ភ្នំពេញ៖ ម្ចាស់មេដាយមាសជើងឯកពិភពលោកកីឡាប៉េតង់៣ជំនាន់ជាប់ៗគ្នា វីរកីឡាការិនីដ៏ឆ្នើមរបស់កម្ពុជា កែ ឡេង ធ្វើបានយ៉ាងល្អបំផុត នៅក្នុងការប្រកួតលើវិញ្ញាសាវាយយកពិន្ទុ (Shooting) វគ្គជម្រុះជុំទី១ នាល្ងាចថ្ងៃទី១៩ ខែវិច្ឆិកា នៃព្រឹត្តិការណ៍ប៉េតង់ជើងឯកពិភពលោកយុវជន និងស្ត្រី លើកទី១៧ នៅកម្ពុជា។
អ្នកស្រី កែ ឡេង ធ្វើបានយ៉ាងដោយសម្រេចក្នុងពិន្ទុ៣៨ ហើយបានឈរនៅលើតារាងចំណាត់ថ្នាក់លេខ១ នៅលើកីឡាការិនីតំណាងជាតិនីមួយចំនួន៤២ ដោយវិញ្ញាសាវាយយកពិន្ទុផ្នែកនារីនេះ គឺកម្ពុជាបានឆ្លងផុតវគ្គជម្រុះជុំទី១ និងរង់ចាំការប្រកួតនៅវគ្គជាបន្តទៀត។ យោងតាមតារាងពិន្ទុរបស់គណៈកម្មការបច្ចេកទេសពិភពលោកបានឲ្យដឹងថា អ្នកស្រី កែ ឡេង របស់កម្ពុជា មាន៣៨ពិន្ទុ លេខ១ លើចំណាត់ថ្នាក់លេខ២ ដែលគ្រប់គ្រងដោយកីឡាការិនី Homniam Ranu មកពីប្រទេស ន័រវែស ដែលមាន៣៧ពិន្ទុ លេខ៣ មកពីឡាវ កីឡាការិនី Bivilak Thepphakan ៣៦ពិន្ទុ និងចំណាត់ថ្នាក់លេខ៤ មកពីមីយ៉ាន់ម៉ា កីឡាការិនី Thin Cherry Thet ដែលមាន៣៤ពិន្ទុ។ សម្រាប់ចំណាតថ្នាក់ពីលេខ១ ដល់ លេខ៤ មិនត្រូវប្រកួតជម្រុះ នាថ្ងៃទី២០ វិច្ឆិកា ទៀតទេ ដោយរង់ចាំការប្រកួតនៅវគ្គក្រោយទៀត ខណៈកីឡាការិនី ពីលេខ៥ ដល់លេខ២៣ ត្រូវប្រកួតជម្រុះ នៅថ្ងៃទី២០ វិច្ឆិកា ស្អែកនេះ។
ដោយឡែក វិញ្ញាសាវាយយកពិន្ទុដូចគ្នា ផ្នែកយុវជន កីឡាករកម្ពុជាវាយបាន២៨ពិន្ទុ ឈរនៅចំណាត់ថ្នាក់លេខ១២ ដែលត្រូវឆ្លងកាត់ការប្រកួតវគ្គជម្រុះស្អែកនេះ នៅក្នុងចំណោម ១៣ប្រទេស។ ចំពោះ៤ប្រទេស ដែលជាប់វគ្គជម្រុះជុំទី១នេះ គឺមានម៉ាដាហ្គាស្កា មាន៤៤ពិន្ទុ លេខ២ ម៉ូណាកូ ៤១ពិន្ទុ លេខ៣ អ៊ីតាលី ៣៨ពិន្ទុ និងលេខ៤ ស៊ុយអែត ៣៥ពិន្ទុ។
គួរបញ្ជាក់ថា ព្រឹត្តិការណ៍កីឡាប៉េតង់ជើងឯកពិភពលោកយុវជន និងស្ដ្រី លើកទី១៧ ដែលកម្ពុជាទទួលបានសិទ្ធិធ្វើជាម្ចាស់ផ្ទះជាប្រវត្តិសាស្ត្ររបស់ខ្លួននេះ ចាប់ផ្ដើមការប្រកួតពីថ្ងៃទី១៩ ដល់ថ្ងៃទី២៣ ខែវិច្ឆិកា នៅពហុកីឡដ្ឋានជាតិអូឡាំពិក រាជធានីភ្នំពេញ ដោយមានក្រុមយុវជន និងកីឡាការិនីមកពី៤៩ប្រទេស មានកីឡាករ កីឡាការិនីសរុប ៤៤៩នាក់ មាន៨០ក្រុម រួមទាំងម្ចាស់ផ្ទះកម្ពុជា ដែលបានចូលរួមប្រកួតប្រជែងមេដាយ ដែលមានត្រឹមតែ៦វិញ្ញាសាប៉ុណ្ណោះ៕ ដោយ៖កូឡាប
