ភ្នំពេញ៖ នៅវិមានសន្តិភាព រសៀលថ្ងៃពុធថ្ងៃ៩រោច ខែបុស្ស ឆ្នាំរកា ព.ស ២៥៦១ ត្រូវនឹងថ្ងៃទី១០ ខែមករា ឆ្នាំ២០១៨ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញជួបពិភាក្សាការងារទ្វេភាគី និងទទួលទានអាហារការងារពេលថ្ងៃត្រង់ជាមួយ លោក ង្វៀន សួនហ្វ៊ុក នាយករដ្ឋមន្ត្រីនៃសាធារណរដ្ឋសង្គមនិយមវៀតណាម។
ក្នុងជំនួបដែលធ្វើឡើងក្នុងពេលពិសារអាហារការងារថ្ងៃត្រង់នេះ លោកនាយករដ្ឋមន្ត្រីវៀតណាម បាន វាយតម្លៃខ្ពស់ និងចូលរួមអបអរសាទរយ៉ាងខ្លាំង ចំពោះប្រទេសកម្ពុជាដែលបានទទួលនូវកំណើនសេដ្ឋកិច្ចសង្គមយ៉ាងល្អប្រសើរ។ ជាពិសេស គឺប្រទេសកម្ពុជាមានសុខសន្តិភាព និងស្ថេរភាពនយោបាយ ពេញលេញ។ លោកនាយករដ្ឋមន្ត្រីវៀតណាមមានជំនឿចំពោះកម្ពុជាដែលធ្វើជាម្ចាស់ផ្ទះនៃកិច្ចប្រជុំកំពូលមេគង្គឡានឆាងលើកទី២នេះ គឺនឹងនាំមកនូវលទ្ធផលត្រចះត្រចង់បំផុត ហើយមិនតែប៉ុណ្ណោះ គឺបានលើកស្ទួយកិត្តិយស និងកិត្យានុភាពរបស់ប្រទេសកម្ពុជាកាន់តែខ្ពស់ថែមទៀត ទាំងនៅក្នុងកម្រិតតំបន់ និងអន្តរជាតិ។
នៅក្នុងជំនួបពិភាក្សាគ្នានេះ លោកនាយករដ្ឋមន្ត្រីវៀតណាម បានជំរាបជូន សម្តេចតេជោនាយករដ្ឋមន្ត្រី អំពីទំហំពាណិជ្ជកម្មរបស់ប្រទេសទាំងពីរ (កម្ពុជា-វៀតណាម) ដែលបានកើនឡើងរហូតដល់៣៨០០ លានដុល្លារអាមេរិក បើប្រៀបធៀបទៅនិងឆ្នាំកន្លងទៅ គឺមានការកើនឡើង (២៥%) ក្នុងនោះ វៀតណាមបាននាំទំនិញកសិផលកម្ពុជា ចូលទៅកាន់ប្រទេសវៀតណាម ក្នុងឆ្នាំ២០១៧ ដែលមានប្រមាណជាង១០០០ លានដុល្លារ។
សម្តេចតេជោ ហ៊ុន សែន នាយករដ្ឋមន្ត្រី បានស្វាគមន៍ លោកនាយករដ្ឋមន្ត្រីវៀត ណាម ង្វៀន សួនហ្វ៊ុក និងគណៈប្រតិភូ ដែលបានអញ្ជើញមកចូលរួមកិច្ចប្រជុំកំពូលមេគង្គ-ឡានឆាង លើកទី២។ ការអញ្ជើញចូលរួមរបស់លោកនាយករដ្ឋមន្ត្រីគឺបានចូលរួមចំណែកដល់ការពង្រឹងមិត្តភាព និងពង្រីកកិច្ចសហប្រតិបត្តិការកាន់តែខ្លាំងឡើងថែមទៀតរវាងប្រទេសទាំងពីរ ជាពិសេសធ្វើឲ្យកិច្ចប្រជុំកំពូលថ្ងៃនេះទទួលបានជោគជ័យជាមិនខាន៕ ដោយ៖កូឡាប
