ប្រទេសហ្វីលីពីន នឹងធ្វើការកំណត់ថា ការប្រើប្រាស់ និងការនាំចូលបារីអេឡិចត្រូវនិច គឺជាអំពើខុសច្បាប់ និងធ្វើការចាប់ខ្លួនអ្នកដែលប្រើប្រាស់វា។ នេះបើតាមការប្រកាសរបស់លោកប្រធានាធិបតី ដូធឺតេ នៅយប់ថ្ងៃអង្គារ។
ការប្រកាសបែបនោះរបស់លោកកើតឡើង ក្រោយពេលមានការសួរសំណួរនៅក្នុងសន្និសីទ អំពីរបាយការណ៍ ដែលបញ្ជាក់អំពីករណីទីមួយ នៃជំងឺរលាកសួតទាក់ទងទៅនឹងការប្រើប្រាស់បារីអេឡិចត្រូវនិច នៅក្នុងប្រទេស។
លោកបានថ្លែងដូច្នេះថា “ខ្ញុំនឹងធ្វើការហាមឃាត់វា ទាំងការប្រើប្រាស់ និងការនាំចូល។ ដឹងថាមកពីមូលហេតុអ្វីទេ? ពីព្រោះវាមានជាតិពុល ហើយរដ្ឋាភិបាលមានសិទ្ធិអំណាចចេញវិធានការ ដើម្បីការពារសុខភាព និងផលប្រយោជន៍សាធារណៈ”។
លោកក៏បានបញ្ជាឲ្យអ្នកអនុវត្តច្បាប់ ចាប់ជនទាំងឡាយណាដែលជក់បារីអេឡិចត្រូវនិច នៅទីសាធារណៈផងដែរ។
សូមបញ្ជាក់ថា លោកដូធឺតេ វ័យ ៧៤ឆ្នាំ ធ្លាប់ជាអ្នកញៀនជក់បារីខ្លាំង ប៉ុន្តែគាត់បានផ្តាច់បារី នៅពេលដែលគាត់មានជំងឺស្ទះសរសៃឈាម៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia.
