អតីតបុគ្គលិកស្ថានកុងស៊ុលអង់គ្លេសប្រចាំ នៅទីក្រុងហុងកុង បានថ្លែងប្រាប់សារព័ត៌មាន BBC ថា គាត់ត្រូវបានអាជ្ញាធរចិនធ្វើទារុណកម្ម និងបានចោទប្រកាន់ថាញុះញង់ ឲ្យមានការចលាចលផ្នែកនយោបាយនៅទីក្រុងហុងកុង។
លោក Simon Cheng ដែលជាពលរដ្ឋហុងកុងបម្រើ ការឲ្យរដ្ឋាភិបាលអង់គ្លេសអស់រយៈពេល ២ឆ្នាំមកហើយ ត្រូវបានឃុំខ្លួនអស់រយៈពេល ១៥ថ្ងៃ ពេលលោកធ្វើដំណើរទៅកាន់ប្រទេសចិន កាលពីខែសីហាកន្លងទៅនេះ។
លោកបាននិយាយថា “ខ្ញុំត្រូវបានគេដាក់ច្រវ៉ាក់ ចង់បិទមុខ និងពាក់គម្របក្បាល”។
បើតាមប្រភពពីរដ្ឋាភិបាលអង់គ្លេស បានឲ្យដឹងថា ពួកគេជឿជាក់ថា ការអះអាងរបស់អតីតបុគ្គលិកខាងលើ ដែលថាលោកត្រូវបានគេវាយដុំ និងបង្ខំឲ្យសារភាព គឺអាចជឿទុកចិត្តបាន។
ជុំវិញបញ្ហានេះដែរ រដ្ឋមន្រ្តីការបរទេសអង់គ្លេស លោក Dominic Raab បានធ្វើការកោះហៅឯកអគ្គរដ្ឋទូតចិនមកសាកសួរ។
លោករដ្ឋមន្រ្តីអង់គ្លេសខាងលើនិយាយថា “ពួកយើងពិតជាមានការខឹងសម្បាយ៉ាងខ្លាំង ចំពោះការធ្វើទារុណកម្មដែលលោក Simon Cheng បានជួបប្រទះ នៅពេលខ្លួនកំពុងស្ថិតក្រោមការឃុំខ្លួននៅប្រទេសចិន។ ពួកយើងសូមបញ្ជាក់ឲ្យច្បាស់ថា ពួកយើងរំពឹងថា អាជ្ញាធរចិននឹងធ្វើការពិនិត្យឡើងវិញ និងចាប់អ្នកដែលប្រព្រឹត្តិទាំងនោះឲ្យទទួលខុសត្រូវ”។
ប៉ុន្តែនៅថ្ងៃពុធ អ្នកនាំពាក្យក្រសួងការបរទេសចិន បានថ្លែងប្រាប់ BBC ថាពួកគេពិតជាមិនអាចទទួលយកបាន ចំពោះការជ្រៀតជ្រែក របស់អង់គ្លេសបានឡើយ ហើយពួកគេនឹងធ្វើការកោះហៅឯកអគ្គរាជ្យទូតអង់គ្លេសវិញ ដើម្បីសម្តែងការប្រឆាំង និងការខឹងក្រោធ។
អ្នកនាំពាក្យរូបនោះថ្លែងថា “ពួកយើងសង្ឃឹមថា អង់គ្លេសនឹងប្រយ័ត្នប្រយែង និងឈប់ជ្រៀតជ្រែកចូលកិច្ចការផ្ទៃក្នុង របស់ហុងកុង និងចិន ព្រោះនៅចុងបញ្ចប់ វានឹងធ្វើឲ្យប៉ះពាល់ដល់ផលប្រយោជន៍របស់អង់គ្លេស”៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC