ខេត្តកោះកុង៖ អ្នកឃ្លាំមើលផែនការអភិវឌ្ឍសង្គម និងប្រជាពលរដ្ឋខេត្តកោះកុង ជាថ្មីម្តងទៀត បានសំណូមពរដល់ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ជួយបញ្ជូនមន្ត្រីចុះស៊ើបអង្កេត ទៅលើសកម្មភាព របស់មន្ត្រីជំនាញស្ថាប័នជំនាញ ប្រចាំការនៅច្រកទ្វារចាំយាម ខេត្តកោះកុង ដើម្បីឲ្យប្រាកដថា តើមន្ត្រីជំនាញស្ថាប័នណាខ្លះ មានជាប់ពាក់ព័ន្ធបទសង្ស័យប្រព្រឹត្តិអំពើពុករលួយ ជាថ្នូរអនុញ្ញាតឲ្យឈ្មួញនាំចូលទំនិញគេចពន្ធ និងខូចគុណភាព ពីប្រទេសថៃ ចូលមកកម្ពុជា នៅតាមច្រកព្រំដែននីមួយៗ។
ទាក់ទិនបញ្ហានេះ មន្ត្រីសមាគមអាដហុក (Adhoc) និងអង្គការលីកាដូ (Licadho) ផ្តល់សម្ភាសឲ្យអ្នកយកព័ត៌មាន cen.com.kh ប្រចាំខេត្តកោះកុងដឹងថា ពួកគេក៏ធ្លាប់បានទទួលព័ត៌មានជុំវិញបទល្មើសនាំចូលទំនិញគេចពន្ធ ឬទំនិញខូចគុណភាព ត្រូវឈ្មួញនាំចូលពីប្រទេសថៃ តាមច្រកព្រំដែនចាំយាម តាមផ្លូវសមុទ្រ និងច្រករបៀងផ្សេងៗទៀតជាបន្តបន្ទាប់មកនេះដែរ។
ពួកគេសង្ស័យថា ទំនិញគេចពន្ធ ឬសាច់ស្រស់ខូចគុណភាព ដែលឈ្មួញអាចនាំចូល តាមច្រកចាំយាម និងច្រកផ្សេងៗនាខេត្តកោះកុង បានដោយរលូន និងគ្មានសមត្ថកិច្ចហាមឃាត់ ទំនងជាឈ្មួញទាំងនោះ បានត្រូវដងត្រូវផ្លែគ្នា ជាមួយសមត្ថកិច្ចជំនាញស្ថាប័នខ្លះ ប្រចាំការតាមច្រកនីមួយៗ ពិសេសច្រកទ្វារចាំយាម ជាថ្នូរចែកផលប្រយោជន៍ ឲ្យគ្នាទៅវិញទៅមក។
អ្នកសម្រួលសមាគមអាដហុក ប្រចាំខេត្តកោះកុង លោក ញៀប សំអឿន មានប្រសាសន៍ថា ទំនិញដឹកតាមរទេះ ពិសេសដឹកតាមរថយន្តធំៗ ដែលបានឆ្លងកាត់ច្រកចាំយាមនាពេលកន្លងទៅ និងបន្តរហូតមកដល់បច្ចុប្បន្នេះ គឺភាគច្រើន លោកសង្កេតឃើញថា ទំនិញទាំងនោះ មិនត្រូវបានមន្ត្រីសាខាគយ និងរដ្ឋាករខេត្តកោះកុង មន្ត្រីកាំកុងត្រូលខេត្តកោះកុង និងមន្ត្រីពាក់ព័ន្ធដទៃទៀតចុះត្រួតពិនិត្យទំនិញនាំចូលទាំងនោះឲ្យបានត្រឹមត្រូវនោះទេ។
ភាពអសកម្មទាំងនេះ លោក ញៀប សំអឿន បានទទូចដល់ លោក គុណ ញ៉ឹម អគ្គនាយក នៃអគ្គនាយកដ្ឋានគយ និងរដ្ឋាករកម្ពុជា និងលោក ម៉ក ពេជ្ជរិទ្ធ អគ្គនាយកដ្ឋានកាំកុងត្រូល នៃក្រសួងពាណិជ្ជកម្ម ជាពិសេស លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ បញ្ជូនមន្ត្រីចុះស៊ើបអង្កេត ទៅលើសកម្មភាព របស់មន្ត្រីប្រចាំការ នៅច្រកព្រំដែនចាំយាម ខេត្តកោះកុង ដើម្បីឲ្យប្រាកដថា តើអាចមានជាប់ពាក់ព័ន្ធ ការអនុញ្ញាតនាំចូលទំនិញគេចពន្ធ និងទំនិញខូចគុណភាព ជាថ្នូរទទួលបានសំណូកពុករលួយពីឈ្មួញល្មើសដែរឬយ៉ាងណា?។
