម ចូលក្នុងស្រុកតាមរយៈផ្លូវទឹក មកចតយកជ្រូកឡើងឡាន នៅចំណុចក្បែរទួលខ្ពស់ ស្រុកបូរីជលសារ ខេត្តតាកែវ សារជាថ្មីទៀតហើយ បើទោះបីជាមានការហាមឃាត់ បិទមិនឲ្យមានការនាំជ្រូកចូលពីប្រទេសវៀតណាម ពីសំណាក់រដ្ឋមន្រ្តីក្រសួងកសិកម្មរុក្ខាប្រមាញ់និងនេសាទ យ៉ាងណាក៏ដោយ តែខាងស្រុកបូរីជល់សារ ខេត្តតាកែវ ដែលជាស្រុកនៅតាមខ្សែ បន្ទាត់ព្រំដែន នៅតែមានជ្រូកវៀតណាម លួចនាំចូលដដែល មកដាក់នៅភូមិកំពង់អំពិល ដែលមានចំនួនជ្រូក រហូតដល់ជិតមួយរយជ្រូក ។
តាមការឲ្យដឹងពីបងប្អូនប្រជាពលរដ្ឋ បានប្រាប់ឲ្យអ្នកសារព័ត៌មាន ដឹងថា ការលួចនាំជ្រូករបស់វៀតណាមចូលមកនេះ គឺឥទ្បូវពួកជនខិលខូចលួចនាំចូលមកមិនចាំបាច់តែពេលយប់នោះទេ គឺនាំចូលមកទាំងថ្ងៃតែម្តង ដោយមិនខ្លាចញញើតសមត្ថកិច្ច ឬអាជ្ញាធរជំនាញពាក់ព័ន្ធណាទ្បើយ ប្រហែលជា មានការត្រូវរ៉ូវគ្នាហើយមើលទៅ ទើបបានជាពួកគេអាចដឹកជ្រូកវៀតណាម ចូលបានស្រួលយ៉ាងនេះ ទោះចង់ដឹកជញ្ជូនដល់ណា ក៏គ្មានអ្នកណាអើពើឈឺក្បាលដែរ ។
ពួកគាត់បន្តថា តើមន្ត្រីជំនាញ និងអាជ្ញាធរខេត្តគិតបែបណា បានជាអនុញ្ញាតឲ្យឈ្មួញខិលខូចលួច បន្តនាំជ្រូកវៀតណាម ចូលមកយ៉ាងគក្រឹកគគ្រេងដដែល តាមច្រករបៀងតូចៗ ឬដឹកតាមផ្លូវទឹកមកកាន់ខេត្តតាកែវ ដើម្បីលក់បន្តទៅតាមបណ្តាខេត្តផ្សេងៗទៀត ដោយឆ្លងកាត់ខេត្តតាកែវយ៉ាងនេះ ?
ចំណែក លោក ញឹប ស្រន ដែលជាប្រធានមន្ទីកសិកម្មខេត្តតាកែវ និងលោក ទុយ ភ្នាក់យើងមិនអាចសុំការបំភ្លឺបាននោះទេ ព្រោះទូរស័ព្ទចូលហើយ អត់មានអ្នកលើក ។ ឯលោក ថៃ លី ប្រធានការិយាល័យផលិតកម្មនិងបសុព្យាបាលខេត្ត ក៏មិនអាចសុំការបំភ្លឺបានឡើយ ព្រោះទូរស័ព្ទខលមិនលើក ៕ ដោយ៖ តាកែវ
