ក្រុមសកម្មប្រយុទ្ធតាលីបង់ក្នុងប្រទេសអាហ្គានីស្ថាន បានធ្វើការដោះលែងចំណាប់ខ្មាំងអាមេរិច និងអុស្ត្រាលីចំនួន ២នាក់ជាថ្នូរនឹង ការដោះលែងសមាជិកជាន់ខ្ពស់របស់ខ្លួនចំនួន ៣នាក់។
ចំណាប់ខ្មាំងបជ្ឍិមប្រទេសទាំងពីរនោះមានឈ្មោះថា Kevin King ជាជនជាតិអាមេរិច និង Timothy Weeks ជាជនជាតិអូស្ត្រាលី។ ពួកគេត្រូវបានដោះលែង ៣ឆ្នាំក្រោយពេលត្រូវបានចាប់ជំរិតនៅខាងក្រៅសកលវិទ្យាល័យអាមេរិច នៅក្នុងរដ្ឋធានីកាប៊ុល ប្រទេសអាហ្គានីស្ថាន ដែលនៅសកលវិទ្យាល័យនោះ ពួកគេធ្វើជាសាស្ត្រាចារ្យ។
ចំណែកសមាជិកជាន់ខ្ពស់ក្រុមតាលីបង់ ៣រូបបានធ្វើដំណើរពីប្រទេសអាហ្គានីស្ថានទៅដល់ប្រទេសកាតាហើយ ដែលជាផ្នែកមួយនៃការដោះដូរ។
មន្ត្រីអាហ្គានីស្ថានបាននិយាយថា កិច្ចព្រមព្រៀងដោះដូរមនុស្សនោះគឺមានគោលបំណងចាប់ផ្តើមចរចារជាថ្មីជាមួយនឹងក្រុមតាលីបង់។
ប្រធានាធិបតីអាហ្គានីស្ថាន Ashraf Ghani បាននិយាយកាលពីសប្តាហ៍មុនថា ការសម្រេចចិត្តនោះមានការលំបាកខ្លាំងណាស់ ប៉ុន្តែវាមានសារៈសំខាន់ និងជាឥរិយាបទមនុស្សធម៌៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC