ខេត្តស្វាយរៀងៈ លោក ហ៊ូ វតនៈ សមាជិកក្រុមប្រឹក្សាខេត្ត លោក សុខ រស់ អភិបាលរងខេត្តស្វាយរៀង នៅព្រឹកថ្ងៃទី១៩ ខែវិច្ឆិកា ឆ្នាំ២០១៩នេះ បានអញ្ជើញជាអធិបតីនៅក្នុងវេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សាខេត្តស្វាយរៀង ដែលបានប្រព្រឹត្តទៅនៅបរិវេណវត្តចេក ភូមិទទា សង្កាត់ចេក ក្រុងស្វាយរៀង ។
ពិធីនេះក៏មានការអញ្ជើញចូលរួមពី អស់ លោកជាសមាជិកក្រុមប្រឹក្សាខេត្ត លោកអភិបាល អភិបាលរងក្រុង សមាជិកក្រុមប្រឹក្សាក្រុង លោក ប្រធានមន្ទីរ អង្គភាពជំនាញ កងកម្លាំងទាំង៣ លោក ចៅសង្កាត់ ក្រុមប្រឹក្សាសង្កាត់ ថ្នាក់ដឹកនាំភូមិ និងប្រជាពលរដ្ឋក្នុងសង្កាត់ចេក សរុបចំនួន២៣៨នាក់ ។
លោក សុខ រស់ អភិបាលរង ខេត្តស្វាយរៀង បានថ្លែងអំណរគុណចំពោះវត្តមាន លោក លោកស្រី ប្រជាពលរដ្ឋ សមាជិក សមាជិការនៃអង្គវេទិកាទាំងមូលដែលបានចូលរួមក្នុងវេទិកានេះ ពិតជាបានបង្ហាញឲ្យឃើញពីការប្តេជ្ញាចិត្តចូលរួមសហការយ៉ាងខ្លាំងក្លា នៅក្នុងដំណើរការនៃការគាំទ្រ និងជំរុញការអភិវឌ្ឍន៍តាមបែបប្រជាធិបតេយ្យ នៅថ្នាក់ក្រោមជាតិ ស្របតាមក្របខ័ណ្ឌ យុត្តិសាស្ត្រ ស្តីពីកំណែទម្រង់វិមជ្ឈការ និងវិសហមជ្ឈការ ឲ្យកាន់តែទទួលបានលទ្ធផលជោគជ័យថ្មីៗថែមទៀត បម្រើឱ្យសេចក្តីត្រូវការពិតប្រាកដ របស់ប្រជាពលរដ្ឋនៅមូលដ្ឋាន ដែលជាកម្មវត្ថុចម្បងនៃការរៀបចំអង្គវេទិកានៅពេលនេះ។
ប្រធានបទនៃអង្គវេទិកានេះ បានលើកឡើងនូវចំណុចសំខាន់ៗមួយចំនួន និងដំណោះស្រាយដូចខាងក្រោម ៖ -ការអនុវត្តគោលនយោបាយភូមិ ឃុំមានសុវត្ថិភាព -ការផ្តល់សេវាសាធារណៈ -ការធ្វើអត្តសញ្ញាណប័ណ្ណ, ការងារអត្រានុកូលដ្ឋាន, បរិស្ថាន, អនាម័យ, បទល្មើសនេសាទ, ទំនាស់ដីធ្លី ។
សំណើ និងសំណូមពររបស់ប្រជាពលរដ្ឋរួមមាន ១ សំណើសម្របសម្រួលដោះស្រាយទំនាស់ដីលំនៅឋានរបស់ឈ្មោះ ម៉ៅ សំអាន ប្រជាពលរដ្ឋភូមិធ្មល់ និងដីសាលារៀនវិទ្យាល័យ ហ៊ុន សែនចេក ។ ២ ស្នើសុំស្តាប្រឡាយ២ខ្សែ ប្រវែង៤៩០០ម៉ែត្រស្ថិតនៅភូមិទាចេក គក់ប៉ែ និងភូមិចំបក់ ៣ ស្នើសុំសាងសង់ផ្លូវបេតុងចំនួន៦ខ្សែ។ ៤ ស្នើដាក់លូខ្សែរំដោះទឹក១ខ្សែ តាមបណ្តោយផ្លូវជាតិលេខ១ ។ ៥ ស្នើរឹតបន្តឹងករណីប្រើប្រាស់គ្រឿងញៀន ។ ៦ ស្នើរឹតបន្តឹងករណីប្រើប្រាស់ឧបករណ៍ និងការនេសាទខុសច្បាប់។
គណៈអធិបតី និងសមត្ថកិច្ចជំនាញបានបកស្រាយ ឆ្លើយតប អាចទទួលយកបាន៕ ដោយ៖ វ៉ៃកូ
