ភ្នំពេញ៖ ក្រោមគំនិតផ្ដួចផ្ដើមរបស់លោកអភិបាលរាជធានីភ្នំពេញ នឹងមានគម្រោងកែលម្អមហាវិថីម៉ៅសេទុង ឱ្យមានផ្លូវថ្មើរជើង តាមបណ្ដោយមហាវិថី នាថ្ងៃអនាគត។
នារសៀលថ្ងៃអង្គារ ទី១៩ ខែវិចិ្ឆកា ឆ្នាំ២០១៩នេះ រដ្ឋបាលរាជធានីភ្នំពេញ បានបើកកិច្ចប្រជុំស្ដីពីគម្រោងសិក្សារៀបចំ និងកែលម្អផ្លូវថ្មើរជើង តាមបណ្ដោយមហាវិថីម៉ៅសេទុង ដើម្បីផ្ដល់ភាពងាយស្រួលដល់បងប្អូនប្រជាពលរដ្ឋ ជាពិសេសបងប្អូនជនពិការ មានផ្លូវថ្មើរជើងសម្រាប់ធ្វើដំណើរឆ្លងកាត់។
លោកឃួង ស្រេង បានមានប្រសាសន៍ថា ការរៀបចំនិងកែលម្អផ្លូវថ្មើរជើង តាមបណ្តោយមហាវិថីម៉ៅសេទុងនេះ ដំបូងយើងត្រូវរៀបចំចិញ្ចើមផ្លូវ និងរៀបចំសណ្តាប់ធ្នាប់សាធារណៈ។ យើងនឹងរៀបចំផ្លូវថ្មើរជើងនេះ ឲ្យល្អប្រសើរឡើងនិង
ដើម្បីទុកជាគំរូសម្រាប់មហាវិថីផ្សេងៗទៀតផងដែរ។
លោកបានថ្លែងបន្តថា សណ្តាប់ធ្នាប់សាធារណៈ ជាតម្រូវការចាំចាប់របស់ប្រជាពលរដ្ឋទូទៅ។ ដូច្នេះការចតលើចិញ្ចើមផ្លូវប្រហែលជាមិនអនុញ្ញាតឲ្យមានទៀតទេ។ មានមតិខ្លះថា នៅស្រុកគេ ពិសេសនៅប្រទេសបារាំង គេអនុញ្ញាតឲ្យមានការចតលើទ្រូងផ្លូវបាន តែគេចតតែមួយជួរ។ នេះជាការងារ ដែលយើងត្រូវសិក្សានិងពិភាក្សាគ្នា ថាតើយើងត្រូវរៀបចំបែបណា។
ក្រោយពីមានការពិភាក្សាគ្នារួចរាល់ នៅចុងបញ្ចប់នៃកិច្ចប្រជុំនោះ លោកឃួង ស្រេង បានជំរុញឲ្យអាជ្ញាធរខណ្ឌពាក់ព័ន្ធ និងផ្លូវម៉ៅសេទុងនេះ សហការជាមួយមន្ត្រីជំនាញ និងមន្ទីរដែនដីនគរូបនីយកម្មនិងសំណង់ រាជធានីភ្នំពេញ ចុះសិក្សាពីកម្មសិទ្ធិដីធ្លី របស់ប្រជាពលរដ្ឋថាតើបានប៉ះពាល់អ្វីខ្លះ បន្ទាប់មកយើងនិងបង្កើតជាអង្គប្រជុំ ពិនិត្យនិងសម្រេចម្តងទៀត ដោយយើងនឹងរៀបចំនិងកែលម្អផ្លូវថ្មើរជើង នៅតាមបណ្តោយមហាវិថីម៉ៅសេទុង ឲ្យបានល្អប្រសើរ ទុកជាគំរូសម្រាប់មហាវិថីផ្សេងៗទៀត នៅក្នុងរាជធានីភ្នំពេញ៕ដោយ៖កូឡាប