ចំណុចនេះ លោក ញៀប សំអឿន មន្ត្រីសមាគមអាដហុក ក៏បានអះអាងថា កន្លងមកទំនិញ ដែលឈ្មួញបានដឹកតាមរថយន្តធំៗ ចូលតាមច្រកព្រំដែនចាំយាម មិនសូវឃើញមានមន្ត្រីជំនាញស្ថាប័នពាក់ព័ន្ធ ដែលឈរប្រចាំការនៅច្រកទ្វារអន្តរជាតិកម្ពុជាថៃមួយនេះ ចុះត្រួតពិនិត្យទំនិញទាំងនោះឲ្យបានជាប្រចាំ និងត្រឹមត្រូវទេ ដោយឃើញមន្ត្រីស្ថាប័នខ្លះ បានឈរចាំទទួលយកត្រឹមសំណូកលុយកាក់ ដែលឈ្មួញ ឬពាណិជ្ជករមួយចំនួននោះ នាំយកទៅបង់ជូនស្ថាប័ននីមួយៗ ដែលឈរប្រចាំថ្ងៃ នៅច្រកទ្វារចាំយាម ដោយមិនបានត្រួតពិនិត្យទំនិញ ដែលដឹកតាមរទេះ ពិសេសរថយន្តធំៗទាំងនោះទេ។
ចំណែក ប្រជាពលរដ្ឋមួយចំនួន មានរបរលក់ដូរចំណីអាហារ នៅក្បែរច្រកទ្វារអន្តរជាតិកម្ពុជាថៃ ច្រកចាំយាម ក៏បានឲ្យដឹងដែរថា មិនមែនជារឿងថ្មីទេ ដែលមន្ត្រីស្ថាប័នជំនាញ ប្រចាំការនៅច្រកទ្វារចាំយាម គ្រប់ស្ថាប័ន រួមមាន៖ មន្ត្រីសាខាគយ និងរដ្ឋាករខេត្តកោះកុង និងមន្ត្រីសាខាកាំកុងត្រូលខេត្តនេះ និងប្រធានគ្រប់គ្រងច្រកទ្វារចាំយាមជាដើម បានត្រូវដងត្រូវផ្លែគ្នាជាមួយឈ្មួញ ឬពាណិជ្ជករទាំងខ្មែរ និងថៃ ដោយបានអនុញ្ញាត ឲ្យនាំចូលទំនិញគេចពន្ធ ឬសាច់ស្រស់ខូចគុណភាពជាដើម តាមច្រកចាំយាមជាបន្តបន្ទាប់មកនេះ។
អ្នកយកព័ត៌មាន cen.com.kh ប្រចាំខេត្តកោះកុង មិនទាន់អាចទាក់ទង លោក ងុយ ជៀង ប្រធានច្រកទ្វារអន្តរជាតិកម្ពុជាថៃ ខេត្តកោះកុង ដើម្បីបំភ្លឺជុំវិញការចោទប្រកាន់សង្ស័យ ទៅលើបទល្មើសនាំចូលទំនិញគេចពន្ធ និងទំនិញខូចគុណភាព នាំចូលពីប្រទេសថៃចូលមកម្ពុជា តាមច្រកទ្វារចាំយាមបានទេ តាមទូរស័ព្ទ នៅថ្ងៃពុធ ទី១០ ខែមករា ឆ្នាំ២០១៨។
ទោះជាបែបនេះក្តី មន្ត្រីជំនាញស្ថាប័នខ្លះ ប្រចាំការនៅច្រកទ្វារចាំយាម ខេត្តកោះកុង មានមន្ត្រីគយ និងរដ្ឋាករខេត្តកោះកុង និងមន្ត្រីសាខាកាំកុងត្រូលខេត្តជាដើម បានបដិសេធន៍ថា មិនបានជាប់ពាក់ព័ន្ធបទល្មើស អនុញ្ញាតឲ្យឈ្មួញនាំចូលទំនិញគេចពន្ធ និងទំនិញខូចគុណភាព ពីប្រទេសថៃ ចូលមកកម្ពុជា តាមច្រកចាំយាម និងច្រកផ្សេងៗ នៃខេត្តកោះកុង ដូចការចោទប្រកាន់ទេ។
