ភ្នំពេញ៖ ស្ថានទូតចិនប្រចាំកម្ពុជា បានប្រកាសព័ត៌មានថា នាថ្ងៃទី២០ ខែវិច្ឆិកា កិច្ចសន្ទនា រវាងសភាពាណិជ្ជកម្មចិន កម្ពុជា និងគណៈប្រតិភូសហគ្រិន នៃសមាគមជំរុញកិច្ចសហប្រតិបត្តិការត្បូង ត្បូងប្រទេសចិន ត្រូវបានរៀបចំឡើង ក្នុងស្ថានទូតចិនប្រចាំកម្ពុជា។
លោកLyu Xinhua ប្រធានសមាគមជំរុញកិច្ចសហប្រតិបត្តិការត្បូង ត្បូងប្រទេសចិន លោកWang Wentian ឯកអគ្គរដ្ឋទូតចិនប្រចាំកម្ពុជា លោកJing Junប្រធានសភាពាណិជ្ជកម្មចិន កម្ពុជា និងព្រមទាំងអ្នកទទួលខុសសហគ្រាស ដែលមានចំនួនសរុបជាង៣០នាក់ បានបញ្ជើញចូលរួមក្នុងកិច្ចសន្ទនានេះ។
លោកឯកអគ្គរដ្ឋទូតចិន បានធ្វើការណែនាំអំពីចំណុចសំខាន់ៗ នៃទំនាក់ទំនងទ្វេភាគី រវាងចិន និងកម្ពុជា ជាពិសេសស្ថានភាពបច្ចុប្បន្ន នៃកិច្ចសហប្រតិបត្តិការជាក់ស្តែង រវាងប្រទេសទាំងពីរ ដើម្បីស្វាគមន៍សហគ្រាសចិន កាន់តែច្រើន មកវិនិយោគបង្កើតមុខរបរ ក្នុងប្រទេសកម្ពុជា។ ហើយធ្វើការពិភាក្សាយ៉ាងស៊ីជម្រៅ ស្តីអំពីមជ្ឈដ្ឋានវិនិយោគពាណិជ្ជកម្ម បទពិសោធន៍វិនិយោគ និងឱកាសកិច្ចសហប្រតិបត្តិការ ជាមួយនឹងសហគ្រិន ដែលមានវត្តមាននៅទីនោះ។
សមាគមជំរុញកិច្ចសហប្រតិបត្តិការត្បូង ត្បូងប្រទេសចិន ត្រូវបានបង្កើតឡើងនាខែសីហា ឆ្នាំ២០១៤ ក្នុងគោលបំណងដើម្បីជំរុញកិច្ចសហប្រតិបត្តិការ ជាក់ស្តែង លើវិស័យសេដ្ឋកិច្ច វប្បធម៌ អប់រំ បច្ចេកវិទ្យា និងវិស័យផ្សេងទៀតរវាងចិន និងប្រទេសដែលកំពុងអភិវឌ្ឍន៍ជាច្រើន។ ក្រោយពីបានបង្កើតសមាគមនេះមក នេះជាដំណើរទស្សនកិច្ចលើទី១៤ ដែលបានរៀបចំជូនសហគ្រិន ហើយគោលដៅនៃទីតាំង មានចំនួន៣ប្រទេស រួមមាន ប្រទេសវៀតណាម កម្ពុជា និងហ្វីលីពីន៕ដោយ៖កូឡាប