យ៉ាងណាក៏ដោយចុះ មន្ត្រីឃ្លាំមើលផែនការអភិវឌ្ឍសង្គមួយចំនួន ប្រចាំខេត្តកោះកុង បានឲ្យដឹងថា ពួកគេពិតជាធ្លាប់ទទួលបណ្តឹងផ្ទាល់មាត់ ពីប្រជាពលរដ្ឋ ផ្តល់ព័ត៌មានជុំវិញសកម្មភាព របស់ឈ្មួញ បានបន្តនាំចូលទំនិញគេចពន្ធ និងសាច់ស្រស់ខូចគុណភាព ត្រូវមន្ត្រីជំនាញស្ថាប័នខ្លះ នៃខេត្តកោះកុង ពិសេសមន្ត្រីប្រចាំការនៅច្រកចាំយាម បានបើកដៃឲ្យឈ្មួញ នាំចូលទំនិញពីប្រទេសថៃចូល មកកម្ពុជា តាមច្រកចាំយាម និងតាមផ្លូវសមុទ្រជាដើមបានបន្តកើតមានស្ទើជារៀងរាល់ថ្ងៃ។
ទំនិញគេចពន្ធទាំងនោះមានដូចជា៖ ម៉ូតូសេរីទំនើបៗ សម្ភារៈសំណង់ សាច់ស្រស់ ឬអាហារសមុទ្រស្រស់ៗ គ្រឿងសម្អាង ភេសជ្ជៈ អាហារកំប៉ុងគ្រប់ប្រភេទ ដែលខូចគុណភាព ឬជិតហួសកាលបរិច្ឆេទប្រើប្រាស់ ជាពិសេសគ្រឿងអេឡិចត្រូ មានទូរស័ព្ទដៃ អាយផែត កុំព្យួទ័រ និងទិញជាច្រើនប្រភេទទៀត។
មន្ត្រីសង្គមស៊ីវិល បានដកស្រង់សំដី ប្រជាពលរដ្ឋមកបញ្ជាក់ថា រាល់ការនាំចូលទំនិញទាំងគេចពន្ធ និងខូច គុណភាពភាគច្រើន នៅតាមច្រកព្រំដែនកម្ពុជាថៃ ពិសេសច្រកចាំយាម ខេត្តកោះកុងនេះ គឺមន្ត្រីស្ថាប័នជំនាញមួយចំនួន ដែលឈរជើងប្រចាំការ នៅតាមច្រកព្រំដែននីមួយៗ ជាអ្នកបើកដៃ ឲ្យនាំចូល ទំនិញទាំងនោះ ជាថ្នូរទទួលបានសំណូកលុយកាក់ពីឈ្មួញជាប្រចាំថ្ងៃ និងប្រចាំខែ ទើបគ្មានសកម្មភាពបង្ក្រាប ឬទប់ស្កាត់ ឲ្យមានប្រសិទ្ធភាពនាពេលកន្លងមក។
បញ្ហានេះដែរ អ្នកសម្របសម្រួលអង្គការលីកាដូ (Licadho) ប្រចាំខេត្តកោះកុង លោក អ៊ិន គង់ជិត ក៏បានស្នើដល់លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ និងថ្នាក់ដឹកនាំក្រសួងពាក់ព័ន្ធថ្នាក់ជាតិ ឲ្យជួយបញ្ជូនមន្ត្រីស្អាតស្អំចុះស៊ើបអង្កេត ទៅលើសកម្មភាព របស់មន្ត្រីស្ថាប័នជំនាញប្រចាំការ នៅច្រកទ្វារចាំយាមខេត្តកោះកុង និងច្រកផ្សេងទៀត ដើម្បីរកឲ្យឃើញការពិត និងឈានទៅផ្តល់យុត្តិធ៌មជូនអ្នកពាក់ព័ន្ធឲ្យបានឆាប់ ពិសេសឈានទៅទប់ស្កាត់អំពើពុករលួយ ដែលអាចនាំឲ្យខាតបង់ចំណូលថវិកាជាតិនាថ្ងៃអនាគត។
បញ្ហានេះ លោក អ៊ិន គង់ជិត សង្ស័យថា សកម្មភាពនាំចូលទំនិញគេចពន្ធ និងទំនិញខូចគុណភាព នៅតាមច្រកទ្វារចាំយាម និងច្រកផ្សេងៗមួយចំនួនទៀត បានដោយរលូន ទំនងជាទាល់តែមានការអនុញ្ញាតពីមន្ត្រីស្ថាប័នជំនាញពាក់ព័ន្ធ ទើបឈ្មួញទាំងនោះ អាចនាំចូលទំនិញចេញពីប្រទេសថៃ ចូលមកកម្ពុជា តាមច្រកទ្វារព្រំដែនចាំយាម និងច្រកផ្សេងៗទៀត ដោយគ្មានសមត្ថកិច្ចទប់ស្កាត់៕ ដែន សីមា
